ជូង ជូងី៖ «យើង​និយាយ​ពី​បរិបទ​ជាក់​ស្តែង ថា​មិន​ត្រូវ»

សំនុំរឿងក្ដីដ៏ចម្រូងចម្រាស់ និងដំណើរ «ទៅហើយមកវិញៗ» របស់តុលាការ បានធ្វើឲ្យមេធាវីលោក ជួង ជូងី ចោទជាសំនួរ សម្ដែងការងឿងឆ្ងល់ ឬទាយមិនត្រូវ ដោយមិនដឹងថា តើតុលាការចង់ចាត់ការ យ៉ាងដូចម្ដេច ទៅកូនក្ដីរបស់លោកឡើយ។
Loading...
  • ដោយ: អ៊ុម វ៉ារី អត្ថបទ ៖ អ៊ុម វ៉ារី ([email protected]) - យកការណ៍៖ស្រ៊ុន ទិត្យ - ភ្នំពេញថ្ងៃទី ឧសភា ២០១៥
  • កែប្រែចុងក្រោយ: May 21, 2015
  • ប្រធានបទ: យុត្តិធម៌
  • អត្ថបទ: មានបញ្ហា?
  • មតិ-យោបល់

លោក ជូង ជូងី មេធាវីការពារក្ដី ឲ្យសកម្មជនរបស់ គណបក្សសង្គ្រោះជាតិ លោក មាជ សុវណ្ណរ៉ា  ហាក់បង្ហាញនូវចម្ងល់ និងភាពគ្មានជំនឿ លើសំណុំរឿងក្ដី ដែលលោកកំពុងកាន់នេះ បើទោះមានភស្តុតាងដោះបន្ទុក យ៉ាងច្រើនក៏ដោយ។ មេធាវី​រូបនេះ បានត្រឹមតែនិយាយ ទៅកាន់ក្រុមអ្នកសារព័ត៌មានថា៖ «និយាយពីបរិបទជាក់ស្តែង យើងពិបាកព្យាករណ៍។ (...) យើង​និយាយ​ពីបរិបទជាក់ស្តែង ថាមិនត្រូវ។»

កាលពីរសៀលថ្ងៃទី១៩ ខែឧសភានេះ ក្នុងចំណោមកូនក្តី របស់លោក ចំនួនប្រាំនាក់ មានតែពីនាក់ប៉ុណ្ណោះ ដែលត្រូវបាន​តុលាការ ធ្វើការសាកសួរ។ ឯបីនាក់ផ្សេងទៀត រួមទាំបលោក មាជ សុវណ្ណរ៉ា ផង ត្រូវបានលើកពេល សវនាការទៅថ្ងៃ​ទី​២៦ ខែឧសភាវិញ។ នេះបើតាមការអះអាង របស់លោកមេធាវី នៅខាងមុខសាលាដំបូង រាជធានីភ្នំពេញ។ ប៉ុន្តែបើតាម​ការ​គ្រោង របស់សាលាដំបូងរាជធានីភ្នំពេញ សកម្មជនគណបក្សសង្គ្រោះជាតិ ចំនួន១១ នាក់ ត្រូវបានកោះហៅ នៅក្នុងថ្ងៃតែ​មួយ ដើម្បីធ្វើការសាកសួរបន្ថែម ពាក់ព័ន្ធនឹងការបង្ក ឲ្យមានហិង្សាមួយ កើតឡើងនៅស្ពាននាគ ជិតទីលាន​ប្រជាធិបតេយ្យ កាលពីថ្ងៃទី១៥ ខែកក្កដា ឆ្នាំ២០១៤កន្លងមក។

យ៉ាងណាក៏ដោយ ក្នុងនាមលោកជាមេធាវី លោកនៅតែសង្ឃឹមថា ច្រៅក្រមទាំងបីរូបនឹងប្រើប្រាស់ នូវអំណាចឆន្ទានុសិទ្ធិ​របស់ខ្លួន ក្នុងការសម្រេចសេចក្តី ក្នុងរឿងនេះ ដោយយោងតាមផ្លូវច្បាប់ ហើយក្នុងសវនាការនាថ្ងៃទី២៦ ខែឧសភាខាងមុខ​នេះ នឹងប្រព្រឹត្តិទៅដោយរលូន។ លោកបានសង្ឃឹមទៀតថា ទាំងកូនក្តីរបស់លោក ទាំងជនត្រូវចោទទាំងអស់ នឹងត្រូវបាន​ឆ្លើយ នូវអ្វីដែលចង់ឆ្លើយ និងស្របតាមឆន្ទះរបស់ខ្លួន ដោយគ្មានការគាបសង្កត់ ពីតុលាការ។

លោកមេធាវី ជួង ជូងី បានបន្ថែមថា ទាក់ទងនឹងរឿងក្តីនេះ លោកបានមើលឃើញថា ការអវត្តមានរបស់ដើមបណ្តឹង ក្នុង​តុលាការ មានន័យស្មើ នឹងការបោះបង់បណ្តឹង របស់ខ្លួនចោល។ លោកបានបញ្ជាក់ តាមផ្លូវច្បាប់ថា ការមិនចូលរួម របស់​ដើមបណ្តឹង វាហាក់ដូចជា ពួកគាត់សម្រេចបោះបង់ចោល ការប្តឹងរបស់ពួកគាត់។ លោកថា បើពិចារណាតាមផ្លូវច្បាប់ ការ​ដែលមិនចូលរួម របស់ដើមបណ្តឹងនេះ វាជាប្រយោជន៍ សម្រាប់កូនក្តីរបស់លោក ទៅវិញទេ។

ករណីហិង្សានៅជិតស្ពាននាគ កាលពីថ្ងៃទី១៥ ខែកក្កដា ឆ្នាំ២០១៤ នោះត្រូវបានសង្គមស៊ីវិលមួយចំនួន បានធ្វើការ​ចោទ​ប្រកាន់ថា មានការពាក់ព័ន្ធ ជាមួយនឹងរឿងនយោបាយច្រើនជាង។ តែសម្រាប់ខាងរដ្ឋាភិបាលវិញ តែងបានបដិសេធថា មិន​​មាន​ពាក់ព័ន្ធ នឹងរឿងនយោបាយឡើយ តែជារឿងរបស់បុគ្គល ឬបក្សប្រឆាំង ដែលមានចេតនា ក្នុងការបង្កឡើង​ប៉ុណ្ណោះ៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...