ភាពយន្ដឯកសារនេះ ត្រូវបានថត នៅពេលដែលសមិទ្ធិករបារាំង លោក ហ្គីយោម ឡឺប៊ែរ (Guillaume Le Berre) បាន​ទៅ​ស្នាក់​នៅ ក្នុងប្រទេសកម្ពុជា។ លោក ឡឺប៊ែរ ត្រូវបានអនុញ្ញាត ឲ្យប្រើម៉ាស៊ីនថតស្វ័យប្រវត្តិ ពីលើអាកាស ហោះថត​តំបន់​អង្គរ អតីតរាជធានីបូរាណ នៃចក្រភពខ្មែរ រវាងពីសតវ​ត្សន៍ទី៩ មកសតវត្សន៍ទី១៤។ នេះជាសំណៅឯកសារ ថ្មីមួយទៀត នៃស្នាដៃដ៏ប្រណិត ដែលបានបង្ហាញ ទៅកាន់ពិភពលោក ពីប្រាង្គប្រាសាទ និងព្រៃឈើ ដែលជាទឹកដីដ៏អស្ចារ្យ ក្នុង​ចំណោម​ទឹកដី​បូរាណវត្ថុ ដ៏អស្ចារ្យផ្សេងទៀត នៅក្នុងពិភពលោក។

ជាអ្នកចូលចិត្ត ធ្វើដំណើរទេសចរណ៍ និងថតរូបមួយរូប លោក ហ្គីយោម ឡឺប៊ែរ ចង់ចែករំលែកខ្លាំងបំផុត នូវក្ដីរំភើប​ទាំង​ឡាយ ដែលកើតឡើង ពីរូបភាពរបស់លោក។ ដំបូងឡើយ លោកបានចេញ ទៅលំហែកាយរបស់លោក នៅប្រទេស​វៀតណាម ឯណោះទេ។ ប៉ុន្តែគម្រោងមួយ បានលេចធ្លោឡើង នៅក្នុងចិត្តរបស់លោក៖ នោះគឺ «ចូលទៅប្រទេសកម្ពុជា ដើម្បីថតពីលើអាកាស នូវតំបន់ប្រាសាទបូរាណខ្មែរដ៏ល្បី និងជាផ្នែកមួយ នៃបេតិកភ័ណ្ឌពិភពលោក ចុះក្នុង​បញ្ជី​របស់​អង្គការ អ៊ុយណេស្កូ»។

នៅក្នុងអំឡុងខែមេសា កន្លងទៅ នៅក្នុងខេត្តសៀមរាប លោកមានរយៈពេលតែមួយថ្ងៃប៉ុណ្ណោះ ដើម្បីធ្វើការងារនេះ បន្ទាប់​ពីទទួលបាន នូវការអនុញ្ញាតចាំបាច់ ពីសំណាក់អាជ្ញាធរកម្ពុជា ដើម្បីថតតំបន់អង្គរពីលើអាកាស។ ដូច្នេះ ពេលវេលា​មិន​អាច​ឲ្យ​ខាត​បង់ សូម្បីតែមួយនាទីបានឡើយ ជាពិសេស នៅពេលដែលសមិទ្ធិករយើង មានប្រាសាទជាច្រើន ដែលត្រូវ​ថត​ផ្តិត​យករូបភាព។

នៅពេលលោកផ្ដើម​ការងាររបស់ខ្លួន ដោយដាក់បង្ហោះដំបូងគេ នូវម៉ាស៊ីនថតវីដេអូ ដោយស្វ័យប្រវត្តិនោះ វេលានោះម៉ោង ទើបតែ៥កន្លះព្រឹកប៉ុណ្ណោះ។ ម៉ាស៊ីនថត បានហោះនៅកំពស់៨០ម៉ែត្រ ពីលើប្រាសាទអង្គរវត្ត ដោយ​មិនភ្លេចផ្តិត​យកមក​ជា​មួយ នូវទិដ្ឋភាពដ៏រំជួលចិត្ត នៃការរះឡើងដំបូង របស់ព្រះអាទិត្យ នៅចំកំពូលប្រាសាទ ទាំងប្រាំនោះឡើយ។ សម្រាប់​លោក ហ្គីយោម ពេលនោះ ជា«ពេលថ្លៃថ្លាខ្លាំងណាស់» ក្រោយពីលោក បានឃើញរូបភាពនេះ នៅជាប់នឹងអេក្រង់​វីដេអូ​ភ្លាមៗ។ លោកបានថ្លែងឡើងថា៖ «ខ្ញុំមានអារម្មណ៍ ថាបានហោះពីលើប្រាសាទ ដោយគ្រាន់តែជើងខ្ញុំ នៅជាប់ផ្ទាល់​ដី​ប៉ុណ្ណោះ»។

ចុះលោកអ្នក ដែលទើបនឹងបានទស្សនាវិញ មានអារម្មណ៍បែបណា?