១ឆ្នាំ២ខែ បានកន្លងផុតទៅ ការបាត់ខ្លួននៃយន្ដហោះ របស់ក្រុមហ៊ុនអាកាសចរណ៍ ម៉ាឡេស៊ីអ៊ែរឡាញ MH370 នៅតែ​មិន​មានការបកស្រាយ ឲ្យដឹងច្បាស់លាស់ យ៉ាងដូចម្ដេច ឬយ៉ាងណានោះនៅឡើយ។ តួយន្ដហោះប៊ូអីង (Boeing 777) ទាំង​មូល ក៏នៅមិនទាន់បានរកឃើញ ហើយ​អាជ្ញាធរ​នៃប្រទេសម្ចាស់យន្ដហោះវិញ ដែលបានប្រកាសថា ករណីយន្ដហោះនេះ ជាឧប្បត្តិហេតុនោះ ក៏ដូចជាមិនសូវ បាន​ធ្វើ​អត្ថាធិប្បាយ ឲ្យមានតម្លាភាព ខ្លាំងក្លានោះដែរ។

តែសម្រាប់អ្នកជំនាញបារាំង ខាងអាកាសចរណ៍ លោក អេនដ្រេ មីលណេ (Andre Milne) វិញ បានចេញមកអះអាងថា លោកបានដឹង ពីកន្លែងដែលយន្ដហោះមួយនេះ កំពុងស្ថិតនៅ។ នៅក្នុងវីដេអូខាងលើនេះ លោកបានអំពាវនាវ ស្វែងរក​ការរៃអង្គាស ដើម្បីយកថវិកា ទៅផ្គត់ផ្គង់ការស្រាវជ្រាវ របស់លោក និងក្រុមការងារ។

លោក អេនដ្រេ មីលណេ ជាអ្នកជំនាញមួយរូប ធ្វើការនៅក្នុងផ្នែកបច្ចេកវិទ្យា អាកាសចរណ៍យោធា របស់ប្រទេសបារាំង។ នៅក្នុងវីដេអូ ដែលលោកអះអាង ពីសំណុំរឿងនេះច្បាស់ លោក មីលណេ បានអះអាងថា៖ «នៅក្នុងតំបន់រវាង ប្រទេស​ម៉ាឡេស៊ី និងឥណ្ឌា មិនដែលមានការរុករុកណាមួយ ត្រូវបានធ្វើឡើង នៅឡើយ។ (...) ខ្ញុំសូមឲ្យមានការចូលរួម ជា​វិភាគ​ទាន​របស់លោកអ្នក ដើម្បីបង្ហាញឲ្យគេដឹង ពីហេតុភេទដែលបានកើតឡើង ចំពោះយន្ដហោះ MH370។»

ផ្ទុយពីការអះអាង ជាផ្លូវការ ដែលនិយាយថា យន្ដហោះបានហោះ ទៅភាគខាងត្បូង នៃមហាសមុទ្រឥណ្ឌានោះ លោក មីលណេ បានយល់ថា យន្ដហោះមួយនេះ បានហោះទៅភាគខាងជើងវិញ ដោយសារមានការរកឃើញ នូវស្លាកស្នាម​តួ​យន្ដហោះ ដែលគ្មានអត្តសញ្ញាណមួយ នៅបាតសមុទ្រ។ ជាមួយនឹងសាក្សីជាច្រើននាក់ លោក មីលណេ បានបញ្ជាក់​ទៀត​​ថា នៅយប់ថ្ងៃកើតហេតុនោះ បណ្ដាជននៅក្នុងតំបន់ បានឃើញយន្ដហោះ ប៊ូអីង ហោះកាត់ប្រជុំកោះ ម៉ាឌីវ មុននឹង​ផ្លាស់​​ប្ដូរ​ទិស​ដៅ ទៅកាន់ឈូងសមុទ្រ បឹងហ្គាល់ (Bengale) ដែលជាតំបន់ដែលលោក អះអាងពីការរុករក។

បើតាមលោក មីលណេ ករណីយន្ដហោះនេះ គឺឧក្រិដ្ឋកម្មប្រឆាំងមនុស្សជាតិ ប្រសិនបើនរណាម្នាក់ ព្យាយាម​ធ្វើឲ្យ​បាត់​ខ្លួន នូវអ្នកដំណើរ និងបុគ្គលិកបម្រើទាំងអស់ នៅលើយន្ដហោះ។ លោកបានស្នើ ឲ្យមានការចូលរួម ជាវិភាគទាន ដើម្បី​ផ្ដល់​លទ្ធភាព ជូនលោក អាចដឹកនាំការរុករក ដោយផ្អែកលើទិន្នន័យ នៃសិក្សាស្រាវជ្រាវខាងលើ។

អ្វីដែលសំខាន់ នៅពេលនេះ គឺត្រូវរង់ចាំមើល ថាតើការអះអាងរបស់លោក នឹងមានភាពហ្មត់ចត់របស់វា ដល់កម្រិតណា។ ប៉ុន្តែ ដើម្បីដឹងបន្ថែម ពីករណីរបស់យន្ដហោះ MH370 ទូរទស្សន៍បារាំងប៉ុស្ដ៍លេខ ២ បានធ្វើបទយកការណ៍មួយ (ជា​ភាសា​បារាំង) យ៉ាងលំអិត ដូចខាងក្រោម៖