ប្រសិនបើមនុស្សមួយចំនួន ចូលចិត្តបង្ហោះ នៅលើបណ្ដាញសង្គម នូវរឿងផ្ទាល់ខ្លួន ឬបញ្ហាសង្គម ដើម្បីឲ្យអ្នកផង​បាន​ដឹងនោះ តែក៏មានមនុស្សមួយចំនួនទៀត បានយកបណ្ដាញសង្គម មកបម្រើឲ្យរឿងអាក្រក់ៗ របស់ពួកគេដែរ។ នៅក្នុង​ប្រទេសកាណាដា បុរសម្នាក់បានសម្លាប់កូនស្រី និងប្រពន្ធ រួមនឹងប្អូនស្រីរបស់ខ្លួន រួចយកទង្វើមនុស្សឃាត ទាំងនេះ មក​បង្ហោះនៅលើហ្វេសប៊ុក ដោយមានអម ជាមួយនឹងពាក្យពេជ្រ ធ្វើអត្ថាធិប្បាយ យ៉ាងតក់ស្លុត មុននឹងធ្វើអត្តឃាត​តាម​ក្រោម។ នេះបើតាមការថ្លែងឲ្យដឹង របស់អ្នកនាំពាក្យនគរបាលកាណាដា កាលពីចុងសប្ដាហ៍កន្លងទៅ។

«គ្រួសារខ្ញុំ នឹងឈប់ឈឺចាប់»

នៅក្នុងពាក្យពេជ្រធ្វើអត្ថាធិប្បាយ របស់បុរសឈ្មោះ រ៉េនឌី ចេនហ្សេន (Randy Janzen) ដែលរស់នៅក្នុងក្រុង វេនខូវ័រ (ភាគ​នារតី នៃប្រទេសកាណាដា) បានឲ្យដឹងថា បុរសបានសម្លាប់កូនស្រី អាយុ១៩ឆ្នាំ កញ្ញា អេមីលី (Emily) ព្រោះនាង មានដុំគ្រួស ក្នុងក្បាល បង្កឲ្យឈឺក្បាលជាប្រចាំ តាំងពីកុមារភាព។ បុរស ចេនហ្សេន បានសរសេរទៀតថា ខ្លួនបាន​សម្លាប់​ភរិយា ព្រោះខ្លាច​នាង​ដឹង ពីមរណភាពរបស់កូនស្រី និងបន្ទាប់មក ចេនហ្សេន បានសម្លាប់ប្អូនស្រីខ្លួនបន្ថែមទៀត ដើម្បី​កុំ​ឲ្យនាងរស់នៅ ក្នុង​សភាពអៀនខ្មាស ពីទង្វើរបស់ខ្លួន។

សំណេរដ៏រន្ធត់ បានបង្ហាញថា បុរសជាឃាតករ បានរៀបរាប់ ពី​វិប្បដិសារីយ៉ាងជ្រាលជ្រៅ ជុំវិញទង្វើរបស់ខ្លួន ប៉ុន្តែថាខ្លួន មិនអាចនៅមើលកូនស្រីរបស់ខ្លួន ឈឺចាប់ក្នុងក្បាល ជារៀងរាល់ថ្ងៃ រហូតធ្វើឲ្យនាង ត្រូវបង្ខំចិត្តឈប់ពីសកលវិទ្យាល័យ។ បុរស ចេនហ្សេន បានសរសេរថា៖ «ក្រុមគ្រួសារខ្ញុំ នឹងឈប់ឈឺចាប់អ្វីទាំងអស់ ហើយពួកគេកំពុង រស់នៅឯស្ថានសួគ៌»។

ដុតផ្ទះ ដើម្បីសម្លាប់ខ្លួន

ប៉ុន្មានម៉ោង បន្ទាប់ពីបានបង្ហោះ នៅលើហ្វេសប៊ុក នូវសារដ៏គួរឲ្យតក់ស្លុត ទាំងនេះរួច នគរបាលបានរកឃើញ សាកសព​នៃជនរងគ្រោះទីមួយ នៅក្នុងផ្ទះមួយស្ថិតក្នុងតំបន់ជាយក្រុង មុននឹងបានធ្វើដំណើរ ទៅកាន់លំនៅដ្ឋានមួយ ដែលជន​សង្ស័យ (បុរស ចេនហ្សេន) ទំនងជាចង់ដុតផ្ទះខ្លួនចោល ដើម្បីសម្លាប់ខ្លួននៅក្នុងភ្នក់ភ្លើង។

ដោយសារលំនៅដ្ឋាននោះ បានឆេះខ្ទេចខ្ទីរ នៅសល់តែផេះនោះ ក្រុមអ្នកស៊ើបអង្កេត នៅមិនទាន់អាចបញ្ជាក់ បានឲ្យ​ច្បាស់នៅឡើយថា តើនឹងអាចមានជនរងគ្រោះ ប៉ុន្មានផ្សេងទៀត នៅក្នុងផ្ទះនេះ។ ប៉ុន្តែការស៊ើបអង្កេត កំពុងបន្ត​ធ្វើ​នៅ​ឡើយ៕