មន្ត្រី​សង្គម​ស៊ីវិល​សង្ស័យ​លិខិត ហោ ណាំហុង រឿង​ដី​តាម​ព្រំដែន

លិខិតចំហរ របស់រដ្ឋមន្រ្តីការបរទេសកម្ពុជា បានចោទប្រកាន់ ពលរដ្ឋខ្លួនឯង ទៅនឹង «ចោរ» ដែលបានកំពុង ឈ្លានពានយកទឹកដី របស់វៀតណាមនាពេលនេះ ធ្វើឲ្យមានការសង្ស័យថា តើរដ្ឋមន្រ្តីរូបនោះ កំពុងធ្វើលិខិត«ផ្លូវការ» បម្រើឲ្យផលប្រយោជន៍ទឹកដី នៃប្រទេសវៀតណាមឬ?
Loading...
  • ដោយ: អ៊ុម វ៉ារី អត្ថបទ និងយកការណ៍៖ អ៊ុម វ៉ារី ([email protected]) -ភ្នំពេញថ្ងៃទី៨ ឧសភា ២០១៥
  • កែប្រែចុងក្រោយ: May 10, 2015
  • ប្រធានបទ: ព្រំដែន
  • អត្ថបទ: មានបញ្ហា?
  • មតិ-យោបល់

ករណីលិខិតរបស់លោក ហោ ណាំហុង រដ្ឋមន្ត្រីការបរទេសកម្ពុជា ឆ្លើយទៅរដ្ឋសភា នៅមិនទាន់ឲ្យពលរដ្ឋមួយចំនួន បាន​ស្ងប់ចិត្តនៅឡើយ។ ប្រតិកម្ម នៅតែចេញមក ជាបន្តបន្ទាប់ និងរហូតមកដល់ពេលនេះ មន្ត្រីជាមេដឹកនាំ អង្គការ​សង្គម​ស៊ីវិល​ម្នាក់ ក៏នៅតែសម្ដែងចំងល់ថា តើលិខិតដែលមានលក្ខណៈ ជាផ្លូវការរ​បស់លោក ហោ ណាំហុង បានឆ្លុះបញ្ចាំង ពី​ការ​ពិត​បានប៉ុណ្ណា?

ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យ៉ង់ គឹមអេង បានថ្លែងឡើងថា ករណីនៃការចេញ​លិខិត របស់លោក ហោ ណាំហុង ជាករណីមួយ ដែលត្រូវដាក់«ការសង្ស័យ»។ លោកបន្តថា ក្នុងនាមរដ្ឋាភិបាល គួរធ្វើ​ការ​ពន្យល់ ឲ្យបានត្រឹមត្រូវ ជាក់លាក់ និងច្បាស់លាស់ជាងនេះ ដើម្បីជៀសវាង នូវការរិះគន់ពីសាធារណៈមតិ។ លោកបាន​បង្ហាញ នូវការសោកស្តាយ និងហួសចិត្តថា លោក ហោ ណាំហុង មិនគួចេញលិខិត ដែលគ្មានលក្ខណៈការទូត បែបម៉ាក់​ងាយពលរដ្ឋខ្លួនឯង យ៉ាងដូច្នោះឡើយ។

មន្រ្តីសង្កមស៊ីវិលរូបនេះ បានថ្លែងប្រាប់ ទស្សនាវដ្ដីមនោរម្យ.អាំងហ្វូ ថា មនុស្សគ្រប់រូប បានបង្ហាញ ឬដាក់ការសង្ស័យ និង​មើល​ឃើញថា «មានតែវៀតណាមទេ ដែលតែងលោភបំពាន មកលើកម្ពុជា»។ លោក បានសម្ដែងចំងល់ថា៖ «តែបើ​កម្ពុជា​រំលោភលើទឹកដី វៀតណាមវិញ នោះពិតជារឿងមួយ ដ៏ចម្លែកមែនទែន។ (…) វៀតណាម មិនដែលអនុញ្ញាត​ឲ្យ​កម្ពុជា រំលោភ​បំពាន​លើ​ខ្លួនទេ តាំងពីយូរយាណាស់មកហើយ។»

លិខិត របស់លោក ហោ ណាំហុង ទំនងជាបានឆ្លើយតប ទៅនឹងលិខិតស្នើឲ្យធ្វើអន្តរាគមន៍ របស់លោក ម៉ៅ មុន្នីវណ្ណ តំណាង​រាស្រ្តមណ្ឌលកំពង់ចាម មកពីគណបក្សសង្គ្រោះជាតិ ទៅលើករណី ពលរដ្ឋនិងអាជ្ញាធរវៀតណាម បានចូល​មក​បាញ់​ថ្នាំ ធ្វើ​ឲ្យដំណាំងកសិផល របស់ពលរដ្ឋខ្មែរ ងាប់អស់ នៅក្នុងតំបន់ជាប់ព្រំដែន កាលពីពាក់កណ្ដាល ខែមេសា កន្លង​ទៅ។ តបទៅនឹងលិខិត របស់រដ្ឋមន្ត្រីការបរទេសកម្ពុជា លោក ម៉ៅ មុន្នីវណ្ណ បានសម្ដែងការហួសចិត្ត និងការចំអកថា៖ «វា​ជា​ប្រវត្តិសាស្រ្តមួយហើយ ដែលខ្មែរយើង ចូលទៅឈ្លានពាន ចូលទៅរំលោភយកដីយួន បាននោះ។ មានតែសម័យ​នេះ​ទេ ដែលអាចធ្វើទៅបាន!»

ប្រហែលគ្នានេះ លោក យ៉ង់ គឹមអេង បានថ្លែងការហួសចិត្តដែរថា តាំងតែពីតូច មកទល់អាយុសព្វថ្ងៃ លោកមិនដែល​ដឹង​ថា កម្ពុជារំលោភទឹកដីវៀតណាម កន្លែងណានោះទេ។ លោកបញ្ជាក់ថា៖ «កន្លងមក ខ្ញុំមិនដែលឃើញកម្ពុជា រំលោភ​បំពាន​ដីវៀតណាមសោះ ប៉ុន្តែបើវៀតណាមរំលោភបំពានកម្ពុជា មានច្រើន»។ មេដឹកនាំអង្គការសង្គមស៊ីវិលរូបនេះ បាន​លើក​ជាចំណោទសួរថា តើការចេញលិខិត ដែលមានលក្ខណៈ ជាផ្លូវការយ៉ាងដូច្នេះនោះ បានឆ្លុះបញ្ចាំង ពីការពិតបាន​ប៉ុណ្ណា?  តែផ្ទុយមកវិញ លិខិតនេះអាចធ្វើឲ្យប៉ះពាល់ និងអាប់អោនមុខមាត់ របស់ប្រជាជន ក៏ដូចជារដ្ឋាភិបាលកម្ពុជា បើ​ការ​អះអាងនោះ គ្មានមូលដ្ឋានត្រឹមត្រូវ។

ទស្សនាវដ្តីមនោរម្យ.អាំងហ្វូ នៅតែមិនអាចសុំប្រតិកម្ម ពីលោក កុយ គួង អ្នកនាំពាក្យក្រសួងការបរទេស បានដដែល​ក្នុង​ថ្ងៃនេះ ដោយគ្មានអ្នកទទួលទូរស័ព្ទ។ តែបើយោងតាម ការអះអាងក្នុងលិខិត ដែលចុះហត្ថលេខាដោយ រដ្ឋមន្ត្រីក្រសួង​ការបរទេសកម្ពុជា លោក ហោ ណាំហុង កាលពីថ្ងៃទី៤ ខែឧសភា បានបញ្ជាក់ប្រាប់លោក ហេង សំរិន ប្រធានរដ្ឋសភាថា មូលហេតុដែលនាំឲ្យប្រជាជន និងសមត្ថកិច្ចវៀតណាម ប្រតិកម្ម និងចូលបាញ់ថ្នាំពុល បំផ្លាញដំណាំកសិករខ្មែរ (ភូមិជើង ឃុំជាំ ស្រុកមេមត់ ខេត្តត្បូងឃ្មុំ) នោះ ដោយសារតែកសិករខ្មែរ បាននាំគ្នាចូលទីដាំដំណាំ ក្នុងទឹកដីវៀតណាម ចំនួន​ជាង​១៦,៦ហិកតា។

ស៊ូប្រឈមមុខ...

ដំណឹងចុងក្រោយ ដែលទស្សនាវដ្ដីបានទទួល កាលពីថ្ងៃទី០៨ ខែឧសភា បានឲ្យដឹងថា ខណៈ«វិវាទ» ដែលហាក់ដូចជា គ្មានដំណោះស្រាយនេះ ប្រជាពលរដ្ឋភូមិជើង ឃុំជាំ ស្រុកមេមត់ ខេត្តត្បូងឃ្មុំ បានប្រកាសជាថ្មីថា ពួកគាត់នឹងចូល​ទៅ​ដាំ​ដុះ បង្ក​បង្កើន​ផល លើផ្ទៃដីកេរ្តិ៍ដូនតាជាបន្ត។ ពួកគាត់បានថ្លែងឲ្យដឹង ពីភូមិជើងមកថា «ស៊ូ»ប្រឈមមុខគ្មា តែមិននៅ​«ស្ងៀម» ដោយបោះបង់ដីដូនតា ឲ្យទៅប្រទេសវៀតណាម ដោយស្រួលនោះឡើយ។ ឯប្រធានសហព័ន្ធ​និស្សិត​បញ្ញាវ័ន្ត​កម្ពុជា លោក ម៉ៅ ពិសេស បានអះអាងថា នឹងដឹកនាំក្រុមប្រឹក្សា ឃ្លាំមើលកម្ពុជា ចុះទៅពិនិត្យមើលដោយផ្ទាល់ លើ​តំបន់​ដំណាំ​របស់​ពលរដ្ឋ ដែលបានរងនូវការបំផ្លាញ ដោយថ្នាំបំពុលនោះ នាថ្ងៃទី១៧ ខែឧសភា ខាងមុខ៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...