ក្រុមចោរពីរនាក់ បានរត់គេចខ្លួនបាត់ស្រមោល ដោយយកទៅជាមួយ នូវម៉ូតូជនរងគ្រោះ ចំណែកឯគ្នីគ្នាម្នាក់ទៀត ត្រួវ​បាន​អ្នកភូមិ និងជនរងគ្រោះ វាយការពារខ្លួន រហូតរងរបួសជាទម្ងន់ និងបន្សល់ទុក នូវម៉ូតូពីរគ្រឿង ដែលក្រុមចោរ បានជិះ​ធ្វើសកម្មភាព។ ហេតុការណ៍នេះ បានកើតឡើង កាលពីថ្ងៃអាទិត្យទី០៣ ខែមេសា ឆ្នាំ២០១៤ ត្រង់ចំណុចជិតវត្តស្រះចក ក្នុងសង្កាត់ស្រះចក ខណ្ឌដូនពេញ រាជធានីភ្នំពេញ។

សាក្សី ដែលបានឃើញ ហេតុការណ៍ប្លន់ទាំងថ្ងៃនេះ បានរៀបរាប់ថា ដំបូងជនរងគ្រោះ មានគ្នាពីរនាក់ ជាសង្សារនឹងគ្នា បានជិះម៉ូតូចេញពីម្តុំវត្តស្រះចក លុះមកដល់កន្លែង កើតហេតុ ស្រាប់តែ មានជនល្មើសបីនាក់ ដែលជិះម៉ូតូពីរគ្រឿង តាម​ពីក្រោយ ហើយបានមកដល់ជិតជនរងគ្រោះទាំងពីរ ក៏បានដកកាំភ្លើងខ្លី ភ្ជង់ជនរងគ្រោះទាំងពីរ តែមិនទាន់បានបាញ់ទេ។ សាក្សីបានបន្តថា គេមិនបានស្គាល់ ពីអត្តសញ្ញាណ ក្រុមចោរទាំងពីរនាក់នោះទេ ព្រោះ នៅពេលប្រតាយប្រតប់គ្នា ជន​ល្មើស​ពីរនាក់ បានរត់គេចខ្លួន។

ជនរងគ្រោះឈ្មោះ សម្បត្តិ ពិត អាយុ២៦ឆ្នាំ និងដៃគូជាស្រ្តី ឈ្មោះ នួន ស្រីណា អាយុ២៥ឆ្នាំ បច្ចុប្បន្នរស់នៅ ក្នង​បន្ទប់​ជួល តាមផ្លូវ ១៣២ សង្កាត់ស្រះចក ខណ្ឌដូនពេញ រាជធានីភ្នំពេញ និងប្រកបរបរ ជាអ្នកលក់ដូរ។ លោក សម្បត្តិ ពិត បាន​ប្រាប់អ្នកសារព័ត៌មានថា ដំបូងគាត់ មានការតក់ស្លុតខ្លាំងណាស់ ព្រោះក្រុមចោរ បានភ្ជង់លោកនឹងកាំភ្លើងខ្លី តែបន្តិច​ក្រោយ​មក លោកបានដឹងថា កាំភ្លើងខ្លីនោះបាញ់មិនចេញ លោកក៏បានតដៃ ដើម្បីការពារខ្លួន។ ភ្លាមៗនោះ អ្នកភូមិ​នៅ​ក្បែរ​ខាង បានចេញមកជួយជាច្រើន ដោយមិត្តស្រីរបស់លោក បានស្រែកឲ្យគេជួយ។

មន្រ្តីប៉ូលិស ដែលបានចុះអន្តរាគមន៍ ក្នុងរឿងនេះ បានឲ្យដឹងថា លោកបានបញ្ជូនជនល្មើស ដែលរងរបួសជាទម្ងន់ ទៅ​មន្ទីរពេទ្យកាល់ម៉ែត ដើម្បីសង្គ្រោះ។ លោកបានបញ្ជាក់ថា ម៉ូតូទាំងពីរគ្រឿង របស់ក្រុមចោរ ត្រូវបានយកទៅរក្សារទុក នៅ​ប៉ុស្តិ៍រដ្ឋបាលស្រះចក និងរៀបចំសុំនុំរឿង បញ្ជូនទៅខណ្ឌ ធ្វើការស្រាវជ្រាវបន្ត ពីមុខសញ្ញាក្រុមជនល្មើស ពីរនាក់ទៀត៕