ក្នុងកិច្ចសម្ភាស ជាមួយអ្នកសារព័ត៌មាន ក្នុងវេទិកាស្ដីពីប្រព័ន្ធ ផ្សព្វផ្សាយឯករាជ្យ និងប្រកបដោយវិជ្ជាជីវៈ នៅកម្ពុជា នា​ព្រឹកថ្ងៃទី៣០ ខែមេសានេះ នាយកប្រតិបត្តិ នៃមជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យ លោក ប៉ា ងួនទៀង បាន​លើកឡើងថា បរិយាកាស ក្នុងអំឡុងឆ្នាំ២០១៤ បានធ្វើឲ្យអ្នកសារព័ត៌មាន ងាយនឹងរងគ្រោះ ដែលជាហេតុ ធ្វើឲ្យ​ប្រព័ន្ធ​ផ្សព្វផ្សាយ មានការប្រុងប្រយ័ត្ន នៃការចុះផ្សាយ នៃអត្ថបទព័ត៌មានរបស់ខ្លួន។

លោកបានថ្លែងឡើងថា៖ «ចំពោះខ្ញុំ ឆ្នាំ២០១៤ ជាឆ្នាំមួយអាក្រក់ សម្រាប់អ្នកសារព៌ត៌មាន និងជាបរិយាកាសមួយ ដែល​រដ្ឋាភិបាល បាននឹងប្រគល់អំណាច ទៅដល់កងកម្លាំងប្រដាប់អាវុធ និងក្រុមសន្តិសុខខ្លួនឯង ហួសប្រមាណ ក្នុងការ​បង្ក្រាប​សកម្មជនសិទ្ធិមនុស្ស បង្ក្រាបអ្នកសារព័ត៌មាន បើទោះជាពាក់កាតសម្គាល់ ជាអ្នកសារព័ត៌មាន ក៏ដោយ។ (...)  យើង​មើល​ឃើញ​ថា ជាបរិយាកាសមួយ ដែលធ្ងន់ សម្រាប់២០១៤។ ព្រោះតែការវាយ វាងាយពេក ការកំហែង វាងាយ​ពេក និង​ការ​រឹប​អូស យកសម្ភារៈអ្នកសារព័ត៌មាន វាងាយពេក។ (...) ធ្វើឲ្យអ្នកសារព័ត៌មាន មានការភ័យខ្លាចច្រើន ក្នុង​ការ​ផ្សាយ​ព័ត៌មាន។»

លោកបានចាត់ទុកថា តាមករណីខាងលើនេះហើយ ដែលជាមូលហេតុ ជម្រុញឲ្យអ្នកសរសេរ អ្នកចុះផ្សាយ ត្រូវបាន​រិត​បណ្តឹងទៅលើអត្ថបទ ដែលត្រូវធ្វើការចុះផ្សាយ។ លោកថា ពេលខ្លះអត្ថបទល្មមៗ ក៏មិនហានចេញផ្សាយដែរ ព្រោះតែ​មាន​ការ​ភ័យ​ខ្លាច។

លោកបានលើកជាឧទាហរណ៍ថា សម្រាប់ស្ថាប័នព័ត៌មានរបស់លោក ក្នុងឆ្នាំ២០១៤ កន្លងមកនេះ មានករណី ដែល​ត្រូវ​បានរងគ្រោះទីមួយ មានអ្នកតាមដាន លើអ្នកសារព័ត៌មានរបស់លោក និងទីពីរ អ្នកសារព័ត៌មានរបស់លោក ត្រូវបាន​សន្តិសុខ​វាយ ឲ្យរបួសយ៉ាងធ្ងន់ធ្ងរ នៅទីលានប្រជាធិបតេយ្យ រហូតបញ្ជូនទៅព្យាបាល នៅប្រទេសថៃ។ លោកបន្តថា ជា​មួយ​គ្នា​នេះ ក៏មានការគម្រាមកំហែង តាមរយៈរូបភាពមួយចំនួនទៀត ដូចជាការចល័តកម្លាំងទាហាន កម្លាំងប៉ូលីស និង​ការ​ទម្លាក់​កម្លាំង​ទាំង​នោះ រួចប្រមូលយកទៅវិញជាដើម។

កត្តាទាំងនេះហើយ ដែលបង្ហាញថា ក្នុងឆ្នាំ២០១៤ បរិយាកាសនៃការ«ភ័យខ្លាច» មានកំណើន កើនឡើងខ្ពស់។ ហើយ​ក៏​ជា​មូលហេតុ​មួយ ដែលតម្រូវឲ្យអ្នកសារព័ត៌មាន មានការប្រុងប្រយ័ត្ន លើអត្ថបទ ឬព័ត៌មានរបស់ខ្លួន កាន់តែខ្ពស់។

យ៉ាងណាក៏ដោយ និងដើម្បីកាត់បន្ថយ នូវភាពតានតឹងនេះ លោក ប៉ា ងួនទៀង បានស្នើដល់រដ្ឋាភិបាល ឲ្យចូលរួម​ពិនិត្យ​មើល នឹងដើរតាម«ចរន្ត របស់ប្រជាពលរដ្ឋ» ក្នុងការកំណែទម្រង់។ លោកបន្តថា កំណើននៃការចង់បាន នូវ​ប្រព័ន្ធ​ព័ត៌មាន​មួយ​ឯករាជ្យ ព័ត៌មានពិត តុល្យភាព និងទាន់ហេតុការណ៍ របស់ប្រជាពលរដ្ឋក្នុងពេលនេះ បានកើនឡើងដល់​៧៥​ភាគ​រយ បើតាមការស្រាវជ្រាវ របស់ក្រុមការងារលោក នាពេលកន្លងមកនេះ។

តាម«ចរន្ត»ខាងលើ នាយកប្រតិបត្តិមជ្ឈមណ្ឌលបានលើក ជាចំណោទមួយ សួរទៅរដ្ឋាភិបាលថា តើរដ្ឋាភិបាលគួរ​តែ​ដើរ​ឲ្យស្រប នឹងចរន្តរបស់ប្រជាពលរដ្ឋ ឬគួតែដើរបញ្ច្រាសទិសទៅវិញ? នាយកប្រតិបត្តិ នៃមជ្ឈមណ្ឌលកម្ពុជា ដើម្បី​ប្រព័ន្ធ​ផ្សព្វ​ផ្សាយ​ឯករាជ្យរូបនេះ បានបញ្ជាក់ថា បើរដ្ឋាភិបាលខ្លួនឯង ដើរបញ្ច្រាសទិស របស់ប្រជាពលរដ្ឋនោះ រដ្ឋាភិបាល​ខ្លួន​ឯង នឹង​បាត់បង់ នូវអំណាចខាងនយោបាយ និងការគាំទ្រ ពីប្រជាពលរដ្ឋ ក៏ដូចជាបាត់បង់អាសនៈ ក្នុងរដ្ឋសភា។

លោក ប៉ា ងួនទៀង បានចាត់ទុកថា សេរីភាព នៃអ្នកសារព័ត៌មាន ជារឿងសំខាន់ និងជាកត្តាមួយ ដែល​សំខាន់​ក្នុង​ការ​ចូល​រួម​អភិវឌ្ឍន៍​សង្គម។ លោកបានថ្លែងឲ្យដឹងទៀតថា៖ «បើគ្មានតួនាទី នៃប្រព័ន្ធព័ត៌មានទេ គ្មានសេរីភាព​សារព័ត៌មាន​ទេ មានន័យថា សង្គមហ្នឹងអត់អាច ទទួលបានជោគជ័យ ក្នុងការកែទម្រង់ ក្នុងការអភិវឌ្ឍន៍ ផ្នែកសេដ្ឋកិច្ច និងការ​អភិវឌ្ឍន៍ ផ្នែកសិទ្ធិមនុស្ស និងលទ្ធិប្រជាធិបតេយ្យបានទេ។»

សូមបញ្ជាក់ដែរថា វេទិកាស្ដីពីប្រព័ន្ធផ្សព្វផ្សាយឯករាជ្យ និងប្រកបដោយវិជ្ជាជីវៈនៅកម្ពុជា ត្រូវបានរៀបចំឡើងមុនបីថ្ងៃ នៃទិវាសេរីភាព សារព័ត៌មានពិភពលោក ក្នុងថ្ងៃទី៣ ខែឧសភា ឆ្នាំ២០១៥ ខាងមុខ។ វេទិកាស្ដីពីប្រព័ន្ធផ្សព្វផ្សាយឯករាជ្យ និងប្រកបដោយវិជ្ជាជីវៈនៅកម្ពុជា ក៏ត្រូវបានរៀបចំឡើង ដោយមជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យ ហៅ​កាត់​ជា​ភាសាអង់គ្លេសថា CCIM មជ្ឈមណ្ឌលសិទ្ធិមនុស្សកម្ពុជា ហៅកាត់ថា CCHR និងគណៈកម្មការ​ពិសេស​ដោះ​ស្រាយ​ទំនាស់ ហៅកាត់ថា ACT៕