ក្រុមប្រឹក្សាក្រុង វើនីសប៊ិច នៅក្នុងរដ្ឋកាលីហ្វ័នី (ភាគខាងលិចនៃសហរដ្ឋអាមេរិក) បានបោះឆ្នោតសម្រេច កាលពីថ្ងៃ​អង្គារនេះ អនុញ្ញាតឲ្យស្ត្រី អាចលែងដើមទ្រូង បង្ហាញសុដន់របស់ពួកគេ បាននៅលើឆ្នេរដ៏ល្បី នៃទីក្រុងមួយនេះ ដែល​សម្បូរទៅដល់ទេសចរណ៍។

ព្រោះស្ត្រីក៏មានសិទ្ធិដូចបុរស!

ការបោះឆ្នោតនេះ ត្រូវបានប្រកាសឲ្យដឹង នៅលើគេហទំព័ររបស់ក្រុមប្រឹក្សាក្រុង ប៉ុន្តែត្រូវមានការយល់ព្រម ពីក្រុម​ប្រឹក្សា​ក្រុង ឡូសអេនជឺឡេស បន្តទៀត ដែលកន្លងមក ក្រុង ឡូសអេនជឺឡេស បានបដិសេធ និងហាមប្រាម មិនឲ្យ​ធ្វើ​បែប​នេះឡើយ។ នៅក្នុងការសម្រេចកាលពីថ្ងៃអង្គារនេះ ក្រុមប្រឹក្សាក្រុង វឹនីសប៊ិច​ បានបង្ហាញពីអំណះអំណាង​របស់​ខ្លួនថា ឆ្នេរខ្សាច់របស់ខ្លួន «ត្រូវបានស្ថាបនា និងកកើតឡើង យកគំរូតាមវប្បធម៌អ៊ឺរ៉ុប នៃទីក្រុង វើនីស របស់ប្រទេស​អ៊ីតាលី»។

«ខណៈពេលដែល ការងូតទឹកសំដិលខ្លួន ព្រលែងសុដន់ គឺជារឿងធម្មតា នៅតាមតំបន់ជាច្រើន នៃទ្វីបអ៊ឺរ៉ុប - នៅទី​កន្លែង​ផ្សេងទៀត ក្នុងពិភពលោក និងមួយភាគទៀត នៃសហរដ្ឋអាមេរិកនោះ ទីក្រុង វឹនីសប៊ិច ចង់ឲ្យស្ត្រីអាចរីករាយ នូវសិទ្ធិ ដែលពួកគេត្រូវមាន ដូចបុរសដែរ ហើយអាចគេងសំដិល ក្រោមពន្លឺថ្ងៃ ដោយព្រលែងសុដន់ទទេ»។

ច្បាប់តំបន់ របស់ក្រុងឡូសអេនជឺឡេស ដែលមានវិសាលភាព ទៅលើក្រុង វើនីសប៊ិច ដែរនោះ បានចែងច្បាស់ថា៖ «បុរស​ស្ត្រី មិនអាចបង្ហាញខ្លួន ងូតទឹក ឬសំដិលយកពន្លឺថ្ងៃ (...) នៅក្នុងឯកសណ្ឋាន ដែលធ្វើឲ្យឃើញចំណែកខ្លះ នៃកេរ្តិ៍ខ្មាស (...)  រាប់ទាំង សុដន់ទាំងមូល របស់ស្ត្រីនោះផង»៕