កាលពីថ្ងៃទី១៥ ខែកុម្ភៈកន្លងទៅ ក្រុមអ្នកជួយសង្គ្រោះបន្ទាន់មួយ បានចូលទៅក្រុង គ្រីមបាយ (Grimsby ភាគខាងកើត នៃចក្រភពអង់គ្លេស) ដើម្បីជួយទៅពិនិត្យព្យាបាល បុរសចំណាស់ម្នាក់ អាយុ ៩២ ឆ្នាំ ដែលជួបអាការៈ ឈឺចាប់ក្នុងទ្រូង យ៉ាងខ្លាំង។ ក្រុមអ្នកជួយសង្គ្រោះ បានចូលទៅក្នុងគេហដ្ឋាន របស់បុរសចំណាស់ ដោយបានទុកទ្វារថយន្ដ​សង្គ្រោះ​អ្នក​ជំងឺរបស់ពួកគេ នៅចំហរ ដោយពួកគេគិតថា អាចត្រូវការអ្វីៗពីក្នុងរថយន្ដ ដោយមិនចាំបាច់ បើកសោរទ្វារថយន្ដ។ នេះ បើតាមសេចក្ដីរាយការណ៍ របស់សារព័ត៌មានចម្រុះភាសា Huffington Post ចេញផ្សាយ ក្នុងប្រទេសអង់គ្លេស។

ប៉ុន្តែនៅពេលក្រុមអ្នកជួយសង្គ្រោះ បានត្រឡប់មករថយន្ដពួកគេវិញ ស្រាប់តែប្រទះឃើញ រឿងដ៏ហួសចិត្តមួយ បាន​កើត​ឡើង​ក្នុងរថយន្ដ។ យុវជនម្នាក់អាយុ១៨ឆ្នាំ កំពុងធ្វើសកម្មភាពរួមរ័ក្សស្នេហា នៅក្នុងនោះ នៅពីលើរទេះ​សម្រាប់​សែង​អ្នក​ជំងឺ។

ជាប់គុក៣ឆ្នាំ

នៅពេលដែលក្រុមអ្នកជួយសង្គ្រោះ សុំឲ្យយុវជន និងដៃគូ ចេញពីរថយន្ដ ដើម្បីឲ្យពួកគេ អាចធ្វើកិច្ចការជួយសង្គ្រោះ បន្តទៅទៀត ស្រាប់តែយុវជននោះ ប្រតិកម្មមកវិញ យ៉ាងសម្បើមដៃ។ យុវជនដែលមានឈ្មោះ ឃីលី ហារហ្គេវេស (Kyle Hargreaves) និយាយទៅក្រុម អ្នកជួយសង្គ្រោះថា៖ «តើអ្នកឯងមានបញ្ហាអ្វី?  យើងគ្រាន់តែ ចង់ធ្វើការរួមរ័ក្ស​ប៉ុណ្ណោះ។» បន្ទាប់មកយុវជននោះ បានស្ទុះទៅវាយបុគ្គលិក អ្នកជួយសង្គ្រោះម្នាក់ ចំនួនបីដៃ ចំកណ្ដាលមុខយ៉ាង​ដំណំ។ មិនត្រឹមតែប៉ុណ្ណឹង យុវជនដ៏អស្ចារ្យ បានស្ដោះទឹកមាត់ ដល់លើបុគ្គលិកម្នាក់នោះ ថែមទៀត។

ក្រុមនគរបាល បានមកដល់ផ្ទាល់ នឹងកន្លែងភ្លាម បន្ទាប់ពីក្រុមអ្នកជួយសង្គ្រោះ បានចុចលើប៊ូតុង «មានបញ្ហាបន្ទាន់» ដើម្បី​ហៅកម្លាំងជំនួយ។ សំណាងល្អ បុរសចំណាស់ជាអ្នកជំងឺ មិនបានរងគ្រោះ ដោយសារបញ្ហាជម្លោះ ជាមួយយុវជន ឃីលី ខាងលើនេះទេ។ ប៉ុន្តែបុគ្គលិក ដែលទទួលបានបីដៃពីយុវជន មានភ្នែកម្ខាងឡើងជាំខ្មៅ។ ជាទង្វើដ៏ហួសចិត្ត ដែល​តុលាការ បានផ្ដន្ទាទោសយុវជនដៃដល់ កាលពីដើមខែមេសា កន្លងមកនេះ ឲ្យជាប់ពន្ធនាគារ បីឆ្នាំ៕