សកម្មជនគណបក្សសង្គ្រោះជាតិ ទាំងប្រាំរូប ដែលបានជាប់ឃុំឃាំងនោះ ត្រូវបានឯកភាព និងសម្រេចរួមគ្នា រវាងលោក ហ៊ុន សែន និង លោក សម រង្ស៊ី ក្នុងការស្នើទៅកាន់តុលាការ ដើម្បីពិនិត្យ និងរៀបចំឲ្យមានការសម្រេច ក្នុងការដោះ​លែង​ឲ្យនៅក្រៅឃុំ ជាបណ្តោះអាសន្ន។

នាវិមានរដ្ឋសភាជាតិ ចំពោះមុខអ្នកសារព័ត៌មាន ព្រឹកថ្ងៃទី១០ ខែមេសានេះ លោក ជួង ជូងី មេធាវីការពារក្ដី ឲ្យសកម្ម​ជន​របស់គណបក្សសង្គ្រោះជាតិ បានបង្ហើបឲ្យដឹងថា លោក មាជ សុវណ្ណារ៉ា រួមទាំងសកម្មជន៤នាក់ផ្សេងទៀត នឹង​ត្រូវ​ដោះលែង ឲ្យបាននៅក្រៅឃុំ ជាបណ្តោះអាសន្ន មុនថ្ងៃចូលឆ្នាំខាងមុខនេះ យ៉ាងយូរបំផុត រសៀលថ្ងៃទី១៣ ខែមេសា។

មេធាវីរូបនេះបន្តថា តាមរយៈការដោះលែងនេះ និតិវិធីត្រូវបានតុលាការសម្រេច និងហៅពួកគាត់ មកកាន់តុលាការ និង​បើកការសាកសួរបន្ថែម ឯមេធាវីក៏នឹងស្នើពាក្យធានា នៅក្រៅឃុំជាថ្មី បន្ទាប់មកនាពេលរសៀល នឹងសម្រេចឲ្យ​មាន​ការ​ដោះលែង តែម្តង។

តាមព័ត៌មានដែលស្និត នឹងលោក មាជ សុវណ្ណារ៉ា បានប្រាប់ទស្សនាវដ្តីមនោរម្យ.អាំងហ្វូថា ករណីនៃការស្នើបែបបទ ក្នុង​ការដោះលែងលោក មាជ សុវណ្ណារ៉ា និងសកម្មជនគនបក្សសង្គ្រោះជាតិ ផ្សេងទៀតនោះ ព្រោះតែមានការឯកភាព និងការយល់ព្រម ពីថ្នាក់ដឹកនាំកំពូលទាំងពីរ កាលពីប៉ុន្មានថ្ងៃមុននេះ។ ហើយការសម្រេចជាផ្លូវការ និងការរៀបចំ​ឯកសារ ក៏ត្រូវបានអនុវត្តនាពេលនេះផងដែរ។ ប្រភពនោះ បានថ្លែងថា៖ «ការពិតទៅ រឿងនេះ ទាំងលោក កឹម សុខា លោក សម រង្ស៊ី លោក ហ៊ុន សែន ក៏បានជជែកគ្នាច្រើន ពីការស្នើឲ្យមាន ការលើកលែងទោស និងការដាក់ឲ្យ​នៅ​ក្រៅ​ឃុំ ទាំងសកម្មជនគណបក្ស ទាំងអ្នកបឹងកក់ រួមទាំងព្រះសង្ឃបីអង្គផងដែរ»។

លោកមេធាវី ជួង ជូងី ក៏បានបញ្ជាក់ថា៖ «ថ្នាក់ដឹកនាំគណបក្សសង្គ្រោះជាតិ សម្តេចតេជោ បានឯកភាពគ្នាជាផ្លូវការ ឲ្យ​មានការដោះលែង។ (…) ក្រុមខ្ញុំបានរៀបចំឯកសារស្នើឲ្យមានការដោះលែងកាលពីម្សិលម៉ិញ និងព្រឹកម៉ិញនេះ។ (…) នីតិវិធីត្រូវធ្វើឡើងនាព្រឹកថ្ងៃច័ន្ទ(ទី១៣ ខែមេសា) នឹងដោះលែងពេលល្ងាច។ (…) ដោះលែងពួកគាត់ឲ្យបានមុន​ចូល​ឆ្នាំ។ (…) ដោះលែងឲ្យនៅក្រៅឃុំសិន អារឿងសេសសល់ផ្សេងៗយើងនឹងសម្អាតទៅតាមក្រោយ។»

ទស្សនាវដ្រីមនោរម្យ.អាងហ្វូ មិនអាចសុំការបញ្ជាក់បន្ថែម ពីលោក យ៉ែម បុញ្ញឫទ្ធិ អ្នកនាំពាក្យគណបក្សសង្គ្រោះ​ជាតិ​បាន​ទេ ក្នុងថ្ងៃនេះ ដោយទូរស័ព្ទរបស់លោក ពុំមានអ្នកទទួល។ តែសម្រាប់លោក ផៃ ស៊ីផាន អ្នកនាំពាក្យរាជរដ្ឋាភិបាល ក៏បានបង្ហាញពីការគាំទ្រ តាមបណ្តាញព័ត៌មានសង្គមរបស់ខ្លួនថា ចំពោះវប្បធម៌សន្ទា នៃមេដឹកនាំកំពូលគណបក្ស​ទាំង​ពីរ ដែលអាចឈានទៅរក វប្បធម៌ក្នុងកិច្ចរួមរស់ជាមួយគ្នា ដើម្បីសន្តិភាព វឌ្ឍនភាពរបស់គ្រួសារតែមួយ របស់ខ្មែរ។

សូមបញ្ជាក់ថា យ៉ាងហោចណាស់មនុស្ស១៩ នាក់ ត្រូវបានសាលាដំបូងរាជធានីភ្នំពេញ ធ្វើការដោះលែង ឲ្យមាន​សេរីភាព​បាននៅក្រៅឃុំ។ ក្នុងនោះ មានស្រ្តីក្នុងរឿងដីធ្លី ចំនួន១១នាក់ និងព្រះសង្ឃបីអង្គ នឹងត្រូវបានដោះលែង ដោយ​គ្មាន​ទោសកំហុស។ ចំណែកសកម្មជនគណបក្សសង្គ្រោះជាតិ ចំនួន៥នាក់វិញ គ្រាន់តែដោះលែង ឲ្យនៅក្រៅឃុំ បណ្តោះ​អាសន្ន​ប៉ុណ្ណោះ ឯនីតិវិធីតុលាការ និងមានជាបន្តនាពេលក្រោយ ជាបន្តទៀត៕