ជាមួយនឹងការសម្រេចទទួលស្គាល់ លើសមាជិក គ.ជ.ប ថ្មីនេះ គណបក្សប្រជាជនកម្ពុជា បានកំណត់បេក្ខភាពម្នាក់ ក្នុង​ចំណោមបេក្ខភាព ទាំងបួនរូប ដែលខ្លួនគាំទ្រ មានម្នាក់ អាចជាបេក្ខភាព ប្រធាន គ.ជ.ប ថ្មី ដែលមកពីគណបក្ស​ប្រជាជន​កម្ពុជា។ ឯបេក្ខភាព មកពីខាងសង្គមស៊ីវិល លោក ហង្ស ពុទ្ធា ដែលគណបក្សទាំងពីរ បានឯកភាពគ្នានោះ មិន​បាន​បញ្ជាក់​ថា ជាប្រធានឡើយ។

តាមលិខិតផ្លូវការមួយ របស់គណបក្សប្រជាជនកម្ពុជា ដែលចុះហត្ថលេខា ដោយលោក ហ៊ុន សែន ជំនួសមុខ​ឲ្យ​គណអចិន្ត្រិយ៍ (អនុប្រធានគណបក្ស) និងជានាយករដ្ឋមន្រ្តីកម្ពុជា បានគាំទ្រ ទៅលើបេក្ខភាពចំនួន៤រូប របស់​គណបក្ស​ខ្លួន ឲ្យធ្វើជាសមាជិក គ.ជ.ប ថ្មីនោះ ពីក្នុងចំណោមបេក្ខជន ទាំង២៤រូប ដែលបានដាក់ពាក្យ និងជាប់ជាផ្លូវការ ដែល​សម្រេច​ដោយរដ្ឋសភា កាលពីថ្ងៃទី៧ ខែមេសា ម្សិលម៉ិញនេះ។ លោកនាយករដ្ឋមន្រ្តី បានសម្រេចជ្រើសរើសលោក ស៊ិក ប៊ុនហុក ដែលបានសរសេរក្នុងលិខិតនោះថា ជាប្រធាន ឯលោក មាន សទិ - លោក ឌុច សុន និងលោក ឯម សូផាត ជា​សមាជិក។

ឯក្នុងលិខិត របស់គណបក្សសង្គ្រោះជាតិ ដែលមានលោក សម សង្ស៊ី ជាអ្នកចុះហត្ថលេខាវិញ បានធ្វើការជ្រើសរើស លោក គួយ ប៊ុនរឿន, លោក រ៉ុង ឈុន, លោក ហ៊ីង ធីឫទ្ធិ និងអ្នកស្រី តែ ម៉ានីរ៉ុង ជាសមាជិកថ្មី របស់ គ.ជ.ប ដែរ តែ​មិន​បានបញ្ជាក់ ថា បេក្ខភាពទាំង៤រូបនេះ ឬបេក្ខភាពម្នាក់ មកពីសង្គមស៊ីវិល លោក ហង្ស ពុទ្ធា នោះ ជាប្រធាន ឬ​អនុប្រធាន​ឡើយ។

ដោយឡែក សមាជិកទី៩ ដែលចេញមកពីសង្គមស៊ីវិល ក្រោមការឯកភាពគ្នា រវាងគណបក្សប្រជាជនកម្ពុជា និង​គណបក្ស​សង្គ្រោះជាតិនោះ គឺបានសម្រេចយក នាយកប្រតិបត្តិគណៈកម្មាធិការអព្យាក្រឹត និងយុត្តិធម៌ ដើម្បី​ការ​បោះឆ្នោត ដោយសេរី និងត្រឹមត្រូវនៅកម្ពុជា (NICFEC) លោក ហង្ស ពុទ្ធា។ គណបក្សទាំងពីរក៏បាន បានផ្ញើរលិខិតនេះ ទៅ​កាន់​រដ្ឋសភារួចរាល់ហើយ នាព្រឹកនេះ ដើម្បីស្នើការគាំទ្រ និងបោះឆ្នោត ផ្តល់សេចក្តីទុកចិត្ត ទៅលើសមាសភាព ប្រធាន អនុប្រធាន និងសមាជិកផ្សេងទៀត របស់ គ.ជ.ប នាថ្ងៃទី១៣ ខែមេសាខាងមុខ។

ទស្សនាវដ្តីមនោរម្យ.អាំងហ្វូ មិនអាចសុំការបញ្ជាក់បន្ថែម ពីមន្រ្តីនាំពាក្យនៃគណបក្សទាំងពីរបានឡើយ ដោយគ្មាន​អ្នក​ទទួលទូរស័ព្ទ។ ឯអ្នកនាំពាក្យរដ្ឋសភា លោក ឈាង វុន មិនអាចភ្ជាប់ទំនាក់ទំនងបាន។

សូមអានលិខិតទាំងអស់ខាងក្រោម៖