ជារឿងមួយកម្រណាស់ នៅក្នុងប្រទេសឥណ្ឌា ព្រោះបើសូម្បី នៅក្នុងពេលកើតហេតុ ក៏គ្មាននរណាម្នាក់ មកជួយ​នាង​ឡើយ។ ហេតុការណ៍ បានកើតឡើង កាលពីថ្ងៃសុក្រសប្ដាហ៍មុន វេលាម៉ោង២និង៣០នាទីរសៀល នៅក្បែរស្ថានីយ៍​អាយស្ម័យាន Vile Parle ស្ថិតនៅជាយក្រុង ប៊ុមបៃ យុវតី ប្រាដនីយ៉ា ម៉ាន់ដារ (Pradnya Mandhare) អាយុ ២០ឆ្នាំ កំពុង​រង់ចាំរថភ្លើងរបស់នាង ដើម្បីជិះត្រឡប់ទៅផ្ទះ បន្ទាប់ពីបានត្រឡប់ពីសាកលវិទ្យាល័យ ដែលនាងបានរៀន អស់​ពេញ​មួយព្រឹក។

រំពេចនោះ បុរសម្នាក់ ដែលទំនងជាស្រវឹង បានព្យាយាមមកកេះកៀវ រាវស្ទាប និងធ្វើសកម្មភាពមួយចំនួនទៀត ទៅ​លើ​យុវតីជានិស្សិត។ នាង ម៉ាន់ដារ បានថ្លែងឡើង ប្រាប់សារព័ត៌មាន «Emirates24.7» ថា៖ «មើលទៅគាត់ណ្នឹង ទំនងជា​ស្រវឹងពិតហើយ។ គាត់បានមកជិតខ្ញុំ រួចបានរាវស្ទាបខ្ញុំ។»

ដំបូងឡើយ យុវតីគ្រាន់តែចង់រើបម្រះ ខ្លួននាងចេញពីក្រញ៉ាំ ជនល្មោភកាមប៉ុណ្ណោះ។ ប៉ុន្តែបុរសនោះ នៅតែព្យាយាម​ចាប់​នាងទៀត។ យុវតី ប្រាដនីយ៉ា ម៉ាន់ដារ បានដកដង្ហើមយកកម្លាំង ហើយបានបញ្ចេញក្បាច់គុន ដ៏ស្វាហាប់ វាយទៅ​លើជនអាប្រិយ ដោយប្រើកាបូបរបស់នាង ជាអាវុធ។

នាងបានរៀបរាប់ទៀតថា៖ «អាគាត់នេះ ចង់វ៉ៃខ្ញុំ តែខ្ញុំមានកម្លាំងជាង ព្រោះគាត់ស្រវឹង។ មនុស្សនេះ គគ្រិចខ្លាំងណាស់ ខ្ញុំអត់ចង់ប៉ះគាត់សូម្បីបន្ដិច។» ប៉ុន្តែនាងបានបញ្ជាក់ថា នាងចាំបាច់ ត្រូវបោចសក់ក្បាល និងប្រើកម្លាំង​ធាតុ​របស់នាង អូសជននេះ រហូតដល់ស្នងការនគរបាល ដែលស្ថិតនៅមិនឆ្ងាយប៉ុន្មានពីទីនោះ។

នៅជុំវិញនាង មានមនុស្សប្រមាណជា១០នាក់ ដែលកំពុងភ្លឹកមើលឈុតឆាក ទាត់ធាក់ រវាងនាង និងបុរសល្មោភ​កាម។ ប៉ុន្តែគ្មាននរណាម្នាក់ ចូលមកជួយយកអាសារនាងឡើយ។ រីឯភ្នាក់ងារនគរបាលវិញ ក៏សម្ដែងការភ្ញាក់ផ្អើល ដែល​បាន​ឃើញយុវតីម្នាក់ ចាប់បុរសម្នាក់ បោះចូលមកក្នុង ទីស្នាក់ការរបស់ខ្លួន ដូច្នេះដែរ។ ពួកគេបាន​ទទួលពាក្យ​បណ្ដឹង​របស់នាង ហើយយកបុរសប្រមឹក ដាក់ចូលទៅក្នុង បន្ទប់ចំរឹងដែក ឲ្យស្នាក់នៅជាបណ្ដោះអាសន្ន។

បន្ទាប់ពីព្រឹត្តិការណ៍នេះហើយ កេរ្តិ៍ឈ្មោះរបស់យុវតី ប្រាដនីយ៉ា ម៉ាន់ដារ បានល្បីរន្ទឺសុះសាយ ពេញប្រទេស ឥណ្ឌា។ នៅចំពោះប្រព័ន្ធច្បាប់ ដែលបានអនុវត្ត ប្រកបដោយភាពយឺតយ៉ាវ និងចំពោះប្រពៃណី ដែលស្រីមានភាពខ្មាស​អៀន​ច្រើន​នោះ និស្សិតវ័យក្មេង បានពន្យល់ថា៖ «នារីទាំងអស់ ត្រូវតែតស៊ូ នៅក្នុងស្ថានភាពដូចគ្នានេះ ហើយមិនត្រូវស្ងាត់​មាត់នោះទេ»៕

ជនសង្ស័យ ថាល្មោភកាមម្នាក់នេះ ក៏បានល្បីជាមួយយុវតីដែរ៖