បាត់ឆ្កែច្រើនថ្ងៃ... ដល់ពេលរកឃើញ យំព្រោះក្លាយជា«ឆ្កែខ្វៃ»
- ដោយ: កេសរ កូល អត្ថបទ៖ កេសរកូល ([email protected]) - ភ្នំពេញ ថ្ងៃទី០២ មេសា ២០១៤
- កែប្រែចុងក្រោយ: April 02, 2015
- ប្រធានបទ: ជីវិត
- អត្ថបទ: មានបញ្ហា?
- មតិ-យោបល់
-
មិនមែនគ្រប់ជនជាតិវៀតណាម សុទ្ធតែចូលចិត្តបរិភោគ សាច់ឆ្កែទាំងអស់នោះទេ។ ដូចនៅក្នុងហេតុការណ៍នេះ ដែលយ៉ាងហោចណាស់ ក៏មានក្មេងស្រីតូចម្នាក់ រស់នៅក្នុងតំបន់ខាងជើង នៃប្រទេសវៀតណាម ដែលស្រឡាញ់សត្វឆ្កែរបស់ខ្លួន រហូតនាងស្រែកយំយ៉ាងខ្លាំង បន្ទាប់ពីបានឃើញសព របស់មិត្តសម្លាញ់«ស្លាប់រស់»របស់នាង ត្រូវបានគេយកទៅ«ខ្វៃ»។
ផ្លាវ័រ (Flower) ជាឈ្មោះរបស់សត្វឆ្កែ ដែលមានអាយុ៣ឆ្នាំ ហើយបានរស់នៅអស់រយៈពេលច្រើនឆ្នាំ ជាមួយនឹងកុមារីម្នាក់នេះ បើសូម្បីតែពេលលេង គេង ឬពេលញ៉ាំបាយក៏ដោយ។ ប៉ុន្តែការទាក់ពង្រាត់ យកវាចេញទៅ ហាក់ដូចបានមកបំបែកបេះដូង របស់ម្ចាស់ស្រីតូច ធ្វើឲ្យមានទុក្ខព្រួយឥតល្ហែសោះឡើយ។ នាងតូច ថែមទាំងបានបន់ស្រន់មេឃដី ក្នុងរយៈពេលនៃការបាត់ខ្លួនឆ្កែ ឲ្យធ្វើយ៉ាងណា រកឃើញឆ្កែរបស់នាងមកវិញ។
ប៉ុន្មានសប្ដាហ៍ក្រោយមក ដំណឹងពី ផ្លាវ័រ បានធ្លាក់មកឲ្យម្ចាស់តូចដឹង ប៉ុន្តែវាបានក្លាយជារឿង ដ៏គួរឲ្យរន្ធត់បំផុត នៅក្នុងជីវិតរបស់នាង។ នៅពេលដែលនាង បានទៅផ្សារជាមួយនឹងម្ដាយ នាងបានឃើញឆ្កែមួយក្បាល ដេកស្ងៀមនៅលើចង្អេរ៖ នាងតូចបានស្គាល់ភ្លាម ថានេះ ពិតជាឆ្កែរបស់នាង ដែលបានរត់លេងជាមួយនាង តាំងពីបីឆ្នាំមកហើយ។ ប៉ុន្តែសត្វឆ្កែនេះ មិនត្រឹមតែដេកស្ងៀមទេ តែវាត្រូវបានសម្លាប់ រួចយកមកខ្វៃ ដើម្បីទុកលក់ ជាអាហាររបស់អ្នកចូលចិត្តបរិភោគ សាច់សត្វឆ្កែទៅហើយ។
ប្រទេសជាច្រើន នៅអាស៊ី បានយកឆ្កែមកបរិភោគ ហើយនៅប្រទេសខ្លះទៀត បានយកឆ្កែ មកធ្វើជាចំណីពិសេស នៅតាមភោជនីយដ្ឋាន នោះទៀត។ នៅក្នុងប្រទេសកម្ពុជា ភោជនីយដ្ឋានប្រភេទនេះ បានកើតឡើងយ៉ាងព្រោងព្រាត ហើយកំពុងធ្វើឲ្យបណ្ដាជនខ្មែរ ចូលទៅរកទទួលទាន មិនដែលដាច់។ ប៉ុន្តែសាច់សត្វឆ្កែទាំងនោះ មិនមែនត្រូវបានចិញ្ចឹម ដើម្បីទុកសម្លាប់ យកសាច់ ដូចត្រី មាន់ ទា ជ្រូក គោ ឬទិញពីម្ចាស់វានោះទេ តែច្រើនជាសត្វឆ្កែ ដែលត្រូវបានលួចទាក់ ដោយខុសច្បាប់ ចេញពីការថែរក្សា របស់ម្ចាស់ដើម។
រូបភាពរបស់ក្មេងស្រីតូច ជាតិវៀតណាម ដែលយកដៃ ទៅស្ទាបសពសត្វជាទីស្រឡាញ់របស់ខ្លួន ជាមួយនឹងទឹកភ្នែកហូររហាម ត្រូវបានបង្ហោះពេញអ៊ិនធើណែត និងជាពិសេសបណ្ដាញសង្គម ជំរុញឲ្យពិភពអ្នកស្នេហាសត្វ កាន់តែមានកម្លាំងឡើងថែមទៀត ក្នុងការជំរុញ ឲ្យមានការហាមឃាត់ ការសម្លាប់សត្វឆ្កែ៕