តាមសេចក្តីជូនដំណឹង របស់អគ្គលេខាធិការដ្ឋាន នៃរដ្ឋសភា លោក ឡេង ប៉េងឡុង បានលើកឡើងថា ដោយផ្អែកតាម​មាត្រា៥ និង៦ថ្មី នៃច្បាប់ ស្តីពីការរៀបចំ និងការប្រព្រឹត្តទៅ នៃ គ.ជ.ប និងដោយផ្អែកតាម ការសម្រេចរបស់​គណ​កម្មការ​អចិន្ត្រៃយ៍ នៃរដ្ឋសភា ក្នុងថ្ងៃទី២៧ ខែមីនា ឆ្នាំ២០១៥នេះ នឹងធ្វើការជ្រើសរើស បេក្ខជន ដែល​ត្រូវមកឈរ​ឈ្មោះ ជា​សមាជិក​របស់ គ.ជ.ប ថ្មី។

អគ្គលេខាធិការដ្ឋាន នៃរដ្ឋសភារូបនេះ បានបញ្ជាក់ក្នុងសេចក្តីជូនដំណឹងនោះថា ការទទួលពាក្យ របស់បេក្ខជននេះ ត្រូវ​បានធ្វើឡើង នាវិមានរដ្ឋសភា រៀងរាល់ថ្ងៃ រួមទាំងថ្ងៃសៅរ៍ និងថ្ងៃអាទិត្យ ហើយនឹងចាប់ទទួល ពាក្យពីថ្ងៃទី២៧ ខែ​មីនា ឆ្នាំ២០១៥នេះតទៅ ចាប់ពីម៉ោង ៧:០០ ដល់ម៉ោង ១១:៣០ រសៀលពីម៉ោង ១៤:០០ ដល់ម៉ោង១៧:៣០។

នាយកដ្ឋានគ្រប់គ្រងបុគ្គលិក នៃអគ្គនាយកដ្ឋាន រដ្ឋបាល និងហិរញ្ញវត្ថុ នៃអគ្គលេខាធិការដ្ឋាននៃរដ្ឋសភា និងបញ្ឃប់​ការទទួលចុះឈ្មោះ ជាបេក្ខជន សមាជិក គ.ជ.ប នេះនាថ្ងៃទី៦ ខែមេសា ឆ្នាំ២០១៥ខាងមុខនេះវេលាម៉ោង ១៧:៣០។

ជាមួយនឹងការបំពេញពាក្យ ចូលជាសមាជិក គ.ជ.បនេះ បេក្ខជនទាំងនោះ ក៏តម្រូវឲ្យមានការបញ្ជាក់ ពីសញ្ជាតិខ្មែរ​ពី​កំណើត និងមានសញ្ជាតិតែមួយផងដែរ។ ក្រៅពីនេះ នៅកម្រិតឲ្យបញ្ជាក់បន្ថែម នូវបញ្ហាចំណងសហព័ន្ធ ញាតិ​លោហិត និងញាតិព័ន្ធ។

បេក្ខជនដែលឈរឈ្មោះ ជាសមាជិក គ.ជ.ប នេះជាមនុស្ស ដែលមិនធ្លាប់មានទោស ដែលសម្រេចដោយតុលាការ មាន​កំរិតវប្បធម៌ ចាប់ពីថ្នាក់ឧត្តមសិក្សាឡើងទៅ និងត្រូវមានបទពិសោធ ការងារ យ៉ាងតិច១០ឆ្នាំ ដែលបញ្ជាក់ ដោយ​អង្គភាពសាមី (គណបក្សនយោបាយ)។

សូមអានសេចក្តីសម្រេច និងលិខិតពាក់ព័ន្ធនានា ដែលបានចុះផ្សាយ ក្នុងគេហទំព័ររបស់រដ្ឋសភា នារសៀល​ថ្ងៃ​ទី​២៧ ខែមីនា ឆ្នាំ២០១៥ នេះ៕