បុគ្គលិករោងចក្រដែលរងគ្រោះនឹងទឹកអាស៊ីត បានស្លាប់ហើយ!
- ដោយ: ឈូករ័ត្ន អត្ថបទ៖ ឈូករ័ត្ន ([email protected]) - យកការណ៍៖ ក. វិច្ចនី - បារីស ថ្ងៃទី ២១ មីនា ២០១៥
- កែប្រែចុងក្រោយ: March 21, 2015
- ប្រធានបទ: ឧក្រិដ្ឋកម្ម
- អត្ថបទ: មានបញ្ហា?
- មតិ-យោបល់
-
នៅពេល ដែលកំហឹងឆាបឆេះមួយឆាវ បានសម្លាប់ជីវិតមនុស្ស ទាំងបិទភ្នែកមិនជិត...
ដំណឹងដ៏សោកសៅ និងក្រៀមក្រំ បានធ្លាក់មកដល់ នៅរសៀលថ្ងៃសៅរ៍នេះ សម្រាប់ក្រុមគ្រួសារ របស់យុវតីរងគ្រោះនឹងទឹកអាស៊ីត។ បន្ទាប់ពីស្ថិតក្រោមការព្យាបាល ពីសំណាក់ក្រុមគ្រូពេទ្យ នៅមន្ទីរពេទ្យកាលម៉ែត្រ អស់រយៈពេល១៥ថ្ងៃកន្លងមក ស្ត្រីបុគ្គលិកសន្តិសុខ នៅរោងចក្រស៊ីនតាយ ទំនងជាបានប្រយុទ្ធយកឈ្នះ នឹងភាពចុកចាប់បំផុត នៅក្នុងជីវិតរបស់នាងបាន។ តែមច្ចុរាជមិនបានយល់ ពីការតស៊ូរបស់នាងឡើយ និងទីបំផុតទៅយុវតី មាស វ៉ាន់នី អាយុ ២០ឆ្នាំ បានទទួលមរណភាព នៅវេលាម៉ោង ២រសៀល ថ្ងៃទី ២១ ខែមីនាឆ្នាំ២០១៥ នេះ។
វិទ្យសម្លេងប្រជាធិបតេយ្យ (VOD) បានស្រង់សម្ដីរបស់លោក សោភ័ណ្ឌ ឡារី សិល្បករសម្ដែងមួយរូប ដែលបានទៅជួបយុវតី និងបានជួបជាមួយប្អូនស្រី របស់យុវតី មាស វន្នី នៅមួយថ្ងៃមុន មកបញ្ជាក់ថា ក្រុមគ្រូពេទ្យអះអាងថា បានវះកាត់ជនរងគ្រោះ រួចរាល់អស់ហើយ ហើយស្ថានភាពជំងឺធម្មតា តែស្ថិតនៅក្រោម ការតាមដានជាបន្តទៀត។
ទស្សនាវដ្ដីមនោរម្យ.អាំងហ្វូ មិនទាន់អាចទាក់ទងក្រុមគ្រួសារ និងគ្រូពេទ្យ ដើម្បីសាកសួរពីបញ្ហានេះ បាននៅឡើយ។ ប៉ុន្តែប្រភព ពីអ្នកស្និតនឹងគ្រួសារជនរងគ្រោះ បានឲ្យដឹងថា សពនារីរងគ្រោះ ត្រូវបានក្រុមគ្រួសារ យកទៅធ្វើបុណ្យ តាមប្រពៃណី នៅឯស្រុកកំណើត ក្នុងស្រុកក្រគរ ខេត្ត ពោធិ៍សាត់។
យុវតីរងគ្រោះ មាស វ៉ាន់នី ត្រូវបានស្ត្រីជាជនសង្ស័យ ស្រឿន នាន់ អាយុ ៣៨ឆ្នាំ ជះទឹកអាស៊ីតស្រោចពេញក្បាល មុខ នឹងដងខ្លួនមួយភាគធំ ខណៈនាងកំពុងធ្វើដំណើរ ទៅរោងចក្រកាលពីម៉ោង ៦ និង១០នាទីព្រឹកព្រលឹម ថ្ងៃទី៦ ខែមីនា ឆ្នាំ២០១៥ នាមុខផ្សារកាណាស៊ីធី ស្ថិតក្នុងសង្កាត់ចោមចៅ ខណ្ឌពោធិ៍សែនជ័យ។ នេះបើតាមអះអាង របស់ក្រុមសមត្ថកិច្ចនគរបាល ខណ្ឌពោធិ៍សែនជ័យ ដែលបានចាប់ខ្លួនជនសង្ស័យ នៅបន្តិចក្រោយ និងបានសង្ស័យថា នេះជាករណីស្នេហាត្រីកោណ។
ប៉ុន្តែការសង្ស័យរបស់សមត្ថកិច្ច ដែលត្រូវបានប្រព័ន្ធផ្សព្វផ្សាយក្នុងស្រុកជាច្រើន យកមករាយការណ៍បន្ត ត្រូវបានបដិសេធដោយបងប្រុស របស់ជនរងគ្រោះ។ កាលពីថ្ងៃទី ១១ ខែមីនា ឆ្នាំ២០១៥កន្លងទៅនេះ បងប្រុសរូបនោះ បានថ្លែងប្រាប់ ទស្សនាវដ្ដីមនោរម្យ.អាំងហ្វូថា ប្អូនស្រីរបស់លោក មិនមានទំនាក់ទំនងស្នេហា ស្អិតរមួតអ្វី ជាមួយបុរសឈ្មោះ ជុន ធឿន ជាសន្តិសុខធ្វើការ នៅរោងចក្រ ស៊ិនតាយ ជាមួយគ្នា ដូចការដែលគេនិយាយតៗគ្នាឡើយ ពួកគេគ្រាន់លេងសើច រាប់អានគ្នាធម្មតាតែប៉ុណ្ណោះ។ លោកបានថ្លែងថា៖ «អត់ទេ គ្រាន់តែទំនាក់ទំនងគ្នា ធ្វើជាមិត្តភក្តិ បងប្អូនអីហ្នឹងណា ហើយបុរសហ្នឹងមានប្រពន្ធកូនបី»។
បើតាមបងប្រុសដដែល បានអះអាងប្រាប់បន្ថែម ពីស្ថានភាពសុខភាពរបស់ប្អូនស្រីលោក នៅពេលនោះថា នាងអាចដើរបាន និងអង្គុយបានខ្លះៗហើយ។ ផ្ទៃមុខ និងដងខ្លួនរបស់នាង ត្រូវបានរលេះរលួយ ដោយសារតែឥទ្ធិពលទឹកអាស៊ីត។ តែអ្វីដែលគួរឱ្យសោកស្តាយបំផុតនោះ គឺភ្នែករបស់នាងម្ខាង ត្រូវបានពិការទាំងស្រុង និងភ្នែកម្ខាងទៀត មើលឃើញ តែមិនសូវច្បាស់៕
ចំពោះស្ត្រីសង្ស័យ ជាជនដៃដល់វិញ ត្រូវបានតុលាការចេញដីកាឃុំខ្លួន ដាក់ពន្ធនាគារ កាលពីល្ងាចថ្ងៃទី ១៩ ខែមីនា ដោយចោទប្រកាន់ពី «បទប៉ុនប៉ងមនុស្សឃាត»។ ប៉ុន្តែនៅពេល ដែលជនរងគ្រោះបានស្លាប់ បាត់បង់ជីវិតដូច្នេះ សួរថា តើតុលាការនឹងត្រូវផ្លាស់ប្ដូរ ការចោទប្រកាន់របស់ខ្លួន ទៅជាបទ«មនុស្សឃាត»ឬទេ?
» រូបភាពចុងក្រោយរបស់យុវតីរងគ្រោះ បន្ទាប់ពីវះកាត់រួច និងក្រោយពេលនាងស្លាប់៖
