ប្រភពពត័ត៌មាន បានឲ្យដឹងថា ហេតុការណ៍រុះរើ ដោយមិនមានហេតុផល ច្បាស់លាស់នេះ បានធ្វើឡើង នៅក្នុង​សហគមន៍​អូដំរី សង្កាត់ស្ទឹងហៅ ខណ្ឌអូត្រែស ខេត្តព្រះសីហនុ។ នៅមិនទាន់មានការបញ្ឈប់ណាមួយ នៅឡើយទេ បើ​តាម​ការ​បញ្ជាក់ របស់ពលរដ្ឋនៅទីនោះផ្ទាល់ ដោយហេតុថា ម្ចាស់ផ្ទះទាំងអស់ មិននៅផ្ទះ និងចេញទៅធ្វើការងារ​អស់ ហើយ​មន្រ្តីទាំងនោះឆ្លៀតពេល អ្នកភូមិមិននៅ ក៏ធ្វើសកម្មភាពតែម្តង។ ប្រភពបានបន្តថា ទោះបីជាអ្នកភូមិខ្លះ បានដឹង​ពី​ការ​រុះរើ​នេះ ហើយបានចេញ ពីធ្វើការមកវិញក៏ដោយ ក៏មិនអាចចូលទៅកាន់ ផ្ទះសម្បែងរបស់ខ្លួន បានដែរ ព្រោះ​ក្រុម​អ្នក​រុះរើ របស់អាជ្ញាធរទាំងនោះ បានបិទផ្លូវចេញចូល ក្នុងសហគមន៍ជិតឈឹង។

លោក សេង ឌីណា ជាម្ចាស់ផ្ទះមួយ ក្នុងចំណោមម្ចាស់ផ្ទះ ទាំង១៤៩គ្រួសារ ដែលរងគ្រោះ ក្នុងសហគមន៍អូដំរី បានឲ្យ​ទស្សនាវដ្តីមនោរម្យ.អាំងហ្វូ ដឹងនៅព្រឹក ថ្ងៃទី១៩ ខែមិនា ឆ្នាំ២០១៥នេះថា ប៉ូលិសទាំងនោះ ប្រដាប់ដោយអាវុធ មាន​គ្នា​ប្រមាណ ជា១០០នាក់ ដែលដាក់ពង្រាយ ពីមួយកន្លែង ទៅមួយកន្លែង ដែលមានផ្ទះពលរដ្ឋ ចាប់ពីម៉ោង៨ព្រឹក។ លោក​បន្តថា អ្វីដែលលោកបានឃើញគឺ ផ្ទះជាង២០ខ្នង បានកំទេចអស់ទៅហើយ ក្នុងរយៈពេល មិនបានបីម៉ោង​នោះ​ទេ។ លោក ឌីណា បានបន្តថា អ្នករស់នៅសហគមនេះ ហាក់គ្មានសិទ្ធ បញ្ចេញព័ត៌មានណាមួយសោះ ចេញទៅខាង​ក្រៅ សូម្បីតែពេលមានជម្លោះដីធ្លី ឡើងដល់តុលាកាក៏ដោយ ក៏ពលរដ្ឋ នៅតែជាអ្នកចាញ់រហូត។ ស្រាប់តែមកដល់​ពេល​នេះ មិនដឹងមានបញ្ជាពីខាងណា ដើម្បីមកកំទេចផ្ទះពលរដ្ឋ ឆៅៗតែម្ដង។

តំណាងសហគមអូដំរីលោក ម៉ន ស៊ីណា បានឲ្យទស្សនាវដ្តីដឹងដែរថា លោកមិនបានទទួលព័ត៌មានអ្វី បន្តិចសោះ ស្រាប់​តែនៅសុខៗ មានការរុះរើ ផ្ទះសំបែងដោយគ្មានប្រាប់ ពីហេតុផលបែបនេះ។ លោកបន្តថា នៅក្នុងសកម្មភាពនេះ មិន​អាច​មានអ្នកណាម្នាក់ ចូលទៅទីនោះបានទេ ព្រោះមានការយាមកាម មិនឲ្យអ្នកភូមិចូល។ ទោះ​ជាមន្រ្តីសង្គម​ស៊ីវិល ត្រូវ​បាន​ប៉ូលិសហាមមិនឲ្យទៅក្បែរដែរ។ តំណាងអ្នកភូមិ បានត្រឹមតែផ្តល់ព័ត៌មាននេះ ទៅសមាជិករបស់ខ្លួន ដែល​មិន​នៅ​ផ្ទះ​ប៉ុណ្ណោះ។

តំណាងសហគមន៍អូដំរីដដែល បានបង្ហើបថា លោកមិនដឹងពីហេតុផលច្បាស់លាស់ នៅក្នុងការឈូសឆាយនេះទេ គ្រាន់តែលោកទទួលបានដំណឹងមួយថា ជាបញ្ជារបស់លោកជំទាវ ហ៊ឹម សុវណ្ណារី ជាម្ចាស់ក្រុមហ៊ុនមួយ ធ្លាប់មាន​ជម្លោះជាមួយអ្នកភូមិ ឡើងដល់តុលាការ កាលពីឆ្នាំ២០១០។ អ្នកភូមិម្នាក់ សុំមិនបញ្ចេញឈ្មោះម្នាក់ បានឲ្យដឹងថា បន្ទាប់​ពីមានរឿង ជាមួយជំទាវនោះមក អ្នកភូមិក្នុងសហគមន៍ ក៏មានបញ្ហាជាមួយ នាយរងក្រសួងបរិស្ថានខេត្ត ដែល​ជា​អតីត រងសង្កាត់នៅក្នុងខេត្តព្រះសីហនុនេះដែរ។

ទស្សនាវដ្តីមិនអាចទាក់ទង សុំការបកស្រាយ ពីបញ្ហាដែលក្រុមកងកម្លាំងទាំងនោះ បានរុះរើផ្ទះពលរដ្ឋនេះ ពីមេ​បញ្ជាការ​កងរាជអវុធហត្ថ ខេត្តព្រះសីហនុបានទេ នៅពេលភ្លាមៗនេះ។ ដោយឡែកទស្សនាវដ្តី បានព្យាយាមទាក់ទង ទៅ​មន្ត្រី​ឃ្លាំ​មើល​សិទ្ធមនុស្ស ប្រចាំនៅខេត្តព្រះសីហនុដែរ តែទូរស័ព្ទរបស់លោក គ្មានអ្នកទទួល។ ជុំវិញហេតុការណ៍ និង​ព័ត៌មាន​បន្ថែម មាននៅអត្ថបទលើកក្រោយ៕