ជាថ្មីម្ដងទៀត លោកនាយករដ្ឋមន្រ្តី ហ៊ុន សែន បានស្នើនូវវិធានការច្បាប់ លោក លោក កឹម សុខា អនុប្រធាន​ទីមួយ​នៃ​រដ្ឋសភាអាណត្តិទីប្រាំ និងជាអនុប្រធាននៃគណបក្សសង្គ្រោះជាតិ ដោយយោងទៅលើការថ្លែង របស់មេដឹកនាំប្រឆាំង​រូបនេះ ដែលបានសារភាពថា មានបំណងផ្ដួលរំលំលោក និងរដ្ឋាភិបាលរបសលោក។

នាព្រឹកថ្ងៃទី១៨ ខែមីនា ឆ្នាំ២០១៥ នេះ នាពិធីបើកការដ្ឋាន សាងសង់ផ្លូវជាតិលេខ៥៨ ខេត្តបន្ទាយមានជ័យ លោក ហ៊ុន សែន នាយករដ្ឋមន្ត្រីបីទសវត្សន៍ របស់កម្ពុជា​ បានថ្លែងឡើងថា៖ «ឥឡូវ ស្រាប់តែសុខៗ វាចេញរឿងមកហើយ។ ខ្ញុំព្រះករុណាខ្ញុំ បាននិយាយហើយថា ការប៉ុនប៉ងផ្តួលរំលំ រដ្ឋាភិបាលស្របច្បាប់ បន្ទាប់ពីការបោះឆ្នោត។ ឥឡូវបែរ​ជា​មាន អ្នកចេញមកសារភាពថា គេបានប្រឹងប្រែងផ្តួលរាជរដ្ឋាភិបាល ផ្តួលគណបក្សប្រជាជន តែមិនបានសម្រេច។ គេ​បរាជ័យ សុំទោសប្រជាពលរដ្ឋនៅអាមេរិក។ អញ្ចឹងយើងចាត់ការ តាមផ្លូវច្បាប់បែបណា?។ (…) នេះបើចោរសារភាព​ហើយនេះ មេចោរសារភាពហើយ តើចាត់ការផ្លូវច្បាប់បែបណា?។ (…) អីចឹង អ្នកខូចខាតទ្រព្យសម្បត្តិទាំងប៉ុន្មាន ត្រូវ​រក​តែម្នាក់នឹងទៅ ចាប់យកមក ទារលុយទៅ អានឹងត្រូវហើយ អត់មានអីខុសទេ។ អាបាតដៃទី៣ក៏មាន អាបាតដៃទី២​ផ្ទាល់នឹង បានសារភាព នៅឯឡុងប៊ិច។ ឥឡូវ គិតយ៉ាងម៉េច?។»

លោក កឹម សុខា បានថ្លែងជាសាធារណៈ ទៅកាន់សកម្មជនគណបក្សរបស់ខ្លួន កាលពីថ្ងៃទី១៣ ខែមីនា ឆ្នាំ២០១៥ នាទីក្រុងទីក្រុងឡុងបិច សហរដ្ឋអាមេរិក ថា ដៃគូប្រកួត ក្នុងគណបក្សនយោបាយរបស់លោក មានភាពរឹងមាំ និងមាន​បង្អែកក្រាស់ ដែលធ្វើឲ្យលោកពិបាកក្នុងការផ្តួលរំលំ។

មេដឹកនាំបក្សប្រឆាំង និងជាអនុប្រធានទីមួយ នៃរដ្ឋសភាអាណត្តិទីប្រាំរូបនេះ បានថ្លែងឡើងថា៖ «យើងចង់ឲ្យមានការ​ផ្លាស់ប្តូរ ឲ្យបានឆាប់ ចង់ឲ្យមានការផ្លាស់ប្តូរ ឲ្យបានល្អ ឲ្យបានលឿន ឲ្យបានពេញលេញ។ ខ្ញុំសូមទោសបងប្អូន ដែល​ខ្ញុំមិនអាចដឹកនាំ ការផ្លាស់ប្តូរនេះបាន ១០០% ភ្លាម។ (…) ក្នុងនាមខ្ញុំ ជាអ្នកនយោបាយ ក្នុងនាមខ្ញុំជាអ្នកដឹកនាំ ខ្ញុំ​ហ៊ាន​សារភាព ចំពោះមុខប្រជារាស្ត្រ។ ហើយបងប្អូនជនរួមជាតិទាំងអស់ ដែលចង់ដូរ យើងខ្ញុំក៏ចង់ដូរដែរ។ តែយើងខ្ញុំមិន​អាច​ធ្វើបានទាំងអស់ទេ ហើយខ្ញុំសូមអំពាវនាវ ក្រែងមាននរណាម្នាក់អាចធ្វើបាន។ ពីព្រោះយើងខ្ញុំតស៊ូយូរហើយ ហើយ​ដំណាក់កាលនេះ ទោះបីយើងដូរមិនបានទាំងអស់ក៏ដោយ គឺយើងដូរបានខ្លះ។ (…) ក្រោយការបោះឆ្នោត យើង​ធ្វើការ​តស៊ូនយោបាយ ដោយអហិង្សា ប្រើកម្លាំងមហាជន ប៉ុន្តែមិនសំរេចបានជោគជ័យ។ (…) ហើយគណបក្ស​សង្គ្រោះ​ជាតិ មិនធ្វើបដិវត្ត ដែលជាការបង្ហូរឈាមរវាងខ្មែរ និងខ្មែរនោះឡើយ។»

ក្រោយការបោះឆ្នោត ជ្រើសតាំងតំណាងរាស្ត្រឆ្នាំ២០១៣ បាតុកម្មមហាជន ដឹកនាំដោយគណបក្សសង្គ្រោះជាតិ បាន​កើត​ឡើងជាហូហែរ។ អំឡុងពេលនោះ លោកនាយករដ្ឋមន្រ្តី បានបង្ហាញនូវការមិនពេញចិត្ត ជាមួយ​នឹងការដឹកនាំ​ធ្វើ​បាតុកម្មនេះ ហើយលោកក៏បានព្រលយ នូវពាក្យព្រមានមួយថា បើនៅតែបន្តធ្វើបាតុកម្មបែបនេះ សូមឲ្យប្រយ័ត្ន​នូវ​បាត​ដៃទីបី។ ប៉ុន្តែក្នុងពីធីបើកការដ្ឋាន សាងសង់ផ្លូវជាតិលេខ៥៨ ក្នុងថ្ងៃនេះ នៅខេត្តបន្ទាយមានជ័យ លោក ហ៊ុន សែន បានរុញច្រានក្រុមបាតដៃទីបីនេះ ទៅលើលោក កឹម សុខា ថាជាអ្នកបង្កើតឡើង។ លោកនាយករដ្ឋមន្ត្រី បាន​បញ្ជាក់​ដូច្នេះថា៖ «អាបាតដៃទី៣ បានសារភាព នៅទីក្រុងឡុងប៊ិចហើយ។ ឥឡូវគិតយ៉ាងម៉េច?។ ការខូចប៉ុន្មាន ស្លាប់​មនុស្ស មេខ្លោងនៅហ្នឹង! តើគេបានសារភាព ខ្លួនគេមិនចាំបាច់អ្នកណាទេ?»

មិនអាចទាក់ទងលោក កឹម សុខា ដើម្បីធ្វើប្រតិកម្ម ទៅនឹងចំណាត់ការរបស់លោក ហ៊ុន សែន ចំពោះរូបលោក​បាន​នៅ​ឡើយ ក្នុងពេលនេះ។ ប៉ុន្តែលោក យ៉ែម បុញ្ញឫទ្ធិ មន្ត្រី​នាំ​ពាក្យ​គណបក្ស​សង្គ្រោះ​ជាតិ ត្រូវបានស្រង់សម្ដីដោយ វិទ្យុ​អាស៊ី​សេរី បានបញ្ជាក់ថា លោក ហ៊ុន សែន ចង់​ឲ្យ​មហាជន​យល់​ច្រឡំ​ទៅ​វិញ។ លោក បុញ្ញាឫទ្ធិ បាននិយាយថា៖ «ដូច​​ខ្ញុំ​បញ្ជាក់​ម្ដង​ហើយ​ម្ដង​ទៀត ឯកឧត្ដម សម រង្ស៊ី និង​ឯកឧត្ដម កឹម សុខា យើង​កំណត់​ក្នុង​នាម​គណបក្ស​យក​គោល​ការណ៍​​មួយ ដោយ​ការ​ផ្លាស់ប្ដូរ​ដោយ​សន្តិវិធី និង​អហិង្សា តាម​រយៈ​ការ​បោះ​ឆ្នោត​ដោយ​យុត្តិធម៌»។

សូមតាមដានការថ្លែង របស់លោក កឹម សុខា នៅទីក្រុងឡុងប៊ិច សហរដ្ឋអាមេរិក ដូចតទៅ៖