អ្នកនាំពាក្យក្រសួងមហាផ្ទៃ នៃប្រទេសទូនេស៊ី (ទ្វីបអាហ្វ្រិកខាងជើង) លោក មហាមេដ អាលីអារ៉ូយ (Mohamed Ali Aroui) បានថ្លែងអះអាង តាមវិទ្យុមួយថា៖ «ការវាយប្រហារមួយ បានធ្វើទៅលើ សារមន្ទីរជាតិ បារដូ ដោយភេវជន​ពីរ​នាក់ ឬអាចច្រើនជាងនេះ ប្រដាប់ដោយអាវុធ អាកាស្វ័យប្រវត្តិ»។ សារមន្ទីរជាតិ បារដូ ស្ថិតនៅមិនឆ្ងាយប៉ុន្មាន ពី​អាគារ​រដ្ឋសភា​ជាតិ នៃប្រទេសទូនេស៊ី។

លោក អាលីអារ៉ូយ បានរាយការណ៍ទៀតថា៖ «មានជនរងគ្រោះ ដល់ជីវិត ៨នាក់ ក្នុងនោះ ៧នាក់ជាជនបរទេស និង​ម្នាក់​ជាជនជាតិទូនេស៊ី»។

បើតាមអ្នកនាំពាក្យដដែល បានឲ្យដឹងថា ទេសចរណ៍ច្រើនរយនាក់ កំពុងស្ថិតនៅក្នុងសារមន្ទីរ នៅមុខពេលការ​វាយ​ប្រហារ បានកើតឡើង។ ប៉ុន្តែទេសចរណ៍មួយភាគធំ ត្រូវបានជម្លៀសចេញ។ លោកមិនបានថ្លែងអះអាង ដូចប្រព័ន្ធ​ផ្សព្វផ្សាយជាច្រើន ដែលរាយការណ៍ថា នៅមានចំណាប់ខ្មាំង កំពុងរងគ្រោះនៅឡើយ នៅក្នុងហេតុការណ៍នេះ។ លោក​គ្រាន់តែបញ្ជាក់ថា៖ «មានព័ត៌មានបញ្ជាក់ថា នៅមានទេសចរណ៍ជាច្រើនទៀត នៅក្នុងសារមន្ទីរនៅឡើយ»។

លោក អាលីអារ៉ូយ បានបន្ថែមទៀតថា៖ «កងកម្លាំងប្រឆាំងភេវរកម្ម បានចូលទៅក្នុងសារមន្ទីរ ហើយសង្កាត់ទាំងមូល នៅក្នុង​រដ្ឋធានី ត្រូវបានហ៊ំព័ទ្ធ»។

ប្រធានាធិបតីរបស់ប្រទេសទូនេស៊ី លោក ប៊េជី កាអីដ អេសេប៊ី (Béji Caïd Essebsi) នឹងថ្លែងទៅកាន់ប្រជាជាតិទូនេស៊ី ក្នុងពេលខាងមុខ។ នេះបើតាមលោក មូអេស ស៊ីនូយ៍ (Moez Sinaoui) អ្នកនាំពាក្យ របស់វិមានប្រធានាធិបតី។ ដោយ​ឡែក នាយករដ្ឋមន្ត្រីទូនេស៊ី លោក អាប៊ីប អេស៊ីដ (Habib Essid) បានជួបប្រជុំជាបន្ទាន់មួយ ជាមួយរដ្ឋមន្ត្រីមហាផ្ទៃ និងរដ្ឋមន្ត្រីការពារជាតិ។

បើតាមសាក្សីនៅផ្ទាល់កន្លែង បានឲ្យដឹងថា កងកម្លាំងប្រដាប់អាវុធ របស់ប្រទេស ត្រូវបានបញ្ជូនយ៉ាងសន្ធឹកសន្ធាប់ ទៅកាន់តំបន់នោះ។

ខណៈពេល មានការវាយប្រហារនេះ គណកម្មការធិការរដ្ឋសភាមួយ ដែលកំពុងជួបប្រជុំក្នុងរដ្ឋសភាជាតិ បានផ្អាក​ការ​ប្រជុំរបស់ពួកគេភ្លាមៗ ហើយក្រុមតំណាងរាស្ត្រទាំងអស់ បានទទួលបញ្ជាឲ្យមកជួបជុំគ្នា នៅក្នុងបន្ទប់កណ្ដាលធំ របស់​រដ្ឋសភា។

ប្រទេសទូនេស៊ី ត្រូវប្រឈមនឹងចលនា ភេវរនិយមប្រដាប់អាវុធមួយ បន្ទាប់ពីប្រទេសនេះ បានធ្វើបដិវត្តអារ៉ាប់មុនគេ នៅខែមករា ឆ្នាំ២០១១។ រហូតមកដល់ពេលនេះ កម្លាំងនគរបាល និងទាហានទូនេស៊ី ច្រើនជាង៦០នាក់ ត្រូវបាន​សម្លាប់ នៅពេលជួបប្រយុទ្ធ ជាមួយនឹងក្រុមភេវរនិយម អាល់កៃដា (Al-Qaida) ដែលកំពុងមានសកម្មភាពយ៉ាងខ្លាំងក្លា ក្បែរនឹងព្រំដែននៃប្រទេសអាហ្សេរី៕

រូបភាពដំបូងគេ ដែលទូរទស្សន៍បារាំងចាប់បាន៖