ការប្រលងជាប់ ទទួលបានជ័យលាភី ជាបវរកញ្ញា នៅឆ្នាំនេះ បានបញ្ចប់ទៅ ក្រោមការតិះទៀន រិះគន់ និងចំងល់ច្រើន​រាប់មិនអស់។ យុវតី អារីយ៉ាណា មីយ៉ាម៉ូតូ ទើបនឹងត្រូវបានជាប់ជាបវរកញ្ញា ប្រចាំប្រទេសជប៉ុន ហើយកំពុងត្រៀមខ្លួន ទៅប្រលងបវរកញ្ញាចក្រវាឡ ឆ្នាំ២០១៥ បន្តទៀត។ សម្រាប់ប្រទេសជាច្រើនផ្សេងទៀតក្នុងលោក ប្រហែលជាមិន​ជា​ចាប់អារម្មណ៍ប៉ុន្មាន ឬទំនងជាស្ងើចសរសើរ ពីសម្រស់ស្ត្រីមួយរូប ដែលត្រូវតំណាង ឲ្យសម្ផស្សឲ្យស្ត្រី ក្នុងប្រទេស​នោះ បាន​ចេញ​ទៅប្រលងជាមួយនឹងបេក្ខនារី នៃប្រទេសដទៃទៀត។

ប៉ុន្តែ នៅជប៉ុន គំនិតជាតិនិយម ឬការស្រឡាញ់តែជាតិសាសន៍ខ្លួន នៅតែចាក់ឫសនៅឡើយ។ ជាពិសេស យុវតីកូន​កាត់ អាយុ២០ ដែលមានម្ដាយជាតិជប៉ុន និងឪពុកជាតិអាមេរិកាំងស្បែកខ្មៅម្នាក់ មិនត្រូវបានបណ្ដាជនជប៉ុន គិតថា​ជា​ពលរដ្ឋ​ពិសេស មានវប្បធម៌ដល់ទៅពីរនោះទេ តែនាងគឺជាផ្ទាំងស៊ីបមួយ សម្រាប់ការរិះគន់ ក្រោមពាក្យហៅថា «ជប៉ុន​មិន​ជប៉ុន» ឬ«ពាក់កណ្ដាលម្នាក់»។

បើនិយាយ ពីផ្លូវច្បាប់ នាង ម៉ារីយ៉ាណា នាងជាជនជាតិជប៉ុន សឹងតែ១០០% ព្រោះនាងបានកើត នៅលើទឹកដីជប៉ុន ក្នុងតំបន់ណាហ្គាសាគី (ភាគខាងត្បូង) ហើយនាងបានរស់នៅ នឹងធ្វើការសិក្សានៅទីនោះ តាំងពីតូច។ ប៉ុន្តែដោយ​សារ​ឪពុករបស់នាង យុវតីរូបស្រស់ បាននៅត្រឹមតែជា «ជប៉ុនមិនជប៉ុន»ម្នាក់ប៉ុណ្ណោះ។ ការរិះគន់ បានធ្វើនៅតាម​បណ្ដាញ​សង្គម ហើយអ្នកខ្លះថែមទាំងទាមទារ ឲ្យជ្រើសរើសយុវតី«ជប៉ុនសុទ្ធ»ម្នាក់ ដែលមិនមែនជានាង ម៉ារីយ៉ាណា ពីក្នុង​ចំណោម​បេក្ខនារី​ទាំង​៤៤នាក់ ដែលបានចូលរួមប្រលងបវរកញ្ញា កាលពីថ្ងៃទី១២ ខែមីនាកន្លងមក។

អ្នករិះគន់ បានសម្ដែងចំងល់ ពីល័ក្ខខ័ណ្ឌនៃការជ្រើសរើស ក្នុងការប្រលងបវរកញ្ញា«ដ៏ចម្លែក» ដែលបានអនុញ្ញាត ឲ្យ​ស្រី​«ជប៉ុនមិនជប៉ុន» មកតំណាងឲ្យ សម្ផស្សស្ត្រីជប៉ុនទាំងមូល។ អ្នកខ្លះទៀត បានចំអកឲ្យបវរកញ្ញាថ្មីនេះថា ជា​បវរកញ្ញា​ជប៉ុន«ពាក់កណ្ដាល» និងលើកឡើងពី ភាពក្រៀមក្រំ«ពាក់កណ្ដាល»របស់ខ្លួន នៅចំពោះយុវតី​ជាបរទេស​ម្នាក់។

យ៉ាងណាក៏ដោយ ក៏គេនៅសង្កេតឃើញ មានមតិយោបល់ ដែលបានសរសើរ យុវតីកូនកាត់នេះ និងអ្នកដែលបាន​ជ្រើសរើស យកនាងខ្លះដែរ។ ពួកគេទាំងនោះ និយាយថា នេះជាសញ្ញាមួយ បង្ហាញថាជប៉ុនមានការអត់អោន និងបើក​ទូលាយច្រើនជាងមុន។ អ្នកខ្លះទៀតនិយាយ កាន់ជើងបវរកញ្ញាថ្មីថា មានចលនាស្អាតស្រស់សង្ហា ដែលខុសពីស្ត្រី​ជប៉ុន​«ទន់ជ្រាយ» ប្រកបដោយស្នាមញញឹមស្រស់ស្រាយ បញ្ចេញធ្មេញត្រឹមគ្មានទាស់ រួមផ្សំនឹងជើងដ៏ស្រឡូន វែង​លលៃ​របស់​នាង (យុវតី មានកំពស់ ១,៧៣ ម៉ែត្រ)៕