ជំនួបកំពូល ស្ដីពីកិច្ចសន្ទនាជាសាកល ជារបៀបវីរះមួយថ្មី នៅក្នុងចំណោមរបៀបវីរះ ប្រកាសជាផ្លូវការ ដែលអាស៊ានធ្លាប់​ធ្វើកន្លង មក។ នៅម៉ោង៩ព្រឹកថ្ងៃទី២០ វិច្ឆិកា កន្លងមកនេះ នៅឯវិមាន​សន្តិភាព កិច្ចសន្ទនាអាស៊ានជាសាកលនេះ ត្រូវបានរៀបចំ​ធ្វើ​ ដោយ មានការចូលរួម ពី​ប្រមុខរដ្ឋ-ប្រមុខរដ្ឋាភិបាលអាស៊ាន និងប្រទេសដៃគូសរុប ១៨ប្រទេស និងមានវត្តមានរបស់ ប្រធានាធិបតី ​​អាមេរិក​លោក បារ៉ាក់ អូបាម៉ា ព្រមទំាងប្រធានអង្គការមូលនិធិធំៗ នៅលើពិភពលោកផង ។

កិច្ចសន្ទនាជាសាកល នៅឯវិមាន​សន្តិភាព ព្រឹកថ្ងៃទី២០ វិច្ឆិកា ឆ្នាំ២០១២។ រូបថត MONOROOM.info/Phnom Thom។

កិច្ចសន្ទនាសកលអាស៊ាន នេះជាកិច្ចពិភាក្សា នៅក្នុងតំបន់អាស៊ីអាគ្នេយ៍ ដែលអ្នក​ចូលរួម អាចលើកនូវបញ្ហានានា ដែលប្រទេស​ក្នុងតំបន់ និងពិភពលោកកំពុងប្រឈមមុខ និងជួបប្រទះ ដូចជា វិបត្តិហិរញ្ញិវត្ថុ ​សកល និងផលលំបាករបស់វា បញ្ហាប្រែប្រួល​អាកាសធាតុ ភាពប្រែប្រួល និងតានតឹងជម្លោះអន្តរជាតិ សុវត្ថិភាពផ្នែកអារហារ និងថាមពល។

មានប្រទេសមិនតិចជាង២ ទេធ្លាប់បានស្នើរ និងរៀបចំឲ្យមានកិច្ចសន្ទនាសកលអាស៊ាន នៅក្នុងកាលវិភាគ​របស់កិច្ចប្រជុំ​កំពូល​អាស៊ានប្រចាំឆ្នាំ ។ ប្រទេសថៃ ធ្លាប់បានរៀបចំទីតាំង និងកាលវិភាគយ៉ាងច្បាស់លាស់ សម្រាប់កិច្ចសន្ទនាសកលអាស៊ាននេះ នៅខែមេសា ឆ្នាំ២០០៩ ដោយបានគ្រោងធ្វើ នៅមជ្ឈមណ្ឌល Centara Grand&Bangkok Convention ក្នុងទីក្រុងបាងកក។ ក្នុង​រយះពេលនៃការកាន់អំណាច របស់អតីតនាយករដ្ធមន្ត្រីថៃ លោកអាភីស៊ីត វេចាជីវា កិច្ចសន្ទនាសកលអាស៊ាននេះ ធ្លាប់បាន​គ្រោងធ្វើ ដោយក្រសួងការបរទេសរបស់ថៃ និងលេខាធិការដ្ធានអាស៊ាន។ ប៉ុន្តែ កិច្ចសន្ទនានេះ ត្រូវបានលប់ចោលភ្លាមៗ នៅ​ពេលនោះ ដោយសារវិបត្តិនយោបាយក្នុងប្រទេសថៃ។

សូមជម្រាបជូនថា កិច្ចសន្ទនាសកលអាស៊ាន នេះជាការពិភាក្សាសកលរបស់អាស៊ាន និងជាព្រឹត្តិការណ៍ដំបូងទី១ ក្នុង២០០៩ សម្រាប់តំបន់អាស៊ីអាគ្នេយ៍ទាំងមូល បន្ទាប់ពីមានកិច្ចប្រជុំ ហ្សេ ២០ (G20) ក្នុងទីក្រុងឡុងដ៍ ប្រទេសអង់គ្លេស។ នៅពេលនោះ មេដឹកនាំ​មកពីប្រទេសសេដ្ធកិច្ចធំៗ ទាំង២០លើពិភពលោក បានសន្យានឹងគ្នាថា ចំពោះទឹកប្រាក់ដ៏សន្ធឹកសន្ធាប់ចំនួន ១សែន​កោដដុល្លា សម្រាប់ប្រទេសកំពុងអភិវឌ្ឍន៍ ដោយរាប់បញ្ចូលទាំងប្រទេសហ្វីលីពីនផងដែរ។

មេដឹកនាំដែលសំខាន់ៗ រួមទាំងអង្កការអន្តរជាតិ ក្នុងអង្គពិភាក្សានោះ រួមមានអ្នកតំណាង មកពីធនាគារអភិវឌ្ឍន៍អាស៊ី (ADB ) មកពីមូលនិធិរូបិយបណ្ណអន្តរជាតិ (IMF) តំណាងមកពីអង្កការសហប្រជាជាតិ ស្ដីអំពីពាណិជ្ជកម្មនិងការអភិវឌ្ឍ មកពីធនាគារ​ពិភពលោក (WB ) និងអង្កការពាណិជ្ជកម្មពិភពលោក (WTO)។ ជាទូទៅ អង្គពិភាពក្សា និងការពិភាក្សាត្រូវបានសម្របសម្រួល​ដោយលោក ស៊ូរិន ពិតស៊ូវណ្ណ ដែលជាអគ្គលេខាធិការនៃសមាគមអាស៊ាន។

ក្រៅពីសមាសភាពខាងលើនេះ សមាជិកភ្ញៀវកិត្តិយស ដែលបានចូលរួមស្ដាប់កិច្ចពីភាក្សានេះ រួមមាន អ្នកដែលមានសិទ្ធ​សម្រេច​ការងារសំខាន់ៗ មកពីរដ្ធាភិបាលផ្សេងៗ អ្នកសម្រេចគោលនយោបាល សហគមន៍អ្នកពាណិជ្ជកម្ម អង្គទូត សង្គមស៊ីវិល សារព័ត៌មាន អ្នកសិក្សាស្រាវជ្រាវ និងសមាជិករដ្ឋសភា ក្នុងតំបន់អាស៊ីអាគ្នេយ៍ផងដែរ។

សូមបញ្ជាក់ថា ក្នុងពេលបច្ចុប្បន្ន អាស៊ីបានក្លាយជាតំបន់នៃសក្ដានុពលសេដ្ធកិ្ច ដែលអាមេរិក អូស្ត្រាលី និងអឺរ៉ុបកំពុងសម្លឹងមើល ដោយក្នុងនោះ ប្រទេសចិនជាមហាអំណាចសេដ្ឋកិច្ចធំជាងគេ។

---------------------------------------------------------
ដោយៈ ភ្នំធំ - ភ្នំពេញថ្ងៃទី ២០ វិច្ឆិកា ឆ្នាំ២០១២
រក្សាសិទ្ធគ្រប់យ៉ាងដោយ៖ មនោរម្យព័ងអ៊ីនហ្វូ