នៅគ្រប់វីដេអូ គម្រាមសម្លាប់ចំណាប់ខ្មាំង ដែលត្រូវបានបង្ហោះដោយ ក្រុមអ៊ីស្លាមនិយមជ្រុល គេតែងឃើញការ​រៀបចំ​ឈុតឆាក ក្នុងលក្ខណៈតែមួយ៖ ចំណាប់ខ្មាំងអង្គុយលុតជង្គង់ ពាក់អាវពណ៌លឿងទឹកក្រូច និងបង្ហាញនូវ​អារម្មណ៍​ស្ងៀម​ស្ងាត់ ហាក់មិនបានខ្វល់ ពីអ្វីទាំងអស់ សូម្បីតែភាពតក់ស្លុត នៅមុនស្លាប់ក៏ដោយ។ តើមានមូលហេតុអ្វី?

លោក សាលេហ៍ (Saleh ឈ្មោះដាក់ឲ្យ) ដែលធ្លាប់ជាអ្នកបកប្រែភាសា របស់ក្រុមស្ម័គ្រប្រយុទ្ធ Daesh ដែល​បាន​មក​រស់នៅក្នុងប្រទេសទួរគី នាពេលនេះ បានពន្យល់ប្រាប់ ពីចម្លើយទៅនឹងសំនួរខាងលើ តាមរយៈកិច្ចសម្ភាសមួយ ជា​មួយ​នឹងស្ថានីយ៍ទូរទស្សន៍ Sky News។

ចំណាប់ខ្មាំង តែងត្រូវបាននិយាយប្រាប់ ដោយកុហក ជាញ៉យដង អំពីការយកទៅសម្លាប់ចោល។ ប៉ុន្តែ នៅពេល​ដែល​មានហេតុការណ៍ នៃការយកទៅសម្លាប់មែនទែន បានកើតមានឡើងមែន ចំណាប់ខ្មាំងនៅតែគិតថា នោះក៏ជាការ​កុហក​ដដែលដែរ ជាពិសេសបានគិតថា នេះគ្រាន់តែជាការថតវីដេអូ ដើម្បីយកមកផ្សាយអួតអាងប៉ុណ្ណោះ។ អ្នក​ទទួល​ខុសត្រូវល្បីឈ្មោះមួយរូប នៅក្នុងផ្នែកគ្រប់គ្រងចំណាប់ខ្មាំង របស់ក្រុមអ៊ីស្លាមនិយមជ្រុល បានស្នើទៅលោក សាលេហ៍ ឲ្យនិយាយជាមួយចំណាប់ខ្មាំង ធ្វើយ៉ាងណាបង្កបរិយាកាស នៃការជឿទុកចិត្ត។

លោក សាលេហ៍ បានស្រង់សម្ដីអ្នកទទួលខុសត្រូវនោះ នៅពេលនិយាយមកខ្លួន យ៉ាងដូច្នេះថា៖ «ប្រាប់ពួកវាទៅ ថា​យើងមិនសម្លាប់ពួកវាទេ។ វាគ្រាន់តែជាវីដេអូមួយប៉ុណ្ណោះ។ យើងគ្រាន់តែចង់ឲ្យរដ្ឋាភិបាលនៃប្រទេសពួកវា បញ្ឈប់​ការវាយលុយជាបន្តទៀត លើប្រទេស ស៊ីរី។» ហើយថែមទាំងធានាអះអាងទៀតថា៖ «យើងគ្មានបញ្ហាអ្វី សូម្បីបន្តិច​ឡើយ ជាមួយអ្នកឯង។ អ្នកឯងគឺជាភ្ញៀវ របស់យើង។»

អតីតអ្នកបកប្រែភាស បានរៀបរាប់បន្ថែមថា ក្រុមអ៊ីស្លាមថែមទាំង បានដាក់ឈ្មោះហៅក្រៅ ទៅឲ្យចំណាប់ខ្មាំង​ទាំង​នោះ​ទៀត ដើម្បីឲ្យចំណាប់ខ្មាំងកាន់តែមានអារម្មណ៍ «គ្នាឯង» និង«ធម្មតាៗ»។ ដូចជនជាតិជប៉ុន លោក កេនជី ហ្គូតូ (Kenji Goto) ត្រូវបានដាក់ឈ្មោះក្រៅឲ្យថា អាប៊ូ សាអាដ (Abu Saad)។ លោក សាលេហ៍ បានបន្តថា៖ «ខ្ញុំចាប់​អារម្មណ៍ នៅពេលគេហៅឈ្មោះ អាប៊ូ សាអាដ នោះ ជនជាតិជប៉ុនបានបង្ហាញ ពីអារម្មណ៍ធូរស្បើយ។ ឬនិយាយឲ្យខ្លី ស្ងប់​ស្ងៀម​បានកាន់តែខ្លាំង នោះការយកទៅសម្លាប់ចោល ក៏កាន់តែងាយតាមណ្នឹងដែរ។»៕