ករណីនេះ បានកើតឡើង កាលពីវេលាម៉ោង៩ និង៥៥នាទីយប់ថ្ងៃទី១២ ខែមិនា ឆ្នាំ២០១៥ ដែលធ្វើឲ្យមាន ការភ្ញាក់​ផ្អើល ដល់អ្នកធ្វើដំណើរ លើផ្លូវសហព័ន្ធរុស្ស៊ី។ ចំណុចកើតហេតុនេះ នៅជិតស្ថានីយ៍ប្រេងសូគីម៉ិច ស្ថិតនៅសង្កាត់​កាកាប ខណ្ឌពោសែនជ័យ រាជធានីភ្នំពេញ។ តាមប្រភពព័ត៌មានបានឲ្យដឹងថា ករណីនេះ កើតឡើងដោយជន​រង​គ្រោះ ជាអ្នកជិះម៉ូតូដួលដោយខ្លួនឯង គ្មានអ្នកណាម្នាក់មកប៉ះពារទេ។

សាក្សីបានឃើញហតុការណ៍នេះ លោក ឈុន អេង ជាសន្តិសុខនៅក្រុមហ៊ុនមួយក្បែរនោះ បានឲ្យដឹងថា ជនរង​គ្រោះ​ជិះម៉ូតូ អាយខន ពណ៍លឿង ក្នុងទឹសដៅពីកើតទៅលិច យ៉ាងលឿន ស្រាប់តែមកដល់ចំណុចកើតហេតុ ម៉ូតូបាន​ដួល​ទៅលើដី ហើយម្ចាស់បានបោកខ្លួន ចេញប្រមាណ ពីរទៅបីម៉ែត សន្លប់បាត់ស្មារតី និងបាក់ថ្គាម។ សាក្សីបញ្ជាក់​ទៀត​ថា មើលទៅជនរងគ្រោះ ទំនងជាស្រវឹងខ្លាំង។

ជនរងគ្រោះឈ្មោះ គោ បន្ទាប់ពីអ្នកជិតខាង ជួយឲ្យដឹងខ្លួន បាននិយាយថា គាត់ពិតជាជិះម៉ូតូដួលខ្លួនឯងមែន ព្រោះ​ទើបចេញពីជប់លៀងផ្ទះមិត្តភក្តិ នៅសង្កាត់ កាកាប ខណ្ឌពៅសែនជ័យ រាជធានីភ្នំពេញ។ តែមិទាន់ទៅដល់ផ្ទះ ព្រោះ​មានគ្រោះថ្នាក់ នៅកណ្តាលផ្លូវ។

រឿងដែលចម្លែក ហើយគួរឲ្យភ្ញាក់ផ្អើល នៅក្នុងហេតុការណ៍នេះ មានរថយន្ដសង្គ្រោះដល់ទៅពីរ បានទៅដល់កន្លែង​កើតហេតុ តែមិនមានរថយន្ដណាមួយ បានដឹកអ្នករបួសទេ ដោយសារគ្មានការអនុញ្ញាត ពីសាច់ញាតិ។ ឡាន​សង្គ្រោះ​ទាំងពីរ ត្រឡប់មកវិញ ទាំងហួសចិត្ត។ សាច់ញាតិជនរងគ្រោះ បានយកម៉ូតូរបស់ខ្លួន បញ្ជូនអ្នករបួសទៅមន្ទីពេទ្យ ដើម្បីធ្វើការព្យាបាល៕