«លោក ហ៊ុន សែន កាន់តែចាស់ហើយ នឹងមានគុណធម៌សំរាប់ក្មេងៗជំនាន់ក្រោយ» នេះការថ្លែង របស់លោក មាជ សុវណ្ណារ៉ា ទៅកាន់អ្នកសារព័ត៌មាន បន្ទាប់ពីការប្រកាសសាលដីកា របស់តុលាការកំពូល នៅព្រឹកថ្ងៃទី ១១ ខែមីនា ឆ្នាំ​២០១៤​នេះ។ ជនត្រូវចោទរូបនេះ បានថ្លែងថា អ្នកដែលមានទោសសំលាប់មនុស្ស និងអ្នកញៀនគ្រឿងញៀន បែរ​ជា​អាច​នៅក្រៅឃុំបាន ឯលោកជាអ្នកនយោបាយមានគុណធម៌ និងជាបញ្ញាវន្ដ ដែលបានរៀនសូត្រចេះដឹង មកពីស្រុកគេ បែរ​ជា​ត្រូវជាប់ទោសទៅវិញ។ នេះជារឿងអយុត្តិធម៌មួយ សំរាប់រូបលោក។

តុលាការកំពូល បានប្រកាសសាលដីកា តំកល់ការសម្រេច របស់សាលាឧទ្ទរណ៍ ក្នុងការមិនឲ្យលោក មាជ សុវណ្ណារ៉ា នៅក្រៅឃុំនោះ ជាបន្តទៅទៀត។ លោក មាជ សុវណ្ណារ៉ា នឹងត្រូវបន្តជាប់ឃុំ ក្នុងពន្ធនាគារព្រៃសរ និងរងចាំការបើក​សវនាការកាត់ក្តី ចំពោះសំនុំរឿងរបស់លោក នៅពេលក្រោយ។

ក្នុងឱកាសដដែលនោះ ជនត្រូវចោទ ដែលជាមន្ត្រីជាន់ខ្ពស់​ របស់គណបក្សសង្គ្រោះជាតិរូបនេះ បានបន្ថែមថា រឿងនេះ​ជារឿងនយោបាយ។ ដូច្នេះរឿងនយោបាយ ត្រូវដោះស្រាយដោយនយោបាយ មិនមែនជាករណីឧក្រិដ្ឋកម្ម ត្រូវដោះ​ស្រាយ​តាមប្រព័ន្ធតុលាកានោះទេ។

លោក មាជ សុវណ្ណារ៉ា បញ្ជាក់ថា លោកជាមនុស្សម្នាក់ នៅក្នុងចំណោមមនុស្ស ១២៣ នាក់ ក្នុងគណៈបក្សសង្រ្គោះជាតិ ហើយលោកមិនបានដឹកនាំមនុស្ស ទៅធ្វើកុបកម្មនោះទេ ពោលគឺលោកបាននាំគ្នា ទៅបញ្ចេញមតិយោបល់ ប៉ុន្តែបែជា​ព្រះ​រាជ​អាជ្ញាចោទប្រកាន់លោក ថាដឹកនាំមនុស្ស ទៅធ្វើកុបកម្មទៅវិញ។ បុរសមានសញ្ជាតិខ្មែរ-អាមេរិកកាំង រូបនេះ បាន​និយាយទៀតថា បើសិនជាលោកមិនខ្វល់ខ្វាយ អំពីប្រជារាស្ត្រខ្មែរទេនោះ ប្រហែលជាលោកត្រឡប់​ទៅអាមេរិកវិញ​បាត់ទៅហើយ ប៉ុន្តែលោកចង់ឲ្យខ្មែរចេះស្រលាញ់គ្នា ដូច្នេះទើបលោក នៅកម្ពុជាបន្តទៀត ដើម្បីជួយអភិវឌ្ឍន៍ប្រទេស។

មេធាវីការពាររឿងក្តី ឲ្យលោក មាជ សុវណ្ណារ៉ា លោក ជូង ជូងី បានលើកឡើងថា ការសម្រេចបន្តឃុំខ្លួនកូនក្តី​របស់លោក​ថា ជារឿងអយុត្តិធម៌ ព្រោះមិនមានភស្តុតាង ដាក់បន្ទុកច្បាស់លាស់។ លោកមេធាវី បានរៀបរាប់ថា ពេលដែលកូនក្តី​របស់​លោក ទៅស្ពាននាគនោះ មិនមែនក្នងនាម ជាមេដឹកនាំនោះទេ ហើយសកម្មភាពនៅទីនោះ មិនមែនជារឿង​កុបកម្ម​នោះទេ ប៉ុន្តែវាជារឿងហឹង្សាក្នុងបាតុកម្ម ហើយហឹង្សាដែលកើតមាននោះ គឺជារឿងបុគ្គលផ្ទាល់ មិនមែនលោក មាជ សុវណ្ណារ៉ា ជាអ្នកដឹកនាំបង្ករឲ្យមានហឹង្សានោះទេ៕