ករណីតវ៉ាជាច្រើន បានផ្ទុះឡើង រាប់តាំងពីករណីពលរដ្ឋ ដែលរងគ្រោះនឹងដីធ្លី ឬក្រុមអ្នកការពារព្រៃ។ល។ ហើយ​ករណី​ខ្លះ ក៏គេនិយាយដល់ ពីការតវ៉ាដែលកើតមាន នៅក្នុងផ្ទៃក្នុងគណបក្សនយោបាយដែរ។ ប៉ុន្តែជានិច្ចជាកាល ដំណោះ​ស្រាយ​វិញ ដូចជាស្ថិតក្នុងសភាពមិនជាក់លាក់ ហើយករណីមួយចំនួន ត្រូវបានតបតរវិញ ដោយការគម្រាមកំហែង ឬ​ចាប់​ដាក់ពន្ធនាគារ និងការបណ្ដេញចេញពីគណបក្សជាដើម។

ខាងលើនេះ ត្រូវបានលោក យ៉ង់ គឹមអេង ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍និងសន្តិភាព អះអាងថា ដោយ​សារតែ ប្រទេស សង្គម ឬគណបក្សនោះ មិនបានគោរពលិទ្ធិប្រជាធិបតេយ្យ ពិតប្រាកដ។

ក្នុងកិច្ចសម្ភាស ជាមួយទស្សនាវដ្តីមនោរម្យ.អាំងហ្វូ ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាពរូបនេះ បានធ្វើការបកស្រាយ ទៅលើការដឹកនាំរបស់គណបក្សនយោបាយ ក្នុងស្រុកខ្មែរមួយ ដែលកំពុងមានវិបត្តិផ្ទៃក្នុង របស់​ខ្លួន​ជាបន្តបន្ទាប់ និងនៅមិនទាន់មាន ការដោះស្រាយណាមួយ ដែលសមហេតុផល និងអាចទទួលយកបាន ពីភាគី​ទំនាស់​ណា​មួយនៅឡើយ។ គណបក្ស ដែលលោកចង់និយាយដល់នោះ គ្មានគណបក្សណា ក្រៅពី​គណបក្ស​សង្គ្រោះ​ជាតិ ដែល​ល្បី​ថា ជា​គណបក្ស​ប្រឆាំងដ៏ធំ របស់កម្ពុជានោះហើយ។

លោក គឹមអេង បានសម្ដែងការគាំទ្រ ចំពោះការតវ៉ានានា ពីគ្រប់មជ្ឍដ្ឋាន ក្នុងការបង្ហាញ នូវការមិនពេញចិត្តអ្វីមួយ​របស់​ខ្លួន ទៅកាន់ថ្នាក់ដឹកនាំ ដែលស្របតាមគោលការណ៍ លិទ្ធិប្រជាធិបតេយ្យពិត នៅកម្ពុជា។លោកបានបញ្ជាក់ថា៖ «ការ​តវ៉ា ក្នុងសង្គមប្រជាធិបតេយ្យ វាបែបហ្នឹងឯង។ (...) បើមិនចង់ឃើញរូបភាពបែបហ្នឹង (ការតវ៉ា) ទាល់តែយើង កុំនាំគ្នា​បង្ហាញ ចង់បាន ឬទាមទារ លិទ្ធិប្រជាធិបតេយ្យ។ (...) ប្រជាធិបតេយ្យ កាលណាមានការខុសឆ្គង ការមិនពេញចិត្ត គេធ្វើ​ការ​ទាមទារ ធ្វើការតវ៉ា ឬជំទាស់ដោយសន្តិវិធី មិនម្តងម្កាលទេ អាចកើតឡើងជាញឹកញាប់ ឬសឹងគ្រប់ពេលវេលា។ (...) ថ្នាក់ដឹកនាំទាំងនោះ ក្នុងការដោះស្រាយ បញ្ហាតវ៉ា ឬការទាមទារ ក៏ត្រូវមានភាពចាស់ទុំ ក្នុងការដោះស្រាយបញ្ហានោះ។»

តាមគោលការណ៍ប្រជាជិបតេយ្យ អ្នកធ្វើការតវ៉ា ឬទាមទានូវសិទ្ធិ ឬការដោះស្រាយ នូវបញ្ហាណាមួយដែលសមស្រប នឹងមានច្បាប់ប្រគល់ឲ្យនោះ មិនមែនជាទង្វើអាក្រក់ ឬខុសនោះដែរ។ លោកបន្តថា ដូចករណីលោកស្រី កែ សុវណ្ណរតន៍ ដែលមានការទាមទា ដោយក្រុមការងារខ្លួន នៅខេត្តសៀមរាប លោកស្រីក៏ត្រូវមានសិទ្ធិដូចគ្នា ក្នុងការបងស្រាយ ពី​បញ្ហា​នៃការចោទប្រកាន់នោះដែរ។ លោកបានថ្លែងឲ្យដឹងទៀតថា៖ «បើជាកំហុសឆ្គង ត្រូវមានឆន្ទះក្នុងការកែប្រែ បើគ្មាន​កំហុស​ក៏ត្រូវធ្វើការពន្យល់ឲ្យបានច្បាស់លាស់។ (...) បើគណបក្សប្រឆាំងមួយ ផ្តល់គំរូអាក្រក់ ក្នុងការ​អនុវត្ត​លិទ្ធិ​ប្រជា​ធិបតេយ្យ តើអាចនឹងដណ្តើមជោគជ័យ​ម្តេចនឹងបាន នេះជារឿងសំខាន់។ (...) បើមិនអភិវឌ្ឍន៍ខ្លួនឯង ទៅរកសង្គម​ប្រជាធិបតេយ្យ​ទេ ថ្ងៃក្រោយហ្នឹង ដឹកនាំប្រទេសមិនបានទេ។ នេះជាបញ្ហា។»

លោក យ៉ង់ គឹមអេង បានអំពាវនាវ ទៅគ្រប់គណបក្សនយោបាយទាំងអស់ គប្បីកុំលើកយកបញ្ហានានា ដែលកើតមាន​ក្នុងឬក្រៅ គណបក្សរបស់ខ្លួន មកធ្វើការលាបព័ណ៌ លើភាគីបដិបក្សនោះឡើយ។ លោកបានបញ្ជាក់បន្ថែមថា៖ «ខ្ញុំ​សង្ឃឹម​ថា គ្រប់អ្នកនាំពាក្យទាំងអស់ កុំគប្បីធ្វើការលាបព័ត៌គ្នា ដើម្បីតែការប្រឆាំងតបតលើអ្នកប្រឆាំងទាំងនោះឡើយ។»

សូមបញ្ជាក់ថាតំណាងរាស្រ្តមណ្ឌលសៀមរាប លោកស្រី កែ សុវណ្ណរតន៍ និងជាប្រធានគណៈកម្មការទី៨រដ្ឋសភា ត្រូវ​បានក្រុមការងាររបស់ខ្លួន ក្នុងខេត្តសៀមរាមមួយចំនួន បានធ្វើការប្រឆាំង និងទាមទារ ឲ្យមានការផ្លាស់ប្តូរតំណែង កាល​ពីថ្ងៃទី១ និងទី២ ខែមីនានេះ ក្រោមហេតុផលថា បក្សពួកនិយម គ្មានតម្លាភាព និងគ្មានយុត្តិធម៌។ ចំពោះករណីនេះ លោក សម រង្ស៊ី ប្រធានគណបក្សសង្គ្រោះជាតិ បានឡើងទៅកាន់ ខេត្ត​សៀមរាប ក្នុងថ្ងៃទី៥ ខែមីនានេះ ដើម្បីដោះស្រាយ បញ្ចប់​បញ្ហា។ នេះបើតាមការបញ្ជាក់ ​របស់​លោក សុខ គឹមសេង សមាជិកក្រុម​ប្រឹក្សាគណបក្ស ​ខេត្តសៀមរាប របស់​គណបក្ស​សង្គ្រោះជាតិ៕