បារាំង៖ អ្នកប្រឆាំងនឹង អាពាហ៍ពិពាហ៍នៃភេទតែមួយ ចុះដើរនៅតាមផ្លូវ
- ដោយ: ដារា រិទ្ធ
- កែប្រែចុងក្រោយ: November 21, 2012
- ប្រធានបទ:
- អត្ថបទ: មានបញ្ហា?
- មតិ-យោបល់
-
បាតុកម្មជាច្រើន បានរៀបចំធ្វើឡើង ដើម្បីសុំអោយអ្នកប្រឆាំង នឹងអាពាហ៍ពិពាហ៍នៃភេទដូចគ្នា ចុះដើរនៅតាមដងផ្លូវ នៅចុងសប្ដាហ៍កន្លងមកនេះ។
បណ្ដាជនបាតុករ ប្រឆាំងនឹងអាពាហ៍ពិពាហ៍នៃភេទដូចគ្នា នៅក្នុងមហាវិថីនៃទីក្រុងប៉ារីស។ រូបថត franceinfo.fr។
ឆ្លើយតបនឹងការអំពាវនាវ នៃក្រុមអ្នកប្រឆាំង នឹងអាពាហ៍ពិពាហ៍នៃភេទដូចគ្នា បណ្ដាជនបារាំងរាប់ពាន់នាក់ បានណាត់គ្នាចុះដើរនៅតាមដងផ្លូវ នៅថ្ងៃសៅរ៍ទី១៧វិច្ឆិកាកន្លងមកនេះ។ អ្នកកាន់សាសនាកាតូលីក ក៏បានចូលរួមជាមួយផងដែរ ក្នុងចលនានេះ នៅថ្ងៃអាទិត្យស្ងែកឡើង នៅពេញប្រទេសបារាំង។ ជាការរៀបចំចាត់ចែងមួយ ដែលមានបុព្វហេតុយ៉ាងច្បាស់លាស់ ដោយក្រុមពួកអ្នកប្រឆាំងទល់នឹង ច្បាប់ដែលនឹងអនុញ្ញាតិអោយពួកអ្នកស្រឡាញ់ភេទដូចគ្នា អាចរៀបការចុះលិខិតអាពាហ៍ពិពាហ៍ និងអាចទទួលកូនមកចិញ្ចឹមបាន។ ក្នុងអ្នកប្រឆាំង រំពឹងថាសម្លេងប្រឆាំងរបស់ពួកគេ នឹងត្រូវបានរដ្ឋាភិបាលបារាំងស្ដាប់លឺ។
ក្នុងការស្ទង់មតិចំនួនបីខុសគ្នា បានរកឃើញថា មានការថយចុះ នូវចំនួនចុះឈ្មោះចាំរៀបការ នៃក្រុមមនុស្សដែលស្រឡាញ់ភេទដូចគ្នា តែនៅតែមានចំនួនច្រើនលើសលប់នៅឡើយ។ ការស្ទង់មតិនោះ ក៏បានរកឃើញដែរថា មានការថយចុះដូចគ្នា នូវមតិរបស់បណ្ដាជនជាតិបារាំង ដែលគាំទ្រអោយមានការទទួលយកកូនទៅចិញ្ចឹម ដោយគូរស្នេហាមានភេទដូចគ្នាទាំងនេះ។
បាតុកម្ម ដើម្បីយើងទាំងអស់គ្នា
ក្នុងចំណោមអ្នកចុះមកដើរតាមដងផ្លូវ គេសង្កេតឃើញភាគច្រើនជាយុវជនវ័យក្មេង ជនចូលនិវត្តន៍ និងជនវ័យកណ្ដាល ដែលមកជាលក្ខណៈគ្រួសារ។ ដោយនៅថ្ងៃចុងសប្ដាហ៍នេះ មនុស្សភាគច្រើន បានបានឈប់សម្រាកពីការងារនោះ ពួកអ្នកដែលប្រកបការងារជាអាជីបជាច្រើន ក្នុងមន្ទីរក្រសួង ឬស្ថាប័នឯកជន ក៏បានមកចូលរួមជាមួយគ្នាដែរ។ ពួកគេបានស្រែកទាមទារ នូវបុព្វហេតុទាំងអស់គ្នាមួយ នោះគឺចង់បានគ្រួសារដែល មានរូបរាងពិតប្រាកដ មានម្ដាយមានឪពុក សម្រាប់កុមារៗ និងជនជំនាន់ក្រោយ។ ពួកគេស្រែកពន្យល់អ្នកយកពត៌មាន ដោយប្រណាំងទៅនឹងសម្លេងតាមឧឃោសនស័ព្ទថា «អាពាហ៍ពិពាហ៍ នៃមនុស្សភេទដូចគ្នា ជាជំហ៊ានដំបូងមួយ ដែលនឹងអាចអនុញ្ញាតិអោយមាន ការទាមទារអោយរៀបការ ប្ដីប្រពន្ធច្រើនចូលគ្នា» ដោយបានអះអាងបន្ងែមថា «នេះជានៃសិទ្ធិសេរីភាព នៃការនិយាយស្ដី របស់ប្រជាជនបារាំង»។
ពិភពលោកនឹងជួបបញ្ហា
មនុស្សជាច្រើន ដែលបានចូលរួមក្នុង ការដង្ហែក្បួននេះ បានបង្ហាញនូវភាពភ័យខ្លាចរបស់ពួកគេ នៅពេលដែល «ទារកម្នាក់ ឬកុមារម្នាក់ កើតមកហើយ មិនអាចទទួលបាននូវការបីបាច់ ជាលក្ខណៈធម្មជាតិ ដូចជានៅក្រោម ការបីបាច់របស់ឪពុកឬម្ដាយបង្កើតរបស់គ្នា»។ ពួកគេនិយាយថា «អ្វីៗដែលមនុស្សកំពុងតែទាមទារ ពីអាពាហ៍ពិពាហ៍ នៃមនុស្សភេទដូចគ្នានេះ ជាអំពើប្រឆាំងនឹងធម្មជាតិ»។
បណ្ដាជនផ្សេងទៀត ដែលមានជំនឿនៅក្នុងសាសា បានពន្យល់ពីក្នុងចំណោមមនុស្សជាច្រើននេះ យ៉ាងដូច្នេះថា «ដោយហេតុថា យើងជឿដល់ព្រះជាម្ចាស់ ហើយព្រះបានសុំកុំអោយយើង អនុវត្តនូវប្រភេទរឿងបែបនេះ។ ពិភពលោក ទាំងមូល នឹងជួបបញ្ហា ព្រោះពិភពលោកត្រូវការ ភាពស្ងប់ស្ងាត់។» ស្ត្រីម្នាក់ទៀត នៅក្បែរនោះ អាយុប្រមាណជា៦០ឆ្នាំ ដែលបង្ហាញខ្លួនថា ជាមហាបណ្ឌិត ខាងវិទ្យាសាស្ត្រនោះ កំពុងកាន់រូបចម្កាក់«ស្រ្តីព្រហ្មចារីយ៍ ម៉ារី»នៅនឹងដៃ បានបន្ថែមថា «ស្រ្តី ត្រូវបានបង្កើតមក ដើម្បីប្រសូតទារក និងបង្តជីវិត អោយពិភពលោក។ ដូច្នេះ វាមិនអាចក្លាយជា រឿងណាមួយផ្សេងទៀតបានទេ។»
ប្រឈមមុខ នឹងចលនាងើបឡើងប្រឆាំងតាមដងផ្លូវនេះ រដ្ឋាភិបាលបារាំង នឹងមិនអាចធ្វើមិនដឹងមិនលឺបាននោះឡើយ។ យើងនៅតែចាំមើល ថាតើវិធានការណ៍ បែបណា នឹងត្រូវយកមកចាត់ការនោះ បើលោកប្រធានាធិបតីបារាំង លោកហ្វ្រង់ស៊័រ ហូឡង់ (ធ្លាប់បានសន្យាកាលពីពេលឃោសនាបោះឆ្នោត ថានឹងធ្វើអោយសម្រេចនូវ ច្បាប់សម្រាប់អាពាហ៍ពិពាហ៍នៃភេទដូចគ្នា ហើយពួកគេអាចទទួលកូនមកចិញ្ចឹមបាននោះ៕
------------------------------------------------------
ដោយ ៖ ដារា រិទ្ធ - ភ្នំពេញ ថ្ងៃទី១៩ ខែវិច្ឆិកា ឆ្នាំ២០១២
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ