លោក ខ័ណ្ឌ ច័ន្ទសុផល តារាហ្វេសប៊ុកដ៏ល្បីមួយរូប ដែលរងទាំងការជេរប្រទេច និងការសរសើរ ពីសំណាក់​អ្នក​ប្រើប្រាស់ បណ្តាញសង្គម បានឱ្យដឹងថា បន្ទាប់ពីគម្រោងសាងសង់ ទំនប់វារីអគ្គីសនី របស់ក្រុមហ៊ុនស៊ី​ណូ​ហាយ​របស់ចិន ត្រូវបានផ្អាកមិនឱ្យធ្វើនោះមក កម្ពុជាបានខាតបង់យ៉ាងធ្ងន់ធ្ងរ ព្រោះលុយរាប់ពាន់លានដុល្លារ ដែល​ក្រុមហ៊ុន​​បានដាក់វិនិយោគ សម្រាប់ជួយប្រជាពលរដ្ឋកម្ពុជា ត្រូវបានរលាយសូន្យ ដូចអំបិលត្រូវទឹក។ ទឹកប្រាក់​វិនិយោគយ៉ាងច្រើនលើសលប់ ដែលត្រូវបានបាត់បង់នេះ ក៏ដោយសារតែមានការតវ៉ា ពីក្រុមចលនាមាតាធម្មជាតិ ជាពិសេសលោក  អាឡិច ជាតិអេស្ប៉ាញ ដែលបានរារាំង ដល់ការ«អភិវឌ្ឍន៍»ប្រទេស។

តារាហ្វេសប៊ុក ដែលស្និតនឹង គណបក្សប្រជាជនកម្ពុជារូបនេះ បានបរិហារសកម្មជនការពារបរិស្ថាន លោក អាឡិច ទៀតថា៖ «សួរថាកន្លងមក រយៈពេលដែល អាឡិច គេចខ្លួនពីអេស្ប៉ាញមកនៅខ្មែរ រយៈពេលប៉ុន្មាន​ឆ្នាំ​ហើយ ដែលមករស់នៅស្រុកខ្មែរ តើ អាឡិច បានធ្វើអ្វីខ្លះ គឺអាឡិចសម្ងំគេចខ្លួនទេ។ អញ្ចឹងទេ បងប្អូនក្រឡេក​មើល ដល់ពេលដែលក្រុមហ៊ុន ស៊ីណូហាយដ្រូ គេរៀបចំគម្រោងដាក់ទៅរដ្ឋាភិបាល គេសិក្សាហើយ។ គេសង់ គេ​មិន​មែន​យកភ្លើង ទៅប្រទេសចិន ឬទៅប្រទេសថៃឯណា។ គេធ្វើទំនប់វាអគ្គីសនី ដើម្បីឱ្យប្រជាពលរដ្ឋ នៅក្នុង​ខេត្ត​កោះកុង ក៏ដូចជាខេត្តជាប់ហ្នឹង ដូចជាកំពត ពោធិ៍សាត់ហ្នឹង ទទលបានភ្លើងអគ្គីសនី ប្រើប្រាស់ក្នុងតម្លៃ​ធូរ​ថ្លៃ។»

លោក សុផល បានបន្តទៀតថា៖ «ខ្ញុំរីករាយ ដែលលឺអ្នកវិនិយោទុន យកលុយរាប់លានដុល្លារ មកវិនិយោគជួយ​កម្ពុជា។ លុយដែលគេវិនិយោគ រាប់រយពាន់លាន គេដាក់ជួយប្រជាពលរដ្ឋខ្មែរ ឱ្យបានប្រើភ្លើងក្នុងតម្លៃធូរថ្លៃ បែរ​ជារលាយសាបសូន្យ ដោយសារតែបុរសពិរុទ្ធមា្នក់។»

ពាក់ព័ន្ធនឹងបញ្ហានេះដែរ លោក អាឡិចហ្សង់ដ្រូ ហ្គន់សាឡេស ដែលចេញមុខយ៉ាងសកម្ម ក្នុងការហាមឃាត់ មិន​ឱ្យមានការសាងសង់ ទំនប់វារីអគ្គីសនី បានបញ្ជាក់ថា គម្រោងវារីអគ្គីសនី នៅស្ទឹងឆាយអារ៉ែង គឺជាគម្រោង​«ខ្មោច»។ គម្រោងនេះ ចំណាយលុយច្រើន ប៉ុន្តែកម្លាំងថាមពលអគ្គីសនី ទទួលបានតិច។ លោកថា មូលហេតុ ដែល​នាំឱ្យក្រុមហ៊ុនចិន ស៊ីណូហាយដ្រូ បោះទុនវិនិយោគវារីអគ្គីសនី នៅក្នុងតំបន់អារ៉ែង ដោយសារតែក្រុមហ៊ុន​នេះ មានបំណងកាប់យកឈើ និងរុករករ៉ែតែប៉ុណ្ណោះ៕