ក្រុមយុវជន អ្នកគាំទ្រលោក អាឡិចហ្សង់ដ្រូ ហ្គន់ហ្សាឡេស ដេវិតសិន (Alejandro Gonzalez Davidson) សកម្មជន​បរិស្ថានជាតិអេស្ប៉ាញ បានស្វែងរកកិច្ចអន្តរាគមន៍ ពីរដ្ឋសភាជាតិ ជួយអន្តរាគមន៍ ដើម្បីជួយជនជាតិ​អេស្ប៉ាញម្នាក់នេះ ឲ្យបន្តទិដ្ឋាការ រស់រស់នៅក្នុងប្រទេសកម្ពុជា បានទៅទៀត។ លោក ហូរ វ៉ាន់ ប្រធាន​គណៈ​កម្មការទី១០ - លោក ញ៉យ ចំរើន សមាជិកគណៈកម្មការទី៥ និង លោក គង់ សភាសមាជិកគណ:កម្មការទី១ និងសុទ្ធជាតំណាងរាស្រ្ត មកគណបក្សសង្គ្រោះជាតិ បានចេញមកទទួលញត្តិ ពីក្រុមយុវជនទាំងនោះ។ ប៉ុន្តែ មិនមានវត្តមានមន្រ្តី ឬតំណាងរាស្រ្ត មកពីគណបក្សប្រជាជនកម្ពុជាណាម្នាក់ ចេញមកទទួលញត្តិ ពីក្រុម​យុវជន​ឡើយ។

ក្រៅពីក្រុមយុវជន ក៏នៅមានអង្គការសង្គមស៊ីវិលប្រមាណជិត២០០អង្គការ ក៏បានចេញសេចក្តី​ថ្លែងការណ៍​រួម​គ្នា​មួយ ដោយបានសូមសំណូមពរយ៉ាងទទូច ដល់រដ្ឋាភិបាលកម្ពុជា ពិសេសក្រសួងមហាផ្ទៃ ផ្តល់ទិដ្ឋាការជាថ្មី​ដល់​លោក អេឡិច អាចបន្តរស់នៅកម្ពុជាបានទៅទៀត។ ក្នុងសេចក្តីថ្លែងការណ៍នោះ បានសរសេរថា៖ «យើងខ្ញុំជា​អង្គការសង្គមស៊ីវិល សូមសំណូមពរយ៉ាងទទូច ដល់រាជរដ្ឋាភិបាល នៃព្រះរាជាណាចក្រកម្ពុជា ជាពិសេស​ក្រសួង​មហាផ្ទៃ មេត្តាបន្តទិដ្ឋាការដល់លោក អាឡិចហ្សង់ដ្រូ ហ្គន់ហ្សេលេស ដេវីដសុន ជនជាតិអេស្ប៉ាញ ជាអនុ​ប្រធានចលនាមាតាធម្មជាតិ និងជាសកម្មជនបរិស្ថាន ដើម្បីបន្តការស្នាក់នៅក្នុងប្រទេសកម្ពុជា និងចូលរួម​សកម្មភាពអភិរក្ស និងការពារធនធានធម្មជាតិ នៅតំបន់អារ៉ែងបន្តទៀត។»

ក្រុមអង្គការសង្គមស៊ីវិល បានសរសេរបន្តថា លោក អេឡិចហ្សង់ដ្រូ ជាជនបរទេសមួយរូប ដែលកំពុងចូលរួម​សកម្មភាពថែរក្សា និងការពារធនធានធម្មជាតិ យ៉ាងសកម្មនៅក្នុងប្រទេសកម្ពុជា។ សកម្មភាពនេះ ត្រូវបាន​អង្គការ​សង្គមស៊ីវិលជាតិ និងអន្តរជាតិ ក្រុមយុវជនការពារបរិស្ថាន ប្រជាពលរដ្ឋកម្ពុជាមួយចំនួននៅក្នុង និងក្រៅ​ប្រទេស ជាពិសេស សហគមន៍តំបន់ ឆាយអារ៉ែង ទទួលស្គាល់ និងគាំទ្រនូវសុឆន្ទៈ និងសមិទ្ធិផលរបស់គាត់ ដូច​ជា ការលើកកំពស់ចំណេះដឹង ដល់សហគមន៍ពីសិទ្ធិស្របច្បាប់ វប្បធម៌ ប្រពៃណី និងធនធានធម្មជាតិ។

លោក អេឡិច ត្រូវបានវិទ្យុសម្លេងប្រជាធិបតេយ្យ ធ្វើការស្រង់មតិពីប្រជាពលរដ្ឋ យុវជន ក្នុង​ការ​គាំទ្រលោកឲ្យ​រស់នៅបន្តក្នុងទិកដីកម្ពុជា។ សំនួរស្ទង់មតិ ដែលវិទ្យុមួយនេះសួរថា៖ «តើអ្នកយល់ស្រប នឹងការ​សម្រេច​របស់​រដ្ឋាភិបាលកម្ពុជា ក្នុងការបណ្តេញសកម្មជន ការពារបរិដ្ឋាន នៅតំបន់អារ៉ែង លោក អាឡិចហ្សង់ដ្រូ ហ្គន់ហ្សេលេស ដេវីដសុន ចេញពីប្រទេសកម្ពុជាឬទេ?» បានទទួលចម្លើយមកវិញថា ៩៨ភាគរយ«មិន»គាំទ្រ ១ភាគរយមិនដឹង និង១ភាគរយទៀតមិនគាំទ្រ។

ទាក់ទងនឹងករណីនេះ លោក ផៃ ស៊ីផាន រដ្ឋលេខាធិការ និងជាអ្នកនាំពាក្យទីស្តីការគណៈរដ្ឋមន្ត្រី បានសរសេរ​ក្នុងបណ្តាញសង្គមរបស់លោក បាញ់ឆ្ពោះទៅរកលោក សម រង្ស៊ី ប្រធានបក្សប្រឆាំង និងលោក កឹម សុខា អនុ​ប្រធានទីមួយនៃរដ្ឋសភា ដែលថ្វាយលិខិតជូនព្រះមហាក្សត្រកម្ពុជា ដើម្បីជួយអន្តរាគមន៏ដល់លោក អេឡិច បានបន្តរស់នៅក្នុងប្រទេសកម្ពុជា ដោយហៅលោកទាំងពីរថា មាន«ធាតុបរទេស»។ លោកបានសរសេរ​ដូច្នេះ​ថា៖ «លិខិតចំហរគោរពជូន ឯ.ឧ ប្រធាន និងអនុប្រធាន CNRP យើងខ្ញុំមិនបោះបង់អធិបតេយ្យភាពជាតិ ហែក​ច្បាប់អន្តោប្រវេសន៏ចោល ដែលមានព្រះហត្ថលេខាព្រះមហាក្សត្រខ្មែរ ប្តូរតម្លៃស្ថាប័នរដ្ឋ ដើម្បីជនបរទេស​ម្នាក់​នោះទេ។ បើ ឯ.ឧ ទាំងពីរ មានធាតុខ្ញុំបរទេស សូមមេត្តាចាកចេញ ទៅនៅប្រទេសក្រៅទៅចុះ កុំនាំយើងខ្ញុំ​ថោក។ (…) ពីយើងខ្ញុំមន្ត្រីរាជការ និងប្រជាពលរដ្ឋឯករាជ្យ។»

សូមរំលឹកដែរថា ថ្មីៗនេះ អ្នកនាំពាក្យក្រសួងមហាផ្ទៃ លោក ខៀវ សុភ័គ បាននិយាយថាក្រសួង មិនបាន​ដេញ​លោក អេឡិច ពីកម្ពុជាទេ តែសំណូមពរសុំឲ្យលោក (អាឡិច) ចាកចេញពីកម្ពុជា ជាបណ្តោះអាសន្នសិន។ បន្ទាប់​មក សឹមដាក់ពាក្យស្នើរសុំទិដ្ឋាការ ចូលមកកម្ពុជាជាថ្មីវិញ៕