ពិត​ហើយ! ពិត​ជា​មាន​ការ​ដោះ​លែង ឪពុក​ម្តាយ​របស់​លោក​ឧកញ៉ា ថោង សារ៉ាត់ ប្រាកដ​មែន។ ប៉ុន្តែ​មក​ទល់​ពេល​នេះ មូលហេតុ​នៃ​ការ​ដោះ​លែង​យ៉ាង​ណា​នោះ នៅ​មិន​ទាន់​ឲ្យ​ដឹង​នៅ​ឡើយ ព្រោះ​ថា​ដីកា​ដោះ​លែង ឲ្យ​នៅ​ក្រៅ​ឃុំ​ជា​បណ្តោះ​អាសន្ន ត្រូវ​បាន​គេ​លាក់​ជា​អាថ៌កំបាំង និង​មិន​ទាន់​ឲ្យ​មាន​ការ​បែក​ធ្លាយ​អ្វី​ឡើយ។ នេះ​ជា​ការ​អះអាង​របស់ លោក អំ សំអាត ប្រធាន​ផ្នែក​បច្ចេកទេស​ស៊ើប​អង្កេត របស់​អង្គការ​ការពារ​សិទ្ធិ​មនុស្ស​លីកាដូ។

ថ្លែងក្នុងកិច្ចសម្ភាស ជាមួយទស្សនាវដ្តីមនោរម្យ.អាំងហ្វូ នាព្រឹកថ្ងៃទី៩ ខែកុម្ភៈនេះ លោក អំ សំអាត បានធ្វើ​ការ​ធៀបទៅនឹងករណីអ្នកបឹងកក់ថា អ្នកបឹងកក់ដែលទាមទារនូវជម្រកសមរម្យ និងបិទផ្លូវមួយចំណែក ដែល​ជា​ទោសមជ្ឈឹមកម្រិតស្រាលបំផុត បែរជាត្រូវបានតុលាការសម្រច ដាក់ទោសកម្រិតធ្ងន់ធ្ងរបំផុត និងមិនទាំង​ឲ្យនៅក្រៅឃុំថែមទៀត។ ដោយឡែកឪពុកម្តាយលោក ថោក សារ៉ាត់ វិញ ដែលមានទោសមជ្ឈឹមធ្ងន់ធរបំផុត បែរជាត្រូវបានទទូលកម្រិត«ទោស»ស្រាលបំផុតទៅវិញ ហើយថែមទាំងអនុញ្ញាតិឲ្យនៅក្រៅឃុំថែមទៀត។

មន្រ្តីសង្គមស៊ីវិលដ៏ល្បីឈ្មោះ បានបញ្ជាក់ដូច្នេះថា «ប្រព័ន្ធតុលាការមិនមានតម្លាភាពពិតប្រាកដ ហើយស្ថិត​ក្រោមសម្ភាធអ្នកនយោបាយ។ ពិសេសរឿងនេះ មានសម្ពាធយោបាយហើយ មានសម្ភាធផ្សេងទៀត ដែល​នាំឲ្យមានការដោះលែងឲ្យនៅក្រៅឃុំ។» លោកបានពន្យល់ទៀតថា៖ «អ្នកណាដែលអាជ្ញាធរ ឬរដ្ឋាភិបាល​គ្មានការគុំគួន ដោះលែងទៅ។ ឯអ្នកបឹងកក់ មានគំនុំ (អាជ្ញាធរ ឬរដ្ឋាភិបាល) បើឲ្យនៅក្រៅឃុំ នឹងធ្វើបាតុកម្ម ចឹងមិនចាំបាច់ឲ្យនៅក្រៅទេ ដាក់ពន្ធនាគារតែម្តងទៅ។»

លោកបានចាត់ទុកថា តុលាការសព្វថ្ងៃក៏មិនបានបង្ហាញថា ត្រង់ណាដែលជាការអនុវត្តដោយយុត្តិធម៌ និង​ភាពស្មោះគ្នាចំពោះមុខច្បាប់នោះទេ។ លោកថ្លែងថាមួយម៉ាត់យ៉ាងខ្លី គឺ«គ្មាន»។ ពាក់ព័ន្ធក្នុងរឿងដោះលែង​ឪពុកម្តាយលោក ថោង សារ៉ាត់ នេះ លោកបានដាក់ការសង្ស័យថា ពិតជាអ្នកណាម្នាក់ នៅពីក្រោយនៃការ​ដោះលែងនេះ។ លោកមិនបានបង្ហាញត្រង់ឆ្ពោះទៅក្រុមណា ឬបុគ្គលណាម្នាក់ឡើយ គ្រាន់តែលោកដាក់​ជា​សំនួរវិញថា៖ «យើងដឹងហើយថា ពួកគាត់ជាអ្នកណា? នោះពិតជាមានភាពមិនប្រក្រតី និងឥទ្ធិពល​មក​ហើយ។»

សូមបញ្ជាក់ថា ឪពុកម្តាយលោក ថោង សារ៉ាត់ ដែលសមត្ថកិច្ចរកឃើញថា មានជាប់ពាក់ព័ន្ធ​នឹងការ​រក្សា​អាវុធ​ខុសច្បាប់នោះ ត្រូវបានលោក លី សុខឡេង ចៅក្រមស៊ើបសួរសាលាដំបូងរាជធានីភ្នំពេញ ចេញដីកា​ដោះ​លែង ឲ្យនៅក្រៅឃុំជាបណ្តោះអាសន្ន កាលពីថ្ងៃ ៦ ខែកុម្ភះ។ អ្នកទាំងពីរ ត្រូវបានដោះលែងជាផ្លូវការ នៅព្រឹក​ថ្ងៃទី៧ ខែកុម្ភៈ។

ទស្សនាវដ្តីមនោរម្យ.អាំងហ្វូ មិនអាចសុំការបញ្ជាក់ពីសហវេធាវីទាំងបួន ការពាឪពុកម្តាយលោក ថោង សារ៉ាត់ បានទេនាព្រឹកនេះ។ លោកមេធាវី ម៉ន កែវស៊ីវិន - មេធាវី ថុង អ៊ីវហេង - មេធាវី ស៊ី សត្យា មិនអាច​ទំនាក់​ទំនង​បាន ឯមេធាវី គា អ៊ាវ មិនអាចឆ្លើយបាន ព្រោះលោកកំពុងជាប់សវនាការ។

យោងតាមការបញ្ជាក់របស់តំណាងអយ្យកា នៃសាលាដំបូងរាជធានីភ្នំពេញ លោក មាស ច័ន្ទពិសិដ្ឋ ប្រាប់​សារព័ត៌មានក្រុងស្រុកមួយថា លោក លី សុខឡេង ចៅក្រមស៊ើបសួរ ពិតជាបានសម្រេចដោះលែងឪពុកម្ដាយ ថោង សារ៉ាត់ ឲ្យនៅក្រៅឃុំបណ្តោះអាសន្នប្រាកដមែន។ តែករណីនៃការដោះលែងនេះ មិនបានបញ្ជាក់​ដោយ​យោងពីមូលហេតុអ្វីឡើយ។

រីឯលោក នី ចរិយា ប្រធានផ្នែកអង្កេត របស់សមាគមការពារសិទ្ធិមនុស្សអាដហុក បានបង្ហាញតាមផ្លូវច្បាប់ថា ការដោះលែងនេះ មិនត្រឹមតែបង្ហាញ នូវភាពមិនប្រកតី ហើយថែមទាំងបំពាន«ច្បាប់» ឬនីតិវិធីច្បាប់ យ៉ាង​ធ្ងន់ធ្ងរនោះទៀត។ នេះបើគេយោង តាមការសម្រេចរបស់ សាលាឧទ្ធរណ៍ ដែលបានច្រានចោល ការសុំនៅ​ក្រៅឃុំនាពេលថ្មីៗនេះ។ លោក ចរិយា បានថ្លែងប្រាប់ទស្សនាវដ្ដីថា៖ «ការសម្រេចឲ្យអ្នកទាំងពីនៅក្រៅឃុំ បង្ហាញពីភាពមិនឯករាជ្យរបស់តុលាការ ព្រោះអ្នកដែលមានជម្លោះដីធ្លីបឹងកក់១០នាក់ និងសកម្មជន​បក្ស​នយោបាយ ព្រះសង្ឃ ដែលទាមទារសិទ្ធិសេរីភាព មិនឲ្យនៅក្រៅឃុំ បែរជាអ្នករក្សាអាវុធខុសច្បាប់ ឲ្យនៅ​ក្រៅ​ឃុំទៅវិញ។»

ចំពោះក្រុមអ្នកប្រើប្រាស់បណ្តាញសង្គមវិញ បានធ្វើការបកស្រាយផ្សេងៗគ្នា ទៅលើការដោះលែងនេះ។ មាន​គណនីហ្វេសបប៊ុកមួយ បានសរសរដោយមិនបានបញ្ជាក់ ប្រភពច្បាស់លាស់ថា ការដោះលែងនេះ ដោយសារ​មានគំនាបខាងនយោបាយ និងទំនងស្ថិតក្រោម ការដាក់សម្ពាធរបស់ប្រធានាធិបតីវៀតណាម លោក ជឿង តាំងសាង មកលើ លោកនាយករដ្ឋមន្ត្រីលោក ហ៊ុន សែន៕