បវរកញ្ញាចក្រវាឡឆ្នាំ២០១៤ថ្មី៖ ចំណុចទាំងប្រាំ ដែលអ្នកមិនដឹង (vdo)
- ដោយ: ឈូករ័ត្ន អត្ថបទ៖ ឈូករ័ត្ន ( [email protected]) - ប៉ារីស ថ្ងៃទី២៦ មករា ២០១៥
- កែប្រែចុងក្រោយ: January 27, 2015
- ប្រធានបទ: រាជនីសម្ផស្ស
- អត្ថបទ: មានបញ្ហា?
- មតិ-យោបល់
-
បររកញ្ញាមកពីប្រទេសកូឡំប៊ី កញ្ញា ប៉ូលីណា វេហ្គា (Paulina Vega) ក្នុងវ័យ២២ឆ្នាំ ត្រូវបានជ្រើសរើសជាបវរកញ្ញា ចក្រវាឡឆ្នាំ២០១៤ កាលពីយប់ថ្ងៃទី២៥ ខែមករា ចុងសប្ដាហ៍កន្លងទៅនេះ ក្នុងក្រុង ដ័រ៉ាល (Doral ស្ថិតនៅជាយក្រុង មីអាមី) រដ្ឋផ្លរីដា សហរដ្ឋអាមេរិក។ ជ្រើសចេញពីបេក្ខនារី៨៧នាក់ផ្សេងទៀត នាង វេហ្គា បានចូលមកជំនួសតំណែង ពីបវរកញ្ញាចក្រវាឡឆ្នាំទៅម៉ិញ ដែលបានជាប់ទៅលើបវរកញ្ញា មកពីប្រទេសវ៉េណេហ្សុអេឡា នាង ហ្គាប្រ៊ីអេឡា អ៊ីស្ល័ (Gabriela Isler)។
ខាងក្រោមនេះ ជាចំណុចទាំងប្រាំ ដែលលោកអ្នកមិនបានដឹង (ឬក៏ដឹងហើយ តែអានឲ្យដឹងម្ដងទៀត) ពីបវរកញ្ញាឆ្នាំ២០១៤ដ៏ប្រិមប្រិយម្នាក់នេះ៖
១) នាង ប៉ូលីណា វេហ្គា មានជីដូនជីតាជាមនុស្ស«ល្បី»
នាងប្រាកដជាមានមោទនភាពណាស់ ដោយបានកើតមកនៅក្នុងត្រកូល នៃគ្រួសារមួយដែលមានកេរ្ត៍ឈ្មោះដ៏ល្បី សម្រាប់ប្រទេសរបស់នាង។ នាង ប៉ូលីណា ជាចៅស្រីរបស់លោក ហ្គាស្ដុង វេហ្គា (Gaston Vega) ដែលធ្លាប់ស្គាល់ថា ជាតន្ត្រីករដ៏ចំណានឯកទេសខាងផ្លុំត្រែធំ។ រីឯជីដូនរបស់នាងវិញ លោកយាយ អេវៀរ៉ា កាស្ទីយ៉ូ (Elvira Castillo) ធ្លាប់ជាប់ជាបវរកញ្ញា នៃក្រុង អាត្លង់ទីកូ ឆ្នាំ១៩៥៣។
២) នាង ប៉ូលីណា វេហ្គា ជាកូនរបស់គ្រួសារមានសមាជិកច្រើន
គ្មានអ្វីប្រសើរជាង កើតមកមានបងប្អូនជុំជិត យ៉ាងត្រជាក់ត្រជុំនោះទេ។ តែក៏មិនមែនមានន័យថា មានសមាជិកដល់ទៅរាប់មិនអស់នោះដែរ ព្រោះនាង ប៉ូលីណា មានបងប្អូន៦នាក់ ស្រីបីនាក់ និងប្រុស៣នាក់ រស់សនៅក្រោមដំបូងឪពុកម្ដាយរបស់នាង ដែលមានជីវភាពធូរធាគ្រាន់បើ។
៣) នាង ប៉ូលីណា វេហ្គា កើតនៅក្នុងភូមិស្រុកតែមួយ ជាមួយអ្នកចម្រៀងល្បី សាគៀរ៉ា (Shakira)
ដូចអ្នកចម្រៀងល្បី នាង សាគៀរ៉ា ដែលមានដើមកំណើតជាជនជាតិកូឡំប៊ីដែរនោះ នាង ប៉ូលីណា បានចាប់កំណើតមកលើភពផែនដី នៅក្នុងក្រុងមួយឈ្មោះថា បារ៉ានគីឡា (Barranquilla) ដែលស្ថិតនៅភាគខាងជើង នៃប្រទេស។ បើនិយាយមកដល់នេះ អ្នកស្រុកអ្នកភូមិនៅទីនោះ ប្រាកដជាមានមោទនភាពមិនតិចទេ នឹងកូនចៅរបស់ពួកគេ ដែលសុទ្ធតែបានក្លាយជាតារាល្បីៗរបស់ពិភពលោក។
៤) នាង ប៉ូលីណា វេហ្គា បានក្លាយជាបវរកញ្ញាកូឡំប៊ីទីពីរ ដែលជាប់ជាបរវកញ្ញាចក្រវាឡ
មុននាង ប៉ូលីណា មានតែបរវកញ្ញារបស់ប្រទេសកូឡំប៊ីតែម្នាក់ទេ ដែលធ្លាប់ជាប់ជាបរវកញ្ញាចក្រវាឡដែរ។ នោះគឺនាង លូស៍ ម៉រីណា ហ្សូលូហ្សា (Luz Marina Zuluaga) ដែលទទួលបានតំណែងនេះ នៅឆ្នាំ១៩៥៨។
៥) នាង ប៉ូលីណា វេហ្គា មានបំណងពិសេសនេះ យូរមកហើយ
បើទោះជានាងបានក្លាយជាតារាបង្ហាញម៉ូដ តាំងពីអាយុ៨ឆ្នាំ ប៉ុន្តែមហិច្ឆតាររបស់នាង ដែលថានឹងយកតំណែងជាបវរកញ្ញានេះ បានរក្សាទុកនៅក្នុងក្បាលជាយូរមកហើយ។ មិនត្រឹមតែមានរូបរាងស្អាតទេ តែនាង ប៉ូលីណា វេហ្គា ក៏ជានិស្សិតផ្នែកការគ្រប់គ្រង នៅសកលវិទ្យាល័យ ចាវើរៀណា (Javeriana) មួយរូបដែរ។ នាងចេះនិយាយបួនភាសា៖ អេស្បាញ៉ុល អង់គ្លេស អល្លឺម៉ង់ និងភាសាបារាំង៕