ប្រសូតបុត្រីនៅលើអាកាស កណ្ដាលមហាសមុទ្រអាត្លង់ទិក
- ដោយ: ដារី អត្ថបទ៖ ដាវី ([email protected]) - ប៉ារីស ថ្ងៃទី២៣ មករា ២០១៥
- កែប្រែចុងក្រោយ: January 25, 2015
- ប្រធានបទ: រំភើប
- អត្ថបទ: មានបញ្ហា?
- មតិ-យោបល់
-
បើតាមអាជ្ញាធរគ្រប់គ្រងព្រលានយន្ដហោះនៃទីក្រុងញ៉ូយក បានឲ្យដឹងថា ស្ត្រីជាម្ដាយជាតិហ្សកដានី បានធ្វើដំណើរនៅលើយន្ដហោះប៊ូអីង (Boeing) របស់ក្រុមហ៊ុនភូមិន្ទហ្សកដានី ដែលភ្ជាប់ជើងហោះហើរលេខ RJ261។ នៅពេលចុះចតនៅទីក្រុងញ៉ូយក យន្ដហោះបានបន្ថែមអ្នកដំណើរតូចមួយនាក់ទៀត នោះគឺកូនស្រីដែលទើបនឹងចាប់កំណើតនេះឯង។
អ្នកនាំពាក្យរបស់អាជ្ញាធរព្រលានយន្ដហោះ លោក ចូ ផេនតាជេឡូ (Joe Pentangelo) បានថ្លែងពន្យល់ថា ទារិកាបានកើតនៅថ្ងៃអង្គារ រវាងពីម៉ោង១៧ និង៣០នាទី ម៉ោងនៅទីក្រុងញ៉ូយក ខណៈពេលដែលយន្ដហោះកំពុងហោះរំលងមហាសមុទ្រអាត្លង់ទិក។ លោកបាននិយាយថា៖ «បើតាមអ្វីដែលជារបាយការណ៍របស់គ្រូពេទ្យ មានវត្តមាននៅលើយន្ដហោះ ការប្រសូត្របានដំណើរការទៅ យ៉ាងឆាប់រហ័ស»។
ចំណែកក្រុមហ៊ុនអាកាសចរណ៍ភូមិន្ទហ្សកដានីវិញ បានថ្លែងក្នុងសេចក្ដីប្រកាសព័ត៌មានរបស់ខ្លួនថា នៅពេលដែលទទួលដំណឹងថា មានស្ត្រីឈឺពោះចង់ឆ្លងទន្លេ មេបញ្ជាការបើកបរយន្ដហោះ មានបំណងចង់ធ្វើការចុះចតជាបន្ទាន់ នៅលើកោះមួយនៃប្រទេសកាណដា។ ប៉ុន្តែដំណឹងបានផ្លាស់ប្ដូរជាសេចក្ដីសប្បាយរីករាយវិញ បន្ទាប់ពីបានដឹងថា ការប្រសូតបានប្រព្រឹត្តិទៅដោយគ្មានបញ្ហាអ្វី។
ក្រុមហ៊ុនបានបញ្ជាក់ថា ខ្លួនបានដឹងពីការពរពោះរបស់ស្ត្រីវ័យក្មេង ថាទើបតែមានរយៈពេល ៣១សប្ដាហ៍ប៉ុណ្ណោះ។ ប៉ុន្តែទារិការ ទំនងជាបានប្រសូតចេញមក មុនកាលកំណត់។ សេចក្ដីប្រកាសព័ត៌មានបានសរសេរទៀតថា៖ «ការប្រសូតបានធ្វើទៅយ៉ាងរហ័ស ដោយរលូន ព្រោះមានជំនួយពីគ្រូពេទ្យឯកទេសមួយរូប ជំនួយការពេទ្យម្នាក់ទៀត ដែលអ្នកទាំងពីរបានជិះយន្ដហោះជាមួយគ្នាដែរ និងជំនួយពីសំណាក់បុគ្គលិកបម្រើការ នៅលើយន្ដហោះ»។
បន្ទាប់ពីហោះហើរ ក្នុងរយៈពេល១១ម៉ោងនិង៣០នាទី យន្ដហោះបានចុះចតនៅព្រលានយន្ដហោះ JFK នៃទីក្រុងញ៉ូយក ហើយទាំងម្ដាយនិងទារិកា ត្រូវបានបញ្ជូនជាបន្ទាន់ទៅកាន់មន្ទីរពេទ្យ។ ដំណឹងចុងក្រោយបានអះអាងថា អ្នកទាំងពីរ នៅមានសុខភាពល្អជាធម្មតា។ ប៉ុន្តែអ្វីដែលពិបាកនឹងធ្វើការបញ្ជាក់នោះ គឺសញ្ជាតិរបស់ទារិកា។ សម្រាប់សហរដ្ឋអាមេរិក គ្រប់ពលរដ្ឋដែលកើតនៅលើទឹកដីខ្លួន នឹងទទួលបានសញ្ជាតិអាមេរិកាំង ជាលក្ខណៈស្វ័យប្រវត្តិ។ តែចំពោះទារិកា ដែលកើតនៅលើលំហសមុទ្រអន្តរជាតិម្នាក់នេះ នៅមិនទាន់ដឹងថា តើនាងតូចនឹងមានសញ្ជាតិអ្វីនៅឡើយ៕