ស្ពានអ្នកលឿង ជាស្ពានកាបយោងដំបូងនៅកម្ពុជា (vdo)
- ដោយ: អ៊ុម វ៉ារី អត្ថបទ និងយកការណ៍៖ អ៊ុម វ៉ារី ([email protected]) - ភ្នំពេញ ថ្ងៃទី១៤ មករា ២០១៤
- កែប្រែចុងក្រោយ: January 14, 2015
- ប្រធានបទ: ហេដ្ឋារចនាសម្ព័ន្ធ
- អត្ថបទ: មានបញ្ហា?
- មតិ-យោបល់
-
ស្ពានអ្នកលឿង ជាស្ពានប្រភេទខ្សែកាបទីមួយនៅកម្ពុជា ដែលស្ថាបនាឡើងដើម្បីតភ្ជាប់ផ្លូវជាតិលេខ១ ដោយឆ្លងកាត់ទន្លេមេគង្គពីស្រុកលើកដែក ខេត្តកណ្ដាល ទៅស្រុកពាមរក៍ ខេត្តព្រៃវែង។ ស្ពាននេះមានបណ្តោយប្រវែង ២.២២០ម៉ែត្រ និងទទឹង ១៣,៥០ម៉ែត្រ និងចំណាយថវិកាប្រមាណជា៩៥លានដុល្លារ អាមេរិក។ ស្ពានអ្នកលឿង ជាស្ពានទី៣ក្រោមជំនួយរបស់ប្រទេសជប៉ុន បន្ទាប់ពីស្ពានជ្រោយចង្វារ (សាងសង់ឆ្នាំ១៩៦៦ និងជួសជុលឡើងវិញក្នុងឆ្នាំ១៩៩៥) និងស្ពានគីហ្ស៊ូណា ដែលបានដាក់ឲ្យដំណើរក្នុងឆ្នាំ២០០១។
នាព្រឹកថ្ងៃទី១៤ ខែមករា ឆ្នាំ២០១៤នេះ លោកនាយករដ្ឋមន្រ្តី ហ៊ុន សែន រួមជាមួយលោកអនុរដ្ឋមន្ត្រីការបរទេសជប៉ុន លោក កាហ្សុយគី ណាកាន (Kazuyki Nakane) បានចូលរួមចាក់តំណភ្ជាប់បេតុងតួស្ពានអ្នកលឿង ឬស្ពានស៊ូបាសា ដែលជាជំនួយឥតសំណងរបស់រដ្ឋាភិបាលជប៉ុន រួមនឹងប្រាក់បដិភាគរបស់រដ្ឋាភិបាលកម្ពុជាដែរ។
លោកនាយករដ្ឋមន្រ្តីហ៊ុន សែន បានលើកឡើងថា ស្ពានអ្នកលឿងត្រូវបានសាងសង់ឡើង ក្រោមការយោងដោយខ្សែកាបលើកសងខាង ដែលបង្ហាញពីកិច្ចសហប្រតិបត្តិការ រវាងកម្ពុជា-ជប៉ុន ឈានទៅរកភាពរុងរឿងនាពេលអនាគត។ លោកបានប្រសិទ្ធនាមស្ពានអ្នកលឿងនេះ ថាជា«ស្ពានស៊ូបាសា»។
ក្នុងពីធីតភ្ជាប់ស្ពានអ្នកលឿងនេះ លោក ហ៊ុន សែន ក៏បានប្រកាសដាក់ឲ្យប្រើប្រាស់នូវប្រភេទក្រដាសប្រាក់ថ្មី ដែលមានតម្លៃ ៥០០រៀល ដើម្បីអបអរសាទរដល់ខួប៦០ឆ្នាំនៃសាមគ្គីភាពកម្ពុជា-ជប៉ុន។ ក្រដាសប្រាក់ប្រភេទថ្មីនេះ ក៏មានបញ្ចូលនូវរូបភាពស្ពានអ្នកលឿង(ស្ពានស៊ូបាសា) និងស្ពានគីហ្សូណា (ខេត្តកំពង់ចាម) ផងដែ។
លោកនាយករដ្ឋមន្រ្តីថាស្ពានអ្នកលឿង មិនមែនតែជាតម្រូបការរបស់ ពលរដ្ឋខេត្តកណ្តាល និង ខេត្តព្រៃវែងទេ ក៏ជាតម្រូវការរបស់ប្រជាពលរដ្ឋ ទូទាំងប្រទេសផងដែរ។ ពិសេសស្ពានអ្នកលឿងនេះ ក៏ជាស្ពានសេដ្ឋកិច្ច សម្រាប់ការដឹកជញ្ជូនទំនិញរវាងកម្ពុជា-វៀតណាម តាមផ្លូវជាតិលេខ១។ ហើយក៏ជាតំណរភ្ជាប់ហាយវ៉េ ក្នុងមហាអនុតំបន់មេគង្គ ដើម្បីដឹកជញ្ជូនតាមផ្លូវគោក រវាងប្រទេសចំនួនប្រាំមួយរួមមាន កម្ពុជា វៀតណាម ឡាវ ថៃ មីយ៉ាន់ម៉ា និងប្រទេសចិន។
សូមរំលឹកថាស្ពានអ្នកលឿង នារដូវវស្សាមានកម្ពស់ផុតពីផ្ទៃទឹក ចំងាយ៣៧,៥០ ម៉ែត្រ។ តួស្ពានកណ្តាលយោងដោយខ្សែកាបចំនួន១៦០ខ្សែ ដែលមានប្រវែងសរុប៦៤០ម៉ែត្រ។ ស្ពានខ្សែរកាបនៅកម្ពុជានេះ ជាស្ពានវែងបំផុត បើធៀបទៅនឹងស្ពានខ្សែកាបនៅជប៉ុន។ ស្ពានអ្នកលឿង ឬស្ពានស៊ូបាសា អាចមានគុណភាពលើសពី១០០ឆ្នាំ។ ស្ពាននេះ ត្រូវបានស្ថាបនាឡើងដោយអ្នកជំនាញផ្នែកសំណង់ស្ពាន មកពីប្រទេសជប៉ុនចំនួន៩នាក់ រួមទាំងមន្ត្រី-វិស្វករចំនួន៥៧នាក់ ក្នុងនោះមានបរទេសចំនួន២៥នាក់ និងប្រើប្រាស់នូវកម្មករសរុបប្រមាណ ៦៤៧នាក់។
សូមទស្សនាវីដេអូដែលពាក់ព័ន្ធស្ពានអ្នកលឿង៖