ប៉ែន សុវណ្ណ និង​ថាច់ សេដ្ឋា ត្រូវ​​បាន​ហាម​មិន​​ឲ្យ​​ចូល​​ទឹក​​ដី​​អាមេរិក

លោក ថាច់ សេដ្ឋា ​សមាជិក​គណៈកម្មាធិការ​អចិន្រៃ្តយ៍ និង លោក ប៉ែន សុវណ្ណ តំណាងរាស្ត្រ​របស់​គណបក្ស​សង្គ្រោះ​ជាតិ ត្រូវបានសហរដ្ឋអាមេរិកដាក់ឈ្មោះនៅក្នុងបញ្ជីខ្មៅ ( Black list ) ដែលត្រូវរហាមឃាត់ មិនឲ្យចូលទៅក្នុង​ទឹក​ដី​អាមេរិក។
Loading...
  • ដោយ: ក. វិច្ចនី អត្ថបទ និងយកការណ៍៖ ក. វិច្ចនី ([email protected]) - ភ្នំពេញ ថ្ងៃទី ០៩ មករា ២០១៥
  • កែប្រែចុងក្រោយ: January 09, 2015
  • ប្រធានបទ: ជនល្បី
  • អត្ថបទ: មានបញ្ហា?
  • មតិ-យោបល់

បើទោះ​បី​ជា​អ្នក​ទាំង​ពីរ មាន​លិខិត​ឆ្លង​ដែន​ជា​លក្ខណៈ​ការ​ទូត ក្នុង​ឋានៈ​ជា​សមាជិក​សភា ឫ​ព្រឹទ្ធ​សភា តែ​លោក ប៉ែន សុវណ្ណ តំណាងរាស្ត្រ​មណ្ឌល​កំពង់ស្ពឺ និង​លោក ថាច់ សេដ្ឋា ​សមាជិក​​គណៈកម្មាធិការ​​អចិន្រៃ្តយ៍ របស់​គណបក្ស​សង្គ្រោះ​ជាតិ មិន​អាច​ជាន់​ដី​សហរដ្ឋ​អាមេរិក​បាន​ឡើយ ក្នុង​ពេល​នេះ។ មន្ត្រី​ជាន់​ខ្ពស់​ទាំង​ពីរ​រូប​របស់​គណបក្ស​ប្រឆាំង ត្រូវ​បាន​សហរដ្ឋ​អាមេរិក ចាត់​ឈ្មោះ​ចូល​ទៅ​ក្នុង​បញ្ជី​ខ្មៅ ដែល​ត្រូវ​បាន​ហាម​ប្រាម មិន​ឲ្យ​ជាន់​ទឹកដី​អាមេរិក​ឡើយ។

លោក ប៉ែន សុវណ្ណ បាន​ថ្លែង​អះ​អាង​ប្រាប់​ទស្សនាវដ្តី​មនោរម្យ.អាំងហ្វូ​ថា ការ​ដាក់​ឈ្មោះ​លោក នៅ​ក្នុង​បញ្ជី​ខ្មៅ​របស់​អាមេរិក វា​ជា​រឿង​ពិត។ លោក​បាន​បញ្ជាក់​ថា រដ្ឋាភិបាល​អាមេរិក​បាន​ចោទ​ប្រកាន់​លោក ពី​បទ​រត់​ពន្ធ​មនុស្ស។ ប៉ុន្តែ​លោក​ថា វា​មិន​មែន​ដូច​អ្វី​ដែល​គេ​ចោទ​ប្រកាន់​លោក​នោះ​ទេ ដោយ​លោក​គ្រាន់​តែ​នាំ​យក​មនុស្ស​ពី​កម្ពុជា ទៅ​ជួយ​ធ្វើការ​ឲ្យ​លោក នៅ​សហរដ្ឋ​អាមេរិក​តែ​ប៉ុណ្ណោះ ហើយ​លោក​មិន​បាន​ដឹង ពី​ចិត្ត​គំនិត​អ្នក​ទាំង​នោះ ដែល​មិន​ចង់​វិល​ត្រឡប់​មក​ស្រុក​ខ្មែរ​វិញ​នោះ​ទេ។

លោកនិយាយថា ដោយសារការមិនវិលត្រឡប់របស់អ្នកទាំងនោះហើយ ដែលធ្វើឲ្យអាមេរិកចោទ​ប្រកាន់​រូប​លោក និងបានធ្វើឲ្យលោក មិនអាចចេញចូលក្នុងទឹកដីសហរដ្ឋអាមេរិកបាន។

ការដាក់ឈ្មោះលោក ប៉ែន សុវណ្ណ និងលោក ថាច់ សេដ្ឋា នៅក្នុងបញ្ជីខ្មៅរបស់អាមេរិកនេះ ត្រូវបានទំព័រ​ហ្វេសប៊ុករបស់ចលនាអំណាចពលរដ្ឋខ្មែរ ដែលមានទីតាំងនៅសហរដ្ឋអាមេរិក យកមកចុះផ្សាយ កាលពីព្រឹក​ថ្ងៃទី០៩ ខែមករានេះ ហើយជំរុញឲ្យមានអ្នកប្រើប្រាស់បណ្ដាញសង្គម ចែករំលែក និងធ្វើការផ្ដល់​ជា​យោបល់​ខុសៗគ្នា។ ប៉ុន្តែទំព័រដែលមិនសូវនិយាយល្អ ពីគណបក្សប្រឆាំងមួយនេះ បានផ្សាយថា ការហាមឃាត់លោក ប៉ែន សុវណ្ណ មិនឲ្យទៅជាន់ដីសហរដ្ឋអាមេរិក ដោយសារនិយាយកុហក រឿងថាខ្លួនជាប់គុកងងឹតនៅប្រទេស​វៀតណាម អស់រយៈពេលជាង ១០ឆ្នាំ។ រីឯលោក ថាច់ សេដ្ឋា ត្រូវបានទំព័រដដែលសរសេរថា អាមេរិកចោទ​មន្ត្រីជាន់ខ្ពស់គណបក្សសង្គ្រោះជាតិរូបនេះ ថាបានប្រព្រឹត្តបទឧក្រិដ្ឋកម្មជួញដូរមនុស្ស ឫរត់ពន្ធមនុស្ស​ពីស្រុក​ខ្មែរ ចូលទៅក្នុងសហរដ្ឋអាមេរិក។

ប៉ុន្តែលោក ថាច់ សេដ្ឋា ខ្លួនលោក បានសុំមិនធ្វើការបកស្រាយ ពីការចោទប្រកាន់ទាំងអស់នេះទេ ដោយសារ​ករណីហាមឃាត់នេះ មានការជាប់ពាក់ព័ន្ធទៅនឹងបញ្ហាជាច្រើន រួមទាំងការយកឯកសារពីបារំាង ស្តីអំពី​ការ​កាត់ទឹកដីកម្ពុជាក្រោមទៅឲ្យវៀតណាមនោះផង។ ហើយលោកបានអះអាងថា នេះអាចការវាយប្រហារពី​​ក្រុម​ជន​មួយចំនួន មកលើរូបលោក ហើយលោកនឹងធ្វើការបកស្រាយ ជុំវិញការចោទប្រកាន់នេះ នៅពេលដែល​ដោះ​​ស្រាយ​បញ្ហាទាំងអស់នោះរួចរាល់។

ទស្សនាវដ្ដីមនោរម្យ.អាំងហ្វូ បានផ្ញើរសារអេឡិចត្រូនិក សុំការបញ្ជាក់ពីលោក ច​ន ស៊ីម៉ុ​នស៍ (​John Simmons) អ្នកនាំពាក្យស្ថានទូតអាមេរិក ប្រចាំនៅកម្ពុជា ប៉ុន្តែនៅមិនទាន់មានការឆ្លើយតបនៅឡើយ។ សហរដ្ឋ​​អាមេរិក​បានអនុវត្តន៍នយោបាយអន្តោប្រវេសន៍របស់ខ្លួន យ៉ាងតឹងរ៉ឹងជាទីបំផុត បន្ទាប់ពីមាន​ព្រឹត្តិការណ៍​ភេវរកម្ម​​នៅ​ទីក្រុងញ៉ូយក ថ្ងៃទី៩ ខែកញ្ញា ឆ្នាំ២០០១កន្លងមក។ រាល់ការនាំមនុស្សចូលទៅ​សហរដ្ឋ​អាមេរិក ត្រូវ​បាន​ត្រួត​ពិនិត្យយ៉ាងដិតដល់ ហើយក្នុងករណីមានភាពមិនប្រក្រតី អ្នកដែលធ្វើការធានា​ទទួល​ខុសត្រូវ អាច​នឹង​រង​ការពិន័យ ដូចករណីលោក ប៉ែន សុវណ្ណ ជាដើម។ ក្នុងករណីខ្លះទៀត អ្នក​ធានា​ទទួល​ខុស​ត្រូវ អាច​នឹង​ជាប់​ពន្ធនាគារ និងពិន័យជាប្រាក់យ៉ាងធ្ងន់ធ្ងរថែមទៀត៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...