រូបភាពរន្ធត់ ពីភេវរកម្មបាញ់សម្លាប់ក្នុងការិយាល័យទស្សនាវដ្ដីនៅប៉ារីស (vdo)
- ដោយ: សេក មនោរកុមារ អត្ថបទ៖ សេក មនោរកុមារ ([email protected]) - ប៉ារីស ថ្ងៃទី០៧ មករា ២០១៥
- កែប្រែចុងក្រោយ: January 07, 2015
- ប្រធានបទ: បាញ់សម្លាប់
- អត្ថបទ: មានបញ្ហា?
- មតិ-យោបល់
-
មិនដឹងថាមានពាក្យអ្វី ដើម្បីមកនិយាយឲ្យចំ ពីភាពសាហាវឃោឃៅ របស់ក្រុមភេវរជនទាំងនេះ នៅក្នុងសកម្មភាពបាញ់សម្លាប់ធ្វើទៅលើក្រុមអ្នកសារព័ត៌មាន អ្នកគូររូបត្លុកកំប្លែង និងក្រុមបុគ្គលិក របស់ទស្សនាវដ្ដី ឆារលី អេបដូ (Charlie Hebdo) ដែលកំពុងអង្គុយធ្វើការ ក្នុងការិយាល័យរបស់ពួកគេ កណ្ដាលរដ្ឋធានីប៉ារីស ប្រទេសបារាំងនោះឡើយ។ នៅក្នុងរូបភាពវីដេអូខាងក្រោមនេះ យើងនឹងបានស្ដាប់ឮនូវការបាញ់រះដោយកាំភ្លើងធុនធ្ងន់ សម្លាប់ជនស្លូតត្រង់ទាំងនេះ ដែលបានប្រើត្រឹមតែដងប៉ាកា ដើម្បីការសម្ដែងមតិ និងនាំព័ត៌មានមកជូនអ្នកអានរបស់ខ្លួនប៉ុណ្ណោះ។
អ្នករស់នៅក្បែរកន្លែងកើតហេតុ បានសម្ដែងការតក់ស្លុតនឹងទង្វើនេះ ប៉ុន្តែនៅមានអ្នករស់នៅមួយចំនួនទៀត នៅតែមិនភ័យខ្លាច ហើយឆ្លៀតប្រើប្រាស់ទូរស័ព្ទរបស់ពួកគេ ដើម្បីផ្ដិតយកសកម្មភាពរបស់ភេវរជនបិទមុខ ពាក់ឯកសណ្ឋានខ្មៅ។ វីដេអូខាងក្រោមបំផុត បានបង្ហាញថា ជនខ្មាន់កាំភ្លើងទាំងនេះ មានការកំណត់ច្បាស់លាស់ណាស់ ថានឹងបាញ់សម្លាប់នរណាក៏ដោយ ដែលប្រឆាំងនឹងពួកគេ ប្រឆាំងនឹងអ្វីដែលពួកគេគិតថា ជាអាទិទេពប៉ះមិនបាន។
នគរបាលមួយរូប ដែលរងរបួស បានដួលដេកនឹងដី ហើយលើកដៃទំនងជាសញ្ញាថា ខ្លួនមិនអាចធ្វើអ្វីបានទៀតទេ ប៉ុន្តែមិនត្រូវបានជនអាវខ្មៅអើពើទេ។ ភេវរជនបានតំរង់កាំភ្លើង បាញ់មួយគ្រាប់បង្ហើយ ចំកណ្ដាលក្បាលនគរបាលរូបនោះ ស្លាប់ភ្លាមនឹងកន្លែង។
ប្រតិបត្តិការដ៏សាហាវនេះ បានកើតឡើង នៅលើមហាវិថី Richard Lenoir ក្នុងសង្កាត់ទី១១ នៃរដ្ឋធានីប៉ារីស ដែលស្ថិតនៅមិនឆ្ងាយប៉ុន្មានពីការិយាល័យទស្សនាវដ្ដី និងបន្ទាប់ពីជនខ្មាន់កាំភ្លើងបានបាញ់ប្រហាររួចហើយ ទៅលើក្រុមបុគ្គលិកទស្សនាវដ្ដី។ ទំនងជាការងាររបស់ពួកគេបានជោគជ័យ ភេវរជនបានរត់ឡើងរថយន្ដ Citroën ពណ៌ខ្មៅ ដើម្បីបើកគេចខ្លួន។ ម្នាក់ពីក្នុងចំណោមគ្នាគេទាំងពីរ បានស្រែកឡើងថា៖ «យើងបានសងសឹកឲ្យសាវ័ក មហាមេដ (Mohamed) រួចហើយ»៕