នៅអាមេរិក កាប់ដាច់ក្បាលម្ដាយឯងនឹងពូថៅ ព្រោះប្រើឲ្យរៀបផ្ទះ
- ដោយ: សុបិន្ដ អត្ថបទ៖ សុបិន្ត ([email protected]) - ម៉ុងរ៉េអាល់ ថ្ងៃទី០៤ មករា ២០១៥
- កែប្រែចុងក្រោយ: January 04, 2015
- ប្រធានបទ: ហួសនិស្ស័យ
- អត្ថបទ: មានបញ្ហា?
- មតិ-យោបល់
-
កាលពីថ្ងៃពុធសប្ដាហ៍មុន នគរបាលក្រុង ភីនេឡាស (Pinellas) ក្នុងរដ្ឋផ្លរីដា សហរដ្ឋអាមេរិក បានប្រទះនូវបទល្មើសដ៏សាហាវព្រៃផ្សៃមួយ នៅក្នុងលំនៅដ្ឋានដ៏ស្ដុកស្ដម្ភ នៃសង្កាត់ ឱកស្មារ (Oldsmar)។ អ្នកស្រី ម៉ារីយ៉ា ស្វារេស សេសាញ (Maria Suarez-Cassagne) ជាម្ចាស់ផ្ទះ ត្រូវបាននគរបាលរកឃើញស្លាប់ ជាសាកសពមានក្បាលដាច់ចេញពីខ្លួន។ ការស៊ើបអង្កេតជំហានដំបូង បានបញ្ជាក់ថា អ្នកស្រី ម៉ារីយ៉ា អាយុ៤៨ឆ្នាំ ត្រូវបានកូនខ្លួនឯង យុវជន គ្រីស្ទៀន ហ្សូហ្សេ ហ្គូមេស (Christian Jose Gomez) កាប់នឹងពូថៅ។
បើទោះជាយុវជនអាយុ២៣ឆ្នាំរូបនេះ ត្រូវគេស្គាល់ថា មានរោគចិត្តប្រចាំកាយក៏ដោយ ប៉ុន្តែនគរបាលបានចាប់ខ្លួនយុវជននេះភ្លាមៗ នៅក្នុងបរិវេណភូមិគ្រឹះដដែល ហើយយកមកដាក់ឃុំ រង់ចាំការស៊ើបអង្កេត។
អ្នកដែលបានឃើញហេតុការណ៍នេះភ្លាមៗ គឺបងប្រុសអាយុ២៦ឆ្នាំ របស់គ្រីស្ទៀន ដែលក្នុងពេលបន្ទាប់មកបានរាយការណ៍ហៅនគរបាល។ ដោយបានស្ដាប់ឮសំលេងចម្លែកមួយ បង្ហើរចេញពីចំណតរថយន្ដក្នុងផ្ទះ យុវជនជាបងរូបនេះបានរត់ទៅមើល ឃើញមានពូថៅមួយដិតដាមដោយឈាម ដាក់ចោលនៅលើដី។ នៅខាងក្រៅផ្ទះជិតធុងសម្រាម បងប្រុសបានឃើញបន្ទាប់មកទៀត សាកសពដាច់ក្បាល នៃម្ដាយរបស់ខ្លួន។
នាយនគរបាលប្រចាំតំបន់ ដែលទទួលបន្ទុកសំនុំរឿង លោក បប់ ហ្គ័លថៃអើរី (Bob Gualtieri) បានពន្យល់ទៅកាន់អ្នកកាសែតថា៖ «ឃាតករបានយកក្បាលជនរងគ្រោះ គ្រវាត់ដាក់ចូលធុងសម្រាម ហើយព្យាយាមយកខ្លួនសាកសពដាក់ចូលទៀត។ តែដងខ្លួននោះ មានទំងន់ធ្ងន់ពេក។»ចំពោះមូលហេតុដែលជំរុញឲ្យយុវជន គ្រីស្ទៀន ឈានទៅប្រព្រឹត្តិអំពើហួសនិស្ស័យនេះ មានលក្ខណៈគួរហួសចិត្ត៖ នោះគឺយុវជនមិនអាចទ្រាំទ្ររួច នឹងបញ្ជារបស់ម្ដាយដែលសុំឲ្យខ្លួនជួយរៀបចំហិប និងប្រអប់ នៅក្នុងកន្លែងទុកសម្ភារៈនៃចំណតរថយន្ដនោះ។
នគរបាលបានសួរនាំយុវជន ហើយបានថ្លែងប្រាប់អ្នកកាសែតទៀតថា៖ «គ្រីស្ទៀន បានខឹងនឹងម្ដាយរបស់ខ្លួន តាំងពីពីរថ្ងៃមុនម្លេះ»។
«យុវជនបានពន្យល់ប្រាប់យើង ពីទង្វើរបស់ខ្លួន នៅក្នុងស្ថានភាពមួយស្ងប់ស្ងៀម មានរបៀបរបបច្បាស់លាស់ រហូតធ្វើឲ្យយើងគិតថា យុវជនមិនមានរោគចិត្តទេ។ ជាការស្ងប់ស្ងៀមគួរឲ្យភ័យខ្លាច។» នេះជាការរៀបរាប់បន្តរបស់លោក បប់។
បើតាមប្រព័ន្ធផ្សព្វផ្សាយក្នុងស្រុក បានរាយការណ៍ថា ជំងឺរោគចិត្តរបស់យុវជន ទើបនឹងត្រូវបានព្យាបាល កាលពីបីឆ្នាំកន្លងមកហើយនេះប៉ុណ្ណោះ។ យុវជនកំពុងស្ថិតនៅក្រោមការតាមដាន និងការលេបថ្នាំ ពីសំណាក់គ្រូពេទ្យនៅឡើយ។ ប៉ុន្តែគេមិនអាចដឹងថា តើយុវជន គ្រីស្ទៀន ពិតជាបានលេបថ្នាំ និងធ្វើអ្វីៗទៅតាមវេជ្ជបញ្ជា ឬអត់នោះទេ។ នៅពេលនេះមានតែតុលាការប៉ុណ្ណោះ ដែលត្រូវស៊ើបអង្កេតរឿងនេះ ហើយកំណត់ពីទោសកំហុសរបស់យុវជន ថាតើត្រូវទៅចូលពេទ្យ«រោគចិត្ត» ឬត្រូវទទួលទោសប្រហារជីវិត៕