ក្រុម​អាជីវករ និង​ប្រជា​ពលរដ្ឋ​រក​ទិញ​ត្រី សម្រាប់​ធ្វើ​ប្រហុក ឬ​ផ្អក ទុក​​ទទួល​ទាន​ប្រចាំ​ឆ្នាំ និង​លក់​ដូរ​ខ្លះ បាន​ត្អូញ​ត្អែរ​ពី​ទិន្នផល​ត្រី​ថយ​ចុះ និង​មាន​តម្លៃ​ថ្លៃ​ជាង​រាល់​ឆ្នាំ។ ពលរដ្ឋ​ទាំង​នោះ បាន​អះ​អាង​ថា ប្រព័ន្ធ​ផ្សព្វ​ផ្សាយ​ក្នុង​ស្រុក និង​មន្ត្រី​ជល​ផល បាន​បញ្ជាក់​ផ្ទុយ​ពី​ការ​ពិត ដែល​ថា​តម្លៃ​ត្រី​ប្រហុក​ថោក គឺ​ប្រហែល ១​ពាន់​រៀល​ក្នុង​មួយ​គីឡូក្រាម ប៉ុន្តែ​តម្លៃ​ត្រី​លក់​ជាក់​ស្ដែង​ពី ១៧០០​រៀល ទៅ​ដល់ ៦០០០​ពាន់​រៀល​ក្នុង​មួយ​គីឡូ​ក្រាម ឯ​ណោះ។

ពលរដ្ឋ​ម្នាក់​កំពុង​ដើរ​ទិញ​ត្រី​នៅ ឡូត៍​នេសាទ​គីឡូ​លេខ​៩ ភូមិ​​ច្រាំង​ចំរេះ ខណ្ឌ​ឬស្សីកែវ រាជធានី​ភ្នំពេញ បាន​ថ្លែង​ប្រតិកម្ម ចំពោះ​មន្ត្រី​ជល​ផល​ថ្នាក់​លើ​ថា ត្រី​ឆ្នាំ​នេះ​មិន​បាន​ធ្លាក់​ថ្លៃ​នោះ​ទេ តែ​វា​មាន​តែ​កើន​ឡើង ជាង​ឆ្នាំ​មុន។ ពលរដ្ឋ​ដែល​ទៅ​ដល់​ឡូត៍​នេសាទ​ទាំង​អស់ គាត់​មាន​បំណង​ទិញ​ត្រី​ក្នុង​ម្នាក់ ១០០​គីឡូក្រាម។ ប៉ុន្តែ​ដល់​មាន​តម្លៃ​កើន​ឡើង​បែប​នេះ ពួក​គាត់​ក៏​បន្ថយ​បវិមាណ​នៃ​ការ​ទិញ​នេះ​ទៅ​វិញ។ ពលរដ្ឋ​ខ្លះ​សុខ​ចិត្ត​ទិញ​ត្រី ដែល​មិន​ទាន់​ធ្វើ​រួច យក​មក​អង្គុយ​ធ្វើ​ខ្លួន​ឯង និង​មួយ​ចំនួន​ទៀត ពួក​គាត់​រង់​ចាំ​ទិញ​ពី​អ្នក​នេសាទ​ផ្ទាល់ ដោយ​មិន​ឆ្លង​កាត់​ឈ្មួញ​កណ្តាល។

ក្នុងពេលដែលកំពុងរកទិញត្រីប្រហុក អ្នកស្រី សំណាង ជាអ្នកមកពីខេត្តកំពង់ស្ពឺបាននិយាយ​ប្រាប់​ទស្សនាវដ្តី​មនោរម្យ.អាំងហ្វូថា នៅថ្ងៃទី០២ ខែមករា ឆ្នាំ២០១៥នេះ គាត់បានទិញត្រីបានគ្រប់១០០គីឡូក្រាម តាមដែល​គាត់ត្រូវការហើយ។ ប៉ុន្តែអ្នកស្រីថា ទាល់តែឡើងមកត្រីទិញដល់ភ្នំពេញ ដោយសារតែឆ្នាំនេះ តម្លៃត្រីបាន​ឡើង​ថ្លៃ។ អ្នកស្រីធ្វើដំណើរមកទិញផ្ទាល់ ព្រោះវាមានតម្លៃប្រសើជាងនៅឯខេត្តរបស់គាត់ ដែលត្រូវឆ្លង​កាត់​ឈ្មួញកណ្តាល យកទៅលក់នៅទីនោះ។ អ្នកស្រី សំណាង បានថ្លែងឡើងថា៖ «បើទិញនៅឯខេត្តថ្លៃ ព្រោះគេ​លក់យកចំណេញ ចឹងហើយបានកមទិញឲ្យដល់កន្លែងតែម្តង»។

កំពុងទទួលទិញត្រីពីអ្នកនេសាទ អ្នកស្រី អាំ បានប្រាប់ទស្សនាវដ្តីដែរថា ត្រីទិញចូល១៤០០រៀល ក្នុងមួយ​គីឡូក្រាម ហើយលក់ចេញ ១៧០០រៀល ក្នុងមួយគីឡូក្រាម។ ក្នុងមួយថ្ងៃអ្នកស្រីលក់ត្រីប្រហុក បាន៤តោន (ត្រីម៉ាញ់) ក្នុងឆ្នាំនេះមានការឡើងថ្លៃមែន នៅខណៈដែលបរិមាណត្រីស្រដៀងនឹងឆ្នាំមុន។ រីឯអ្នកកិនត្រីម្នាក់​នៅក្បែរនោះ បានអះអាងបន្ថែមថា នៅឆ្នាំនេះមានត្រីមិនសូវសម្បូប៉ុន្មានទេ។ អ្នកកិនត្រីនោះ បាននិយាយ​ដោយ​មិននិយាយប្រាប់ឈ្មោះថា៖ «ត្រីអត់សូវត្រូវ ដូចឆ្នាំមុនៗទេ»។

ទស្សនាវដ្តីមិនអាចសុំការបំភ្លឺពីមន្ត្រីជលផល និងអ្នកគ្រប់គ្រងយឿនេសាទខាងលើបានឡើយ អំពីមូលហេតុ​ដែលត្រីប្រហុកឡើងថ្លៃនៅដើមឆ្នាំនេះ។ តែបើតាមការបញ្ជាក់របស់ឈ្មួញលណ្តាលមួយរូប បាននិយាយថា៖ «ខ្ញុំទិញពីរទូកនេសាទថ្លៃដែរ ទើបលក់ចេញថ្លៃជាងមុនបែបនេះ»៕