ចម្រៀង «ទៅ​ហើយ​មក​វិញៗ ដោយ​សារ​តែ​បង» ដូច​ជា​មិន​សូវ​ខុស ពី​ចរិក​របស់​អ្នក​នយោបាយ​ខ្មែរ​ប៉ុន្មាន​ទេ។ ហើយ​បើ​គេ​និយាយ​ពី​ព្រះអង្គ​ម្ចាស់​ នរោត្តម រណឬទ្ធិ ក៏​កាន់​តែ​ដូច​ណាស់​ទៅ​ទៀត។ បន្ទាប់​ពី​យាង​ចេញ​ពី​គណបក្ស​រាជា​និយម​ហ្វុនស៊ិនប៉ិច ព្រះ​អង្គ​ម្ចាស់​បាន​ទៅ​ដឹកនាំ​គណបក្ស​ខ្លួន​ឯង និង​ក្រោយ​មក​បាន​ប្រកាស​ដក​ខ្លួន ចេញ​ពី​នយោបាយ។ល។ ប៉ុន្តែ​នៅ​ទី​បំផុត ឆ្នាំង​បាយ​ចាស់​របស់​ទ្រង់ ដែល​ព្រះអង្គ​បាន​ចាក​ចោល​អស់​រយៈ​ពេល​៨ឆ្នាំ ទំនង​ជា​នៅ​តែ​ដាំ​បាយ មាន​រសជាតិ​ឆ្ងាញ់​ដដែល។ នោះ​គឺ​ព្រះអង្គ បាន​​សម្រេច​​ព្រះ​ទ័យ មក​​យាង​​ដឹកនាំ​គណបក្ស​​ហ៊្វុនស៊ិនប៉ិច​វិញ បន្ទាប់​ពី​បាន​ឆ្លើយ​ឆ្លង​សំបុត្រ ជា​មួយ​ព្រះ​អង្គ​ម្ចាស់​​ក្សត្រី នរោត្តម អារុណរស្មី ដែល​ជា​ព្រះ​ប្រធាន​គណបក្ស​ហ្វុនស៊ីនប៉ិច រួច​មក។

អតីតនាយខុទ្ទកាល័យរបស់ព្រះអង្គម្ចាស់ លោក នរាណាឫទ្ធិ អានន្ទដាយ៉ាត បច្ចុប្បន្នជាទីប្រឹក្សារដ្ឋាភិបាល និង​ជាសមាជិករបស់គណបក្សប្រជាជនកម្ពុជា បានថ្លែងប្រាប់ទស្សនាវដ្តីមនោរម្យ.អាំងហ្វូថា នេះជាសញ្ញាណ​វិជ្ជមានមួយ ដែលបង្ហាញថា សែររាជវង្សកំពុងឈានទៅរកការផ្សះផ្សារគ្នាឡើងវិញ ដូចអ្វីដែលលោកចង់​ឃើញ និងចង់បានជាយូរមកហើយ ហើយក្នុងនាមលោកផ្ទាល់ លោកសូមគាំទ្រយ៉ាងពេញទំហឹង នៃការវិល​ត្រឡប់ទៅគង់ធ្វើជាព្រះប្រធាន គណបក្សហ៊្វុនស៊ីនប៉ិចសាជាថ្មី របស់សម្ដេចក្រុមព្រះ នរោត្តម រណឫទ្ធិ នា​ពេលនេះ។

កាលពីថ្ងៃទី១ ខែមករា ឆ្នាំ២០១៥នេះ តាមព្រះសារលិខិតចុះថ្ងៃទី១ ខែមករា ឆ្នាំ២០១៥ របស់សម្ដេចក្រុមព្រះ នរោត្តម រណឫទ្ធិ បានយល់ព្រមត្រឡប់មកគង់ ជាព្រះប្រធានគណបក្សរាជានិយមហ៊្វុនស៊ីនប៉ិចសាជាថ្មី តាម​សំណើរបស់សម្ដេចព្រះអនុជ នរោត្តម អរុណរស្មី និង អគ្គ លេខាធិការបក្សលោក ញឹក ប៊ុនឆៃ។

លោក នរាណាឫទ្ធិ អានន្ទដាយ៉ាត បានរំលឹកបន្តិចឡើងវិញថា កាលពីខែមេសា ឆ្នាំ២០១២ ដោយមានការ​ជួយ​ខ្នះខ្នែងពីលោកនាយករដ្ឋមន្រ្តី ហ៊ុន សែន ថ្នាក់ដឹកនាំគណបក្សទាំងពីរ ក៏ធ្លាប់បានចុះកិច្ចព្រមព្រៀង​បង្រួប​បង្រួមគ្នា រួចមកហើយដែរនាពេលនោះ។ តែដោយសារ«ពពក»ដ៏ខ្មៅងងឹត បាននាំឲ្យការបង្រួបបង្រួមគ្នានេះ មានភាពរអាក់រអួលមកដល់បច្ចុប្បន្ន។

អតីតជំនួយការផ្ទាល់ របស់ព្រះប្រធានគណបក្សសង្គមរាស្ត្ររាជាធិបតេយ្យ (ព្រះអង្គម្ចាស់ នរោត្តម រណឫទ្ធិ) បានបញ្ជាក់ថា៖ «បើសិនជាគណបក្សរាជានិយមទាំងពីរ មានព្រះបុត្រា ព្រះបុត្រី នៅតែមើលមុខគ្នាមិនចំ នៅ​តែអះអាងថា ម្នាក់ៗការពារកេរ្តិ៍តំណែលសម្តេចឪ សម្តេចតា ជាទីសក្ការៈ ចេះតែប្រទាញប្រទង់គ្នា ខ្ញុំយល់​ឃើញថា កម្លាំងរាជានិយម មានការធ្លាក់ចុះដល់សូន្យ ដូចបច្ចុប្បន្ននេះ ហើយក៏អាចឈានរហូត ទៅដល់ការ​ប៉ះពាល់ដល់រាជបល្ល័ង្គទៅទៀត។ ការដែលចាប់ដៃគ្នា ការដែលរួបរួមគ្នានេះ ជាការត្រឹមត្រូវ។»

ព្រះសារលិខិតរបស់គណបក្សហ៊្វុនស៊ិនប៉ិច ដែលមានព្រះហស្ថលេខារួមគ្នា របស់ព្រះប្រធានព្រះអង្គ​ម្ចាស់​ក្សត្រី នរោត្តម អរុណរស្មី និងអគ្គលេខាធិការ លោក ញឹក ប៊ុនឆៃ ក្នងថ្ងៃទី១ ខែមករានោះ បានសរសេរថា «គណបក្សហ៊្វុនស៊ីនប៉ិច សូមយាងសម្ដេចក្រុមព្រះ នរោត្តម រណឫទ្ធិ មកធ្វើជាព្រះប្រធាន​គណបក្ស​ហ៊្វុនស៊ីនប៉ិច។ (…) ការជ្រើសតាំងជាផ្លូវការ សម្ដេចក្រុមព្រះក្នុងតួនាទីខាងលើនេះ នឹងធ្វើតាមរយៈ​សមាជ​គណបក្ស​ហ៊្វុនស៊ីនប៉ិច នាពេលខាងមុខនេះ»។

នៅក្នុងព្រះបន្ទូលក្នុងសារលិខិតព្រះអង្គម្ចាស់ នរោត្ដម រណឬទ្ធិ បានតបវិញថា៖ «ខ្ញុំមានមហាកិត្តិយស និង​សេចក្ដីរីករាយ យល់ព្រមមកធ្វើជាប្រធានគណបក្សហ៊្វុនស៊ីនប៉ិច តាមសំណើរ (…) ដើម្បីបន្តដឹកនាំគណបក្ស​យើងឡើងវិញ»។

សូមបញ្ជាក់ថា ព្រះអង្គម្ចាស់ នរោត្ដម រណឬទ្ធិ ធ្លាប់គង់ជាព្រះប្រធានគណបក្សហ៊្វុនស៊ីនប៉ិច តាំងពីឆ្នាំ​១៩៩៣​មក ឆ្នាំដែលព្រះអង្គទ្រង់ជាប់ឆ្នោតជានាយករដ្ឋមន្រ្តី តាមការបោះឆ្នោតដោយប្រជាពលរដ្ឋ ដែលនៅគោរព​ស្រឡាញ់របបរាជានិយម។ រីឯគណបក្សប្រជាជនកម្ពុជានៅពេលនោះ បានចាញ់ឆ្នោត តែបានតវ៉ា រហូតលោក ហ៊ុន សែន បានក្លាយជានាយករដ្ឋមន្រ្តីទីពីរ។ តែ«ខ្លាពីរមិនអាចនៅលើភ្នំតែមួយ»បាន ដូច្នេះហើយ ព្រឹត្តិការណ៍​បង្ហូឈាមដ៏ជូរចត់មួយ បានផ្ទុះឡើង នៅដើមខែកក្កដា ឆ្នាំ១៩៩៧ បង្កឲ្យកម្លាំងរបស់គណបក្ស​ហ្វុនស៊ីនប៉ិចធ្លាក់ខ្សោយ និងបន្ទាប់មកបានបែកប្រេះឆាគ្នាជាបន្តបន្ទាប់។

សមាជវិសាមញ្ញមួយក្នុងឆ្នាំ ២០០៦ សម្ដេចក្រុមព្រះត្រូវបានបានទម្លាក់ពីតំណែងព្រះប្រធាន។ បន្ទាប់មក​ព្រះអង្គ ក៏ចាប់ផ្តើមបង្កើតនូវបក្សថ្មីជាបន្តបន្ទាប់ដូចជា គណបក្សនរោត្តមរណឫទ្ធិ បន្ទាប់មកបង្កើត គណបក្ស​សង្គមរាស្ត្ររាជាធិបតេយ្យ ដែលបច្ចុប្បន្ននេះ ព្រះអង្គទ្រង់ជាព្រះប្រធានផងដែរ។

លោក នរាណាឫទ្ធិ អានន្ទដាយ៉ាត បានបញ្ជាក់ជាចុងក្រោយថា «ព្រះអង្គមានមេរៀនច្រើនណាស់ ដែលលោក​ត្រូវរៀន ពីកំហុសឆ្គងដែលមានកន្លងមក ដែលធ្វើឲ្យអ្នករាជានិយមបែកបាក់គ្នា។ ដូច្នេះលោក គួរយកមេរៀន​នោះមកសិក្សា អប់រំខ្លួនលោកឡើងវិញ ដើម្បីឲ្យភាពជាអ្នកដឹកនាំរបស់លោក ក្នុងគណបក្ស​ហ៊្វុនស៊ីនប៉ិច​ថ្មី​ហ្នឹង មានជំហានថ្មី គំនិតថ្មី និងស្មារតីថ្មី។ (…) ធ្វើយ៉ាងណា ឲ្យគណបក្សហ៊្វុនស៊ីនប៉ិចនេះ ឲ្យមានកម្លាំង​ខ្លាំង​ឡើងវិញ។»៕