ជិះម៉ូតូបញ្ច្រាសផ្លូវ បុកគ្នាមួយទំហឹងរបួសធ្ងន់២នាក់ ស្រាលមួយ
- ដោយ: ក. វិច្ចនី អត្ថបទ៖ក. វិច្ចនី ([email protected]) - យកការណ៍៖ ហេង វុទ្ធី - ភ្នំពេញ ថ្ងៃទី ០១ មករា ២០១៥
- កែប្រែចុងក្រោយ: January 02, 2015
- ប្រធានបទ: គ្រោះថ្នាក់
- អត្ថបទ: មានបញ្ហា?
- មតិ-យោបល់
-
យុវជនបីនាក់ជិះម៉ូតូម៉ាក Yamaha ពាក់ស្លាកលេខ ភ្នំពេញ 1 BS-4029 បញ្ច្រាសទិសដៅ បានទៅបុកជាមួយម៉ូតូមួយគ្រឿងទៀតម៉ាក ផ្លើស ពាក់ស្លាកលេខ ភ្នំពេញ 1AZ -6983 បណ្តាលឲ្យមានអ្នករបួសបីនាក់ជាទម្ងន់។ ហេតុការណ៍នេះ បានកើតឡើងនៅផ្លូវ កម្ពុជាក្រោម ចំណុចស្តុបដេអិន សង្កាត់ដេប៉ូ ៣ ខ័ណ្ឌទួលគោក រាជធានីភ្នំពេញ។
លោក សៅ ដែលម្ចាស់ម៉ូតូម៉ាកផ្លើស បានប្រាប់ទស្សនាវដ្តីមនោរម្យអាំងហ្វូថា លោកជិះមកត្រូវភ្លើងស្តុបព្រោះភ្លើងពណ៌ខៀវ ដែលអនុញ្ញាតឲ្យអ្នកដំណើរអាចធ្វើដំណើរទៅមុខបាន។ លោកបានបន្ថែមទៀតថា នៅពេលដែលបានបើកម៉ូតូចេញមក ស្រាប់តែភាគីដែលប៉ះទង្គិចជាមួយលោកនោះ បានជិះម៉ូតូមក ដោយបញ្ច្រាសទិស (បត់ទទឹង) ហើយក៍បានបុកគ្នាតែម្តង។ លោកថាលោកព្យាយាមចាប់ហ្រ្វាំងដែរ ប៉ុន្តែចាប់មិនទាន់ទេ។
សាក្សីម្នាក់ លោក ម៉ាប់ ដែលជាជាងប៉ះកង់ម៉ូតូនៅម្តុំស្តុបនោះ បាននិយាយថាម៉ូតូម៉ាក yamaha ដែលមានជិះគ្នាបីនោះ ទើបតែជិះចេញពីសប់កង់ម៉ូតូនៅតូបរបស់គាត់រួច ហើយក៍បានជិះបត់នៅត្រង់ស្តុបនោះស្រាប់តែបុកគ្នាតែម្តង។ នៅពេលដែលងើបទៅមើល ឃើញស្រីម្នាក់ដែលជាអ្នកបើក បានបាក់ជើងទៅហើយ ម្នាក់ទៀតរបួសចំក្បាល និងអ្នកទី បីមិនមានរបួសអ្វីនោះទេ។
តាមការបញ្ជាក់របស់លោក វ៉ា ជាសាក្សីម្នាក់ទៀត ដែលបានឃើញព្រឹត្តការណ៍នេះផ្ទាល់ បាននិយាយថា មូលហេតុ ដែលនាំឲ្យមានរបួសធ្ងន់ដូច្នេះ ដោយសារភាគីទាំងពីរជិះម៉ូតូលឿនដូចគ្នា ហើយម្យ៉ាងទៀត ភាគីដែលជិះម៉ូតូម៉ាក Yamaha បានជិះម៉ូតូបញ្ច្រាសទិសផង និងមានឌុបគ្នាច្រើនផង ដែលបណ្តាលឲ្យពួកគេចាប់ហ្វ្រាំងមិនទាន់ ក៍ជ្រុលបុកគ្នាមួយទំហឹងតែម្តងទៅ។
ជនរងគ្រោះទាំងពីរនាក់ ត្រូវបានគេបញ្ជូនទៅព្យាបាលនៅមន្ទីរពេទ្យរុស្សី ចំណែកឯលោក សៅ ដែលជាម្ចាស់ម៉ូតូម៉ាកផ្លើស ត្រូវអាជ្ញាធរបញ្ជូនទៅសាលាខ័ណ្ឌជាមួយម៉ូតូរបស់គាត់ ព្រោះគ្មានអ្នកណាមកធានា ដើម្បីដោះស្រាយករណីនេះដូចភាគីម្ខាងទៀត៕