ជាម យៀប៖ ស៊ុន ឆ័យ និយាយបំផ្លើសរឿងចំណូលបានពីអង្គរ
- ដោយ: ប្រាថ្នា អត្ថបទ៖ ប្រាថ្នា ([email protected]) - យកការណ៍៖ ស៊្រុន ទិត្យ - ភ្នំពេញ ថ្ងៃទី៣១ ធ្នូ ២០១៤
- កែប្រែចុងក្រោយ: December 31, 2014
- ប្រធានបទ: រដ្ឋសភា
- អត្ថបទ: មានបញ្ហា?
- មតិ-យោបល់
-
«ខ្ញុំសូមជម្រាបថា គេមានរាយការណ៍ មានបញ្ចាំងស្លាយ មានជាលាយល័ក្ខអក្សរជូនហើយ នៅតែមិនអស់ចិត្តទេ នៅតែបំផ្លើស» នេះជាការថ្លែងឡើង របស់លោក ជាម យៀប ប្រធានគណៈកម្មការហិរញ្ញវត្ថុ ធនាគារ និងសវនកម្ម នៃរដ្ឋសភា មកពីគណបក្សប្រជាជនកម្ពុជា។ ការថ្លែងរបស់លោក ជាម យៀប នៅក្នុងសន្និសីទកាសែត នៅព្រឹកថ្ងៃទី៣១ ខែធ្នូ ឆ្នាំ២០១៤នេះ បានច្រានចោលការលើកឡើងរបស់តំណាងរាស្រ្តគណបក្សសង្រ្គោះជាតិ លោក ស៊ុន ឆ័យ ថាចំណូលដែលបានមក ពីភ្ញៀវដែលទស្សនាអង្គរ ១៥០លានដុល្លារក្នុងមួយឆ្នាំ។
តំណាងរាស្ត្ររបស់គណបក្សប្រជាជនកម្ពុជារូបនេះ បានចាត់ទុកថា ការលើកឡើងរបស់លោក សុន ឆ័យ ជាការនិយាយបំផ្លើសសព្វគ្រប់បែបយ៉ាង ដែលលោកមិនអាចទទួលយកបាន។ លោកបានបន្តថា «សុទ្ធតែចំណូលត្រូវបាន១៥០ដុល្លារក្នុងមួយឆ្នាំ អញ្ចេះគាត់ទៅតាមចំណូល ដែលបានក្នុងមួយឆ្នាំ អ្នកដែលចូលតាមយន្តហោះ (អ្នកមកទស្សនាកម្ពុជា) ដែលទេសចរណ៍ ដែលគេរាយការណ៍មក។ គាត់អត់គិតថា ពីសៀមរាប ខ្មែរដែលចូលទៅគេអត់យកលុយទេ ចំណែកបរទេសដែលចូលទៅជាង១លាននាក់ទេ គាត់គិតជាង៤លាននាក់ ទៅតាមតួលេខដែលក្រសួងទេសចរណ៍បូកសរុប ហើយគាត់គុណយកតែម្តង ទៅឃើញ១៥០លាន(ដុល្លារ)»។
លោកបន្ថែមថា៖ «ពេលខ្ញុំកំពុងនិយាយអញ្ចឹងគាត់ដើរចេញបាត់ នុះទៅនិយាយ ទៅវាយអាស្អីណាគាត់ អាពេលខ្ញុំនិយាយក្នុងហ្នឹងក៏អញ្ចឹងដែរ អាលេខគេថាមកអញ្ចេះ គាត់គុណនឹងដប់អីទៅ ទទួលម៉េចនឹងបាន។»
លោក ជាម យៀប បញ្ជាក់បន្ថែមថា រាល់ការនិយាយរបស់លោក សុន ឆ័យ លោកមិនទទួលខុសត្រូវនោះទេ ហើយលោកក៏មិនមែនជាអ្នករុញទូក បណ្តោយទឹកនោះដែរ។ ប្រធានគណៈកម្មការហិរញ្ញវត្ថុ ធនាគារ និងសវនកម្មនៃរដ្ឋសភា បានចោទប្រកាន់លោក សុន ឆ័យ អនុប្រធានរបស់លោកថា ដឹងថាការបំផ្លើសវាខុសច្បាប់ ប៉ុន្តែអនុប្រធានរូបនេះនៅតែនិយាយ។
ទស្សនាវដ្តីមនោរម្យ.អាំងហ្វូមិនទាន់អាចទាក់ទងលោក សុន ឆ័យ ដើម្បីសុំការឆ្លើយតបនឹងការលើកឡើងរបស់លោក ជាម យៀប បានទេនៅថ្ងៃនេះ។
កាលពីថ្ងៃទី២២ខែធ្នូ លោក សុន ឆ័យ បានទៅស្រាវជ្រាវពីអំពើពុករលួយក្នុងការចាត់ចែង ថវិកានៅខេត្តសៀមរាប ពិសេសចំណូលពីអង្គរ។ លោកបានរកឃើញភាពមិនប្រក្រតីមួយចំនួន ជុំវិញការកេងបន្លំប្រាក់ចំណូលជាតិ ដែលបានពីការលក់សំបុត្រឱ្យបរទេសចូលទស្សនាអង្គរវត្ត និងការជួលដីជាច្រើនហិកតាផ្សេងទៀត។
កាលពីថ្ងៃទី២៥ ខែធ្នូ កន្លងទៅ អាជ្ញាធរអប្សរាបានសរសេរសេចក្ដីបំភ្លឺមួយដោយចោទលោក សុន ឆ័យ ថា បាននិយាយបំផ្លើស មួលបង្កាច់ បំភាន់មតិសាធារណជនជាតិ និងអន្តរជាតិ ឱ្យយល់ច្រឡំទៅលើស្ថាប័នអប្សរា និងរដ្ឋាភិបាល ថាជាអ្នកដែលធ្វើឱ្យបាត់បង់ចំណូលជាតិ។ អាជ្ញាធរអប្សរាបានឱ្យដឹងទៀតថា អ្វីដែលលោក សុន ឆ័យ ធ្វើគឺគ្រាន់តែជាគំនុំសងសឹកផ្ទាល់ខ្លួន ដោយសាររូបគាត់ត្រូវបានអាជ្ញាធរអប្សរា ឈ្នះក្តីរឿងទន្រ្ទានកាន់កាប់ដីមួយកន្លែង ក៏ដូចជាការកេងចំណេញផ្នែកនយោបាយដើម្បីបម្រើគណបក្សខ្លួន៕