រដ្ឋមន្រ្តី​ក្រសួង​សង្គម​កិច្ច និង​អតីត​យុទ្ធជន លោក វង សូត នា​វិមាន​រដ្ឋសភា កាល​ពី​រសៀល​ថ្ងៃ​ទី​២៥ ខែ​ធ្នូ ឆ្នាំ​២០១៤​នេះ បាន​ឯកភាព​ក្នុង​ការ​បង្កើត​ឲ្យ​មាន «អនុក្រឹត្យ»​ថ្មី​មួយ ដើម្បី​បង្កើន​ប្រាក់​ឧបត្ថម្ភ ដល់​អ្នក​ដែល​រស់​នៅ​ក្នុង​មណ្ឌល​បណ្ដុះ​បណ្ដាល​វិជ្ជា​ជីវៈ និង​បញ្ហា​មួយ​ចំនួន​ទៀត។ នៅ​ចំពោះ​គណៈ​កម្មការ​សុខាភិបាល សង្គម​កិច្ច យុវនីតិ​សម្បទា ការងារ បណ្ដុះ​បណ្ដាល​វិជ្ជា​ជីវៈ និង​កិច្ចការ​នារី​នៃ​រដ្ឋសភា លោក វង សូត បាន​ថ្លែង​ថា លោក​នឹង​ទទួល​ធ្វើ​តាម​សំណូមពរ ឬ​ការ​លើក​ឡើង​របស់​គណៈកម្មការ​ទី​៨ នៃ​រដ្ឋសភា។

ការថ្លែង​របស់​រដ្ឋមន្រ្តី​ក្រសួង​សង្គម​កិច្ច អតីត​យុទ្ធជន និង​យុវនីតិ​សម្បទា លោក វង សូត បាន​ធ្វើ​ឡើង បន្ទាប់​ពី​លោក បាន​ចូល​ឆ្លើយ​បំភ្លឺ​ដល់​គណៈកម្មការ​ទី​៨ នៃ​រដ្ឋសភា ដែល​ដឹកនាំ​ដោយ​លោក​ស្រី កែ សុវណ្ណារ័ត្ន ជុំ​វិញ​ភារកិច្ច​ទទួល​ខុស​ត្រូវ​របស់​ក្រសួង​របស់​លោក។

ក្នុងជំនួបសួរដេញដោលនោះ ប្រធានគណៈកម្មការទី៨នៃរដ្ឋសភា មកពីគណបក្សសង្គ្រោះជាតិ បានដាក់ចេញ​នូវ​គោលការណ៍ និងភារកិច្ច៤យ៉ាង ស្នើរឲ្យលោករដ្ឋមន្រ្តី ដែលមកពីគណបក្សប្រជាជនកម្ពុជា ធ្វើការអនុវត្ត និង​បន្តរការអនុវត្តការងាររបស់ខ្លួន ដែលមានស្រាប់នោះឲ្យមានប្រសិទ្ធិភាពខ្ពស់។

គោលការណ៍ទាំងបួននោះ រួមមាន៖

១- យល់ព្រមបង្កើនរបបអាហារពី១៥០០រៀល (ក្នុងពេលមុន) ទៅ ៤០០០ រៀល ក្នុងមួយថ្ងៃ។

២- បើកទូលាយមណ្ឌលកែប្រែ ដែលគ្រប់គ្រងជនពិការ ជនវិកលចរិត ជនអនាថា និងអ្នកញៀនគ្រឿងញៀន គ្មានការលាក់កំបាំង ដើម្បីឲ្យអង្គការសង្គមស៊ីវិលមានសិទ្ធិចូលមើល និងសួរសុខទុក្ខ។

៣- បង្កើតវគ្គបណ្ដុះបណ្ដាលវិជ្ជាជីវៈ នៅក្នុងមជ្ឈមណ្ឌលសម្រាប់អ្នកគ្មានទីពឹង និងមុខរបរ ដើម្បីឲ្យមាន​ឱកាស​រកការងារធ្វើ។

៤- ស្នើសុំឱ្យមានការតាមដានវាយតម្លៃ ការកំណត់របបគោលនយោបាយប្រាក់សោធននិវត្តន៍ របស់ជនពិការ​ឱ្យមានតម្លាភាព និងយុត្តិធម៌ ជៀសវាងការរើសអើង។

ក្នុងកិច្ចសម្ភាសជាមួយអ្នកសារព័ត៌មាន បន្ទាបពីជំនួបនោះ លោក វង សូត បានបង្ហាញនូវមោទនភាព​របស់​ខ្លួនថា អ្វីដែលប្រធានគណៈកម្មការទី៨ នៃរដ្ឋសភា បានស្នើឡើងនេះ ក្រុមការងាររបស់លោក ក៏កំពុងតែ​បាន​ធ្វើរួចជាជំហានៗទៅហើយដែរ។ លោកបានថ្លែងថា៖ «វាមានអ្វីពិបាក បើយើងបាននឹងកំពុងគិតរួចទៅហើយ។ ចឹងក៏ស្របគ្នាហើយ។»

ទោះយ៉ាងណា លោកបានទទួលស្គាល់ថា ការងារទាំងអស់នោះ លោកបានធ្វើត្រឹមតែក្នុង​ក្របខណ្ឌ​«ប្រកាស»​ប៉ុណ្ណោះ មិនបានសម្រេចដល់ក្របខណ្ឌ«អនុក្រិត្យ»ឡើយ។ លោកបន្តថា ក្រោយពីជំនួបនេះ លោកនឹងរៀបចំ​ការងារទាំងនោះ ឲ្យស្ថិតនៅក្នុងអនុក្រិត្យវិញ។

សម្រាប់លោកស្រី កែ សុវណ្ណារ័ត្ន វិញ បានចាត់ទុកថា «បួន»ចំណុចខាងលើនេះ មិនមែនជាការសន្យារបស់​លោករដ្ឋមន្រ្តី ក្រសួងសង្គមកិច្ច អតីតយុទ្ធជន និងយុវនីតិសម្បទា ចំពោះមុខលោកស្រីទេ តែជាការសន្យា​ចំពោះ​មុខគណៈកម្មការទី៨ នៃរដ្ឋសភា។ លោកស្រីបន្ថែមថា លោកស្រីគាំទ្រចំពោះការលើកឡើងរបស់​លោក វង សូត ដែលបានឆ្លើយថា បញ្ហាទាំងអស់ដែលគណៈកម្មការទី៨ នៃរដ្ឋសភា បានលើកឡើងនោះ កំពុង​ស្ថិត​ក្នុង​ដែនអនុវត្តន៍ និងការរៀបចំរបស់ក្រសួងពីមុនមក និងដល់បច្ចុប្បន្ន។

តាមការសន្យានេះ លោកស្រីប្រធានគណៈកម្មការទី៨ នៃរដ្ឋសភា បានសង្ឃឹមថា នឹងទទួលបានជោគជ័យ ជាមួយនឹងយុត្តិសាស្ត្រថ្មីនេះ។ ប៉ុន្តែយ៉ាងណាក៏ដោយ ក្រុមការងាររបស់លោកស្រី និងបន្តតាមដាន ហើយ​ជួយ​ជម្រុញឲ្យការងារនោះឲ្យកាន់តែមានប្រសិទ្ធិភាព៕

សូមទស្សនាការលើកឡើងពិស្តារ របស់លោក វង សូត និងលោកស្រី កែ សុវណ្ណារ័ត្ន ជាមួយអ្នក​សារព័ត៌មាន​ដូចខាងក្រោម៖

(វីដេអូមកដល់ក្នុងពេលបន្តិចទៀត)

----------------------------------