«អ្នកម៉ែអើយ អ្នកនៅឯណា? កូនត្រជាក់រឹងអស់ហើយ...»
- ដោយ: ឈូករ័ត្ន អត្ថបទ៖ ឈូករ័ត្ន ( [email protected]) - ប៉ារីស ថ្ងៃទី២១ ធ្នូ ២០១៤
- កែប្រែចុងក្រោយ: December 22, 2014
- ប្រធានបទ: វិប្បដិសារី
- អត្ថបទ: មានបញ្ហា?
- មតិ-យោបល់
-
ជាហេតុការណ៍ដ៏រឹងខ្លួន តឹងអស់ទាំងឱរ៉ា ខ្លោចផ្សារជំនួសទារកអាយុ១៨ខែ ដែលទើបនឹងចេះដើរតេះតាស។ នៅក្នុងក្រុងតូចមួយឈ្មោះ សូសណូវកា (Sosnovka ភាគកណ្ដាលនៃប្រទេសរ៉ូស្សី) ដែលគ្របដណ្ដប់ដោយទឹកកកសក្បុស ជាមួយនឹងសីតណ្ហភាព១០អង្សាក្រោមសូន្យ កាលពីដើមសប្ដាហ៍មុន នាង ម៉ារីណា យេហ្វីម៉ូវ៉ា (Marina Yefimova) អាយុ២៩ឆ្នាំ បានគិតថាកូនប្រុសរបស់នាងឈ្មោះ គ្លេប (Gleb) បានគេងលង់លក់ហើយ មុននឹងនាងបានចេញទៅដើរលេង សប្បាយក្អាកក្អាយជាមួយមិត្តភ័ក្រ ដោយទុក គេ្លប ឲ្យនៅក្នុងផ្ទះតែម្នាក់ឯង ទាំងកណ្ដាលយប់ស្ងាត់។
តើទារកណាមួយ អាចរស់នៅតែឯងដោយគ្មានវត្តមាន និងកម្ដៅម្ដាយ ឬមនុស្សធំនៅជិតខ្លួនវានោះ? ដោយសារអារម្មណ៍បែបនេះហើយ ទើបកុមារដែលទើបនឹងចេះដើរតេះតាស មិនបានគេងលង់លក់ឡើយ។ ទារក គេ្លប បានចេញពីបន្ទប់ រួចចុះតាមជណ្ដើរ ដើម្បីរកម្ដាយរបស់ខ្លួន នៅពេញក្នុងផ្ទះ។ ប៉ុន្តែអ្នកម្ដាយអត់នៅក្នុងផ្ទះទេ... អញ្ចឹង គាត់ប្រហែលជានៅខាងក្រៅផ្ទះ ដូចរាល់ដងហើយ... គ្លេប បានបើកទ្វាក្រោយចេញទៅខាងក្រៅផ្ទះបានទៀត ព្រោះនាង យ៉េហ្វីម៉ូវ៉ា បានភ្លេចចាក់សោរទ្វានេះ មុនខ្លួនចាកចេញទៅ។
ជាមួយនឹងសម្លៀកបំពាក់គេងយប់ ទារក គ្លេប បានធ្វើដំណើរតេះតាសរបស់ខ្លួន កាត់ព្រិលទឹកកកដ៏ក្រាស ក្នុងសីតណ្ហភាពដ៏ត្រជាក់ក្រៃ (១០អង្សាក្រោមសូន្យ) ដើម្បីស្វែងរកម្ដាយរបស់ខ្លួន។ មិនយូរប៉ុន្មានឡើយ គ្លេប បានដួលចុះនៅលើព្រិលទឹកកក ហើយលែងដឹងខ្លួនពីពេលនោះមក។
នាង យេហ្វីម៉ូវ៉ា បានត្រឡប់ចូលផ្ទះវិញ ... តែអ្វីៗបានហួសអស់ទៅហើយ។ អ្នកនាំពាក្យរបស់មន្ទីរពេទ្យមួយ ស្ថិតនៅក្បែរក្រុង សូសណូវកា បានថ្លែងថា៖ «នៅពេលម្ដាយនាំយកកូនមកដល់មន្ទីរពេទ្យ នាងមានសភាពជ្រួលច្របល់ខ្លាំងណាស់។ យើងបានប្រឹងអស់ពីសមត្ថភាព ដើម្បីជួយឲ្យទារកដឹងខ្លួនមកវិញ។ តែជាមួយនឹងសុតណ្ហភាពដ៏ត្រជាក់បែបនេះ ទារកនេះគ្មានសំណាងនឹងរស់មកវិញទេ ហើយយើងក៏មិនអាចធ្វើអ្វី ឲ្យបានលើសពីណ្នឹងដែរ។»
នាង យេហ្វីម៉ូវ៉ា អាចនឹងត្រូវបានប្រព័ន្ធយុត្តិធម៌នៃប្រទេសរ៉ូស្សី ចោទប្រកាន់ពីបទខ្ជីខ្ជា ក្នុងការថែរក្សាកូនរបស់ខ្លួន។ នៅចំពោះការសាកសួររបស់នគរបាល នាងបានឆ្លើយដំបូងឡើយថា នាងគ្រាន់តែចេញទៅក្រៅ ដើម្បីទៅរកអុសប៉ុណ្ណោះ។ ប៉ុន្តែភ្លាមៗបន្តិចមក នាងបានសារភាពទាំងអស់ ថានាងបានទុកកូនប្រុសរបស់ខ្លួនចោល ដើម្បីចេញទៅដើរកំសាន្ដជាមួយមិត្តភ័ក្រ។
ចំណែកឯឪពុករបស់ទារកវិញ បានចេញទៅធ្វើការនៅតំបន់ឆ្ងាយ នាវេលាយប់នោះ។ បុរសអាយុ៣៣ឆ្នាំ បានស្លុតបាត់ព្រលឹងអស់ពីខ្លួន នៅពេលទទួលដំណឹងពីមរណភាពរបស់កូនប្រុស ដោយសារតែភាពខ្ជីខ្ជាររបស់ភរិយាខ្លួន។ បុរសបានផ្ទុះការហួសចិត្តថា៖ «ខ្ញុំមិនអាចជឿបានទេ។ នាងជាម្ដាយ និងជាភរិយាមួយរូបដ៏ល្អ។ រឿងទាំងអស់នេះ វាមិនទំនងសោះ... មិនទំនងទេ។»៕