ចាន់ សូវ៉េត សរសេរផ្ដាំផ្ញើរអ្វីជាចុងក្រោយ នៅលើហ្វេសប៊ុក?
- ដោយ: កេសរ កូល ([email protected]) - ភ្នំពេញ ថ្ងៃទី១៩ ធ្នូ ២០១៤
- កែប្រែចុងក្រោយ: December 21, 2014
- ប្រធានបទ: សម្ដីមាស
- អត្ថបទ: មានបញ្ហា?
- មតិ-យោបល់
-
បើគេរំលឹកពីលោក កាលពីលោកនៅមានជីវិតនោះ គេច្បាស់ជាស្គាល់ភ្លាម ថាជាវីរជនការពារសិទ្ធិមនុស្សមួយរូប ដែលតែងជួយទៅដល់អ្នកដែលត្រូវគេរំលោភសិទ្ធិ ដោយមិនខ្លាចនឿយហត់ និងមិនខ្លាចខ្លួនរងទុក្ខ។ ប៉ុន្តែចំពោះជីវិតឯកជនរបស់លោកវិញ គេបានដឹងតិចតួចបំផុត។ ហើយបើនិយាយពីជីវិតនៅលើហ្វេសប៊ុកទៅទៀតនោះ លោក ចាន់ សូវ៉េត ក៏កាន់តែមិនមែនជាតារាល្បី ប្រចាំលើបណ្ដាញសង្គម ដែលជាចំណូលចិត្ត របស់មនុស្សសម័យឥឡូវនោះដែរ។
ទោះជាយ៉ាងណាក៏ដោយ លោកបានប្រើប្រាស់បណ្ដាញសង្គម ដើម្បីចែករំលែកនូវមតិយោបល់ ការវិភាគ ឬការត្រិះរិះពិចារណា ក្នុងនាមលោកជាមន្ត្រីការពារសិទ្ធិ ទៅដល់ប្រិយមិត្តដ៏ស្ដួចស្ដើង ដែលមានចំនួនប្រមាណជាជាង១៥០នាក់។ អាចនិយាយបានថា មិត្តភ័ក្ររបស់លោក នៅលើគណនីរបស់លោកមានចំនួនតិចមែន តែអ្នកទាំងនោះភាគច្រើនជាមិត្តជិតដិត ជាអ្នកស្គាល់លោកនៅក្នុងអាជីព ឬជាមិត្តភ័ក្រខ្លឹមៗ ដែលមិនមែនមានតែឈ្មោះ (ឬគណនីខ្មោច) នោះឡើយ។
លោក ចាន់ សុវ៉េត បានបង្ហោះសារជាចុងក្រោយ នៅលើគណនីហ្វេសប៊ុករបស់លោកនោះ នៅថ្ងៃទី០៤ ខែធ្នូ ឆ្នាំ២០១៤។ អ្វីៗ វាហាក់ដូចជានៅថ្មីៗនៅឡើយ វៀលែងតែអ្នកដែលបង្ហោះបន្ថែមថ្មី នៅលើជញ្ជាំងរបស់គណនីលោកបន្ទាប់មក លែងជារូបលោកផ្ទាល់ទៀតហើយ។ ការបង្ហោះថ្មីៗទាំងនោះ ពោរពេញដោយកម្រងអនុស្សាវរីយ៍ ដែលមានទាំងជូរចត់ ទាំងផ្អែមល្អែម ឬពាក្យមរណៈទុក្ខ របស់មិត្តរួមអាជីព រួមគំនិត រួមយោបល់ ពោរពេញទៅដោយអត្ថន័យស្ដាយស្រណោះសកម្មជន ដែលបានលាលោកយើងនេះទៅ ទាំងក្មេងវ័យ។
សំណេរចុងក្រោយរបស់លោក បានដាស់តឿនកុំឲ្យមន្ត្រីដែលធ្វើការ ក្នុងនាមជាអ្នកការពារសិទ្ធិមនុស្ស តែបែរជាប្រកាន់យកគណបក្សនយោបាយជ្រុលពេក ដែលអាចធ្វើឲ្យប៉ះពាល់ដល់ជំហរឯករាជ្យ និងគោលការណ៍របស់ខ្លួន ដែលត្រូវដោះស្រាយបញ្ហាជូនពលរដ្ឋរងគ្រោះ។ ប៉ុន្តែសំណេរមុនសំណេរ ចុងក្រោយមួយទៀត ក្នុងថ្ងៃទី០៤ ខែធ្នូដដែលរបស់លោក ចាន់ សូវ៉េត កាន់តែគួរឲ្យចាប់អារម្មណ៍ ខ្លាំងជាងពាក្យពេជ្រ ដាស់តឿនមន្ត្រីសិទ្ធិមនុស្សខាងលើ ទ្វេឡើង។ ចាប់អារម្មណ៍ជាង ព្រោះវាមានន័យស៊ីជម្រៅរបស់វា ដែលបណ្ដាអ្នកនយោបាយ អ្នកសិក្សាកវីនិពន្ធ រួមនឹងយុវជនជំនាន់ក្រោយទាំងឡាយ គម្បីត្រូវតែអាន ឲ្យបានគ្រប់តួអក្សរ។
ក្នុងសារនោះ បានបញ្ជាក់ច្បាស់ ថាលោក ចាន់ សូវ៉េត គឺជាវីរជនដែលមានគំនិតជាតិនិយម ក្នុងនាមជាខ្មែរស្នេហាជាតិមួយរូប ទាក់ទងនឹងបញ្ហាអន្តោប្រវេសន៍វៀតណាមខុសច្បាប់ ដែលមានចំនួនពោរពាស នៅក្នុងទឹកដីមាតុភូមិរបស់លោក។ លោកបានពន្យល់ថា ជនជាតិវៀតណាមខ្លះ ថែមទាំងមានថានៈបុណ្យស័ក្តិធំៗ នៅក្នុងជួររដ្ឋាភិបាលសព្វថ្ងៃ «ដោយស្រួល»នោះទៀត។ លោកទំនងជាចង់និយាយយោង ដល់ករណីលោកឧកញ៉ា ថោង សារ៉ាត់ ដែលមានដើមកំណើតជាវៀតណាម តែត្រូវបានអាជ្ញាធរស្វែងរកចាប់ខ្លួន ជុំវិញឃាតកម្មលើលោក អ៊ឺង ម៉េងជឺ និងបែកធ្លាយថា លោក ថោង សារ៉ាត់ រួមនឹងសមាជិកគ្រួសារ មានពាក់ផ្កាយព្រោងព្រាត នៅលើស្មា។
ដោយសារយោបល់ គំនិត ការវិភាគ និងកាយវិការរបស់លោកទាំងនេះហើយ ដែលធ្វើឲ្យអ្នកនិពន្ធអត្ថបទនេះ (បុគ្គលិករបស់ទស្សនាវដ្ដីមនោរម្យ.អាំងហ្វូ) អត់ទ្រាំមិនចុច ADD លោក ចាន់ សូវ៉េត ជា Friend បើទោះជាលោក លែងមកទទួលមិត្តក្នុងហ្វេសប៊ុក បានតទៅទៀតក៏ដោយ។ យើងដឹងថា លោក ចាន់ សូវ៉េត ច្បាស់ជាបានទៅកាន់សុខគតិភព។ បើទោះជាលោកបានស្ដាប់លែងឮ មើលលែងឃើញទៅហើយក្ដី តែយើងគ្រាន់តែចង់ឲ្យលោកដឹងថា ការចាកចេញមិនវិលត្រឡប់របស់លោក បានធ្វើឲ្យយើងយំ!ៗ! យំស្ដាយស្រណោះលោក ទាំងក្នុងថ្ងៃនេះ និងជារៀងរហូតទៅ៕