ព្រះអគ្គិឆេះផ្ទះពលរដ្ឋច្រើនសិបខ្នងនៅបឹងឈូក សង្ស័យមានគម្រោងដុត
- ដោយ: ក. វិច្ចនី អត្ថបទ និងយកការណ៍ ៖ក. វិច្ចនី ([email protected]) - ភ្នំពេញ ថ្ងៃទី ២០ ធ្នូ ២០១៤
- កែប្រែចុងក្រោយ: December 21, 2014
- ប្រធានបទ: គ្រោះ
- អត្ថបទ: មានបញ្ហា?
- មតិ-យោបល់
-
បើគិតមកទល់យប់ ម៉ោង១៩និង៤៥នាទីល្ងាចថ្ងៃទី២០ ខែធ្នូ ឆ្នាំ២០១៤ ម្សិលម៉ិញនេះ អគ្គីភ័យដែលបានឆាបឆេះផ្ទះប្រជាពលរដ្ឋ នៅសហគមន៍បឹងឈូក ខាងត្បូងស្នងការដ្ឋាននគរបាលរាជធានីភ្នំពេញ ដែលស្ថិតក្នុងភូមិបឹងឈូក សង្កាត់គីឡូម៉ែត្រលេខ៦ ខណ្ឌឫស្សីកែវ បានរលត់ទាំងស្រង់។
របាយការណ៍ភ្លាមៗ ពីខាងអាជ្ញាធរបានឲ្យដឹងថា គ្រោះអគ្គីភ័យនេះ បានបណ្ដាលឲ្យខូចខាតផ្ទះចំនួន ៣៣ខ្នង និងបានប្រើប្រាស់ឡានពន្លត់អគ្គិភ័យចំនួន១៦ គ្រឿង។ ចំពោះមូលហេតុដែលបង្កឲ្យមានអគ្គិភ័យនេះ នៅមិនទាន់ត្រូវបានអាជ្ញាធររកឃើញនៅឡើយ។ ប៉ុន្តែមិនមានមនុស្សណាម្នាក់ រងគ្រោះថ្នាក់នៅក្នុងអគ្គីភ័យនេះទេ។
សម្រាប់ប្រជាសហគមន៍ នៅតំបន់នោះវិញ បាននិយាយថា អគ្គីភ័យឆាបឆេះបានឆាបឆេះអស់លំនៅដ្ឋានជាង៤០ខ្នង។ គ្រោះអគ្គីភ័យនេះ ត្រូវក្រុមប្រជាសហគមន៍សង្ស័យថា មានការរៀបគំរោងទុកជាមុន ដោយជន ឬក្រុមណាមួយ ដើម្បីដុតផ្ទះប្រជាពលរដ្ឋ ខណៈពេលដែលអាជ្ញាធរកំពុងព្យាយាម បណ្តេញប្រជាពលរដ្ឋ ពីតំបន់នោះ ទាំងគ្មានមូលហេតុច្បាស់លាស់។
តំណាងសហគមន៍មួយរូប ក្នុងល័ក្ខខ័ណ្ឌមិនបញ្ចេញឈ្មោះ បានអះអាងប្រាប់ទស្សនាវដ្ដីមនោរម្យ.អាំងហ្វូ តាមទូរស័ព្ទថា កន្លងមក អាជ្ញាធរធ្លាប់បានជូនដំណឹង ដល់ប្រជាពលរដ្ឋទាំងនោះ ឲ្យរុះរើផ្ទះសំបែងរបស់ពួកគាត់ចេញ តែមិនបានប្រាប់មូលហេតុច្បាស់លាស់ឡើយ។
ម៉្យាងទៀត នៅពេលដែលភ្លើងទើបតែឆេះ ផ្ទះពលរដ្ឋមួយខ្នងនៅឡើយ ក្រុមប្រជាសហគមន៍នៅតំបន់នោះ បានព្យាយាមជួយគ្នារកទឹកទៅពន្លត់ភ្លើង ដែលឆេះផ្ទះដំបូងគេនោះ ប៉ុន្តែក្បាលរ៉ូប៊ីណេទឹកនៅតាមផ្ទះនីមួយៗ បើកទឹកមិនចេញទាល់តែសោះ ទើបធ្វើឲ្យភ្លើងឆេះ រាលដាលកាន់តែខ្លាំងឡើងៗ ទម្រាំតែឡានទឹកមកដល់ ភ្លើងបានឆក់យកផ្ទះអស់ជាង ៤០ខ្នងទៅហើយ។
ទស្សនាវដ្ដីនៅមិនទាន់ទទួលប្រតិកម្មពីខាងអាជ្ញាធរ ឬពីលោក ឡុង ឌីម៉ង់ អ្នកនាំពាក្យសាលារាជធានីភ្នំពេញ បាននៅឡើយមកទល់នឹងម៉ោងនេះ៕