ថោង សារ់ាត់៖ ត្រឹម១ថ្ងៃ ភាពអយុត្តិធម៌បានបំផ្លាញគ្រួសារខ្ញុំ ព្រោះការមួលបង្កាច់ (vdo)
- ដោយ: អ៊ុម វ៉ារី អត្ថបទ និងយកការណ៍៖ អ៊ុម វ៉ារី ([email protected]) - ភ្នំពេញ ថ្ងៃទី១៩ ធ្នូ ២០១៤
- កែប្រែចុងក្រោយ: December 19, 2014
- ប្រធានបទ: ឧក្រិដ្ឋកម្ម
- អត្ថបទ: មានបញ្ហា?
- មតិ-យោបល់
-
ឃ្លីបវីដេអូប្រមាណជិតប្រាំនាទី បានបង្ហាញរូបរាង និងមុខមាត់របស់លោក ថោង សារ៉ាត់ ដោយធ្វើការសំពះ ស្នើសុំដល់នាយករដ្ឋមន្រ្តីលោក ហ៊ុន សែន ឲ្យជួយផ្តល់នូវយុត្តិធម៌ដល់ខ្លួន (ថោង សារ៉ាត់) គ្រួសារ និងអង្គរក្សទាំងបួន។ វីដេអូឃ្លីបនេះ ត្រូវបានបង្ហោះតាមរយៈទំព័រហ្វេសប៊ុកជាច្រើន នៅព្រឹកថ្ងៃទី១៩ ខែធ្នូ ឆ្នាំ២០១៤នេះ។
ជាមួយនឹងការអះអាងថា ខ្លួនលោក ថោង សារ៉ាត់ និងអង្គរក្ស«មិន» មានជាប់ពាក់ព័ន្ធនឹងឃាតកម្មរបស់លោក អ៊ឹង ម៉េងជឺ ប្រកបដោយភាសារឌឺន និយាយខ្មែរមិនចង់ច្បាស់ផងនោះ លោក ថោង សារ៉ាត់ បានបញ្ជាក់នូវ«ហេតុផលពីរ»យ៉ាង ក្នុងការ«ដោះបន្ទុក»ពីការចោទប្រកាន់ របស់សមត្ថកិច្ចមកលើរូបលោក និងអង្គរក្សទាំងបួន។
ហេតុផលទីមួយ- រូបលោក (ថោង សារ៉ាត់) និងលោក អ៊ឹង ម៉េងជឺ មិនដែលស្គាល់គ្នាពីមុនមកទេ ហើយក៏គ្មានទំនាក់ទំនងរកស៊ីអ្វីជាមួយគ្នា ជាងនេះក៏មិនមានដីជាប់ព្រំគ្នាឡើយ។ ដូច្នេះគ្មានមូលហេតុអ្វី ដែលលោកត្រូវសម្លាប់លោក អ៊ឹង ម៉េងជឺ នោះទេ។
ហេតុផលទីពីរ- បើសិបជាអង្គរក្សរបស់លោកពិតជាឃាតករមែននោះ តើនឹងហ៊ានជិះម៉ូតូទៅគ្រប់ទីកន្លែងទេ ខណៈវីដេអូរូបឃាតករ ត្រូវបានបង្ហោះព្រោងព្រាតពេញហ្វេសប៊ុក និងសារព័ត៌មាននោះ។ លោកបន្តថា បើអង្គរក្សរបស់លោក ដែលចោទថាជាអ្នកបាញ់ និងជាអ្នកដឹកនោះ ពិតជាបានប្រព្រឹត្តមែននោះ តើនឹងហ៊ានទៅបំភ្លឺនៅស្នងការដែរឬទេ?
ក្នុងហេតុផលទីពីរនេះ លោក ថោង សារ៉ាត់ បានបញ្ជាក់យ៉ាងច្បាស់ថា គេ(សមត្ថកិច្ច) បានចោទលើឈ្មោះ សៀង វាសនា ជាឃាតករ ដែលតាមពិត សៀង វាសនា ប្រើ«ដៃឆ្វេង» ឯឃាតករបានប្រើ«ដៃស្តាំ»ក្នុងការធ្វើឃាតកម្មលោក អ៊ឹង ម៉េងជឺ នោះ។
ការដាក់ការចោទប្រកាន់ លើអង្គរក្សទាំងបួនរបស់លោក ដោយសមត្ថកិច្ចនោះ ជាការមួលបង្កាច់ទាំងស្រុង។ ឯអង្គរក្សបីនាក់ផ្សេងទៀត លោកមានម៉ាស៊ីនកាមេរ៉ា ជាមួយនឹងម៉ាស៊ីនស្កេនមេដៃ ដែលបញ្ជាក់បានថាមិនបាននៅកន្លែងកើតហេតុ ពេលមានឃាតកម្មលើលោក អ៊ឹង ម៉េងជឺ នោះ។ នេះជាការបន្ថែមរបស់លោក ថោង សារ៉ាត់។
និយាយជាមួយនឹងការដកដង្ហើមធំ លោកថោងសារ៉ាត់ បានបញ្ជាក់បន្ថែមយ៉ាងដូច្នេះថា «រឿងទាំងអស់នេះ គឺគេចង់ធ្វើបាបរូបខ្ញុំ។ ចាប់អង្គរក្សខ្ញុំឲ្យសារភាព គោលបំណងគឺ ចោទរូបខ្ញុំតែប៉ុណ្ណឹង។ (...) ខ្ញុំបានផ្គត់ផ្គង់នូវលំនៅដ្ឋាន ដែលលមានតម្លៃថោក។ (...) ដែលជាហេតុធ្វើឲ្យមនុស្សជាច្រើន មិនសប្បាយចិត្ត បានរៀបចំគម្រោងការ មួលបង្កាច់ការពិត ទម្លាក់កំហុស។»
លោកស្នើ និងអំពាវនាវឲ្យនាយករដ្ឋមន្រ្តី ហ៊ុន សែន សើរើ បើកការអង្កេតក្នុងរឿងនេះសារជាថ្មី ដើម្បីស្វែងរកភស្តុតាងពិត បញ្ជាក់ភាពយុត្តិធម៌ និងស្អាតស្អំសម្រាប់លោក និងអង្គរក្សទាំងបួន។ លោកបានថ្លែងទៀតថា៖ «យើងខ្ញុំពិតជារងនូវភាពអយុត្តិធម៌ខ្លាំងណាស់ សូមសម្តេចជួយរកយុត្តិធម៌ ឲ្យយើងខ្ញុំទាំងអស់គ្នាផង»។
ទស្សនាវដ្តីមនោរម្យ.អាំងហ្វូ មិនអាចសុំការបញ្ជាក់ពីលោក ខៀវ សុភ័គ អ្នកនាំពាក្យ ក្រសួងមហាផ្ទៃ បានទេ ដោយទូរស័ព្ទរបស់លោកគ្មានការទទួល។ ប៉ុន្តែទាក់ទងនឹងអាត់សម្លេងចំនួនពីរមុន ដែលគេគិយថា ជាសម្លេងរបស់លោក ថោង សារ៉ាត់ នោះ ធ្លាប់ត្រូវបានលោក ខៀវ សុភ័គ អះអាងថា សមត្ថកិច្ចកំពុងសិក្សាពិនិត្យពីសម្លេងនោះ។ ប៉ុន្តែលើកនេះ មន្ទិលដែលសង្ស័យថាជាលោក ថោង សារ៉ាត់ ឬមិនមែននោះ ដូចជាមិនចាំបាច់ទៀតទេ។
ដោយឡែក តាមការចុះផ្សាយរបស់សារព័ត៌មានក្នុងស្រុកមួយ បានបញ្ជាក់ថា លោក ថោង សារ៉ាត់ ធ្លាប់មានទំនាស់ជាមួយលោក អាំង នារតី ប្រធានសាលាដំបូងរាជធានីភ្នំពេញ ក្នុងរឿង លក់-ទិញភូមិគ្រឹះមួយ ក្នុងរាជធានីភ្នំពេញជាមួយតម្លៃទឹកប្រាក់ជាង២២ម៉ឺនដុល្លា។ សារព័ត៌មាននោះ បានបញ្ជាក់ថា លោកចៅក្រម អាំង មាលតី ជាដើមបណ្តឹងព្រហ្មទណ្ឌ ដោយបានចោទលោក ថោង សារ៉ាត់ ពី«បទឆបោកពាក់ព័ន្ធ នឹងករណីលក់-ទិញភូមិគ្រឹះមួយកន្លែងប្រភេទ Friendship Villa ឋិតនៅបុរីកាលីហ្វ័រញ៉ា ស៊ីធី ក្នុងសង្កាត់ទឹកល្អក់៣ ខណ្ឌទួលគោក រាជធានីភ្នំពេញ មានតម្លៃទឹកប្រាក់ចំនួន២២៥.០០០ដុល្លារអាមេរិក។»
សូមទស្សនាវីដេអូទាំងស្រុង របស់លោក ថោង សារ៉ាត់ ដូចតទៅ៖