រសៀលថ្ងៃទី១៥ ខែធ្នូ កន្លង​មក​នេះ នា​វិមាន​រដ្ឋសភា ក្រុម​ការងារ​គណបក្ស​ទាំង​ពីរ បន្ត​ពិភាក្សា​លើ​វិសោធន​កម្ម​សេចក្តី​ស្នើ​«ច្បាប់​ស្តី​ពី​ការ​បោះឆ្នោត ជ្រើសតាំង អ្នក​តំណាង​រាស្ត្រ»។ អាសនៈ​ក្នុង​រដ្ឋសភា ត្រូវ​បាន​ជជែក​គ្នា​ជា​ថ្មី រវាង​គណបក្ស​ប្រជាជន​កម្ពុជា និង​គណបក្ស​សង្គ្រោះ​ជាតិ ដើម្បី​បញ្ចូល ក្នុង​សេចក្តី​ស្នើ​ច្បាប់​ស្តី​ពី «ការ​បោះ​ឆ្នោត​ជ្រើសតាំង​អ្នក​តំណាង​រាស្ត្រ»។

ការកំណត់ចំនួនអាសនៈ សម្រាប់​គណបក្ស​ប្រជាជន​កម្ពុជា តំណាង​គណបក្ស​សង្គ្រោះ​ជាតិ​លោក គួយ ប៊ុនរឿន បាន​លើក​ឡើង​ថា ក្រុម​ការងារ​គណបក្ស​ទាំង​ពីរ បាន​ធ្វើការ​ពិភាក្សា​ជា​ថ្មី ដើម្បី​កំណត់​រូបមន្ត នៃ​ការ​បង្កើន​ចំនួន​អាសនៈ​ក្នុង​រដ្ឋសភា យក​តាម​រូបមន្ត នៃ​បណ្តា​ប្រទេស​ធំៗ​មួយ​ចំនួន។ រូបមន្ត​នេះ​ក៏​គោរព និង​ស្រប​តាម​ច្បាប់​រដ្ឋធម្មនុញ្ញ​កម្ពុជា​ដែរ ដែល​ផ្តល់​អាសនៈ​សម្រាប់​សមាជិក​រដ្ឋសភា មិន​តិច​ជាង​១២០​អាសនៈ​នោះ។

លោក គួយ ប៊ុនរឿន បានបញ្ជាក់ថា៖ «ជាគោលការណ៍ យើងចង់ឲ្យមានអ្នកតំណាងរាស្ត្រសមល្មម នៅតាម​មណ្ឌលនីមួយៗ បំពេញកាតព្វកិច្ចរបស់ខ្លួន ដើម្បីបំរើផលប្រយោជន៍ប្រជាពលរដ្ឋ។ (...) បើសិនមានករណី មានតំណាងរាស្ត្រនៅតាមមណ្ឌលមិនគ្រប់គ្រាន់ ឧទាហរណ៍នៅខេត្តសៀមរា អញ្ចឹង ដល់ជិត១លាននាក់ ហើយអ្នកតំណាងរាស្ត្រមានតែ ៦រូប»។

តំណាងគណបក្សប្រជាជនកម្ពុជា លោក ប៊ិន ឈិន បានថ្លែងឲ្យដឹងដែរថា គណបក្សទាំងពីរបានឯកភាពគ្នា លើចំនុចសេសសល់មួយចំនួនរួចរាល់ហើយ។ តែសម្រាប់ការបន្ថែមអាសនៈនៃរដ្ឋសភា សម្រាប់គណបក្ស​ប្រជាជនកម្ពុជារបស់លោក នៅតែឈរលើគោលការណ៍រក្សាចំនួនអាសនៈ ឲ្យនៅចំនួន១២៣ដដែល ដោយ​យោង​តាមច្បាប់បោះឆ្នោតចាស់។

លោក ប៊ិន ឈិន បានបន្ថែមថា «គណបក្សប្រជាជនកម្ពុជាចង់ឲ្យកំណត់ចំនួនអាសនៈរដ្ឋសភា ត្រឹមតែ១២៣​អាសនៈ​ដដែល ដើម្បីកុំឲ្យមានបញ្ហាអ្វីទៀត។ (…) ហើយនៅប្រទេសធំៗ ពិសេសនៅជប៉ុនមានចំនួន​អាសនៈ​រដ្ឋសភាតែ៥០០នាក់។ នៅថៃក៏មានតែ៥០០នាក់យូរមកហើយ។ នៅឥណ្ឌា ក៏មិនមានការបង្កើនចំនួន​អាសនៈ​អ្វីនោះដែរ។»

» សូមអាចអត្ថបទដែលទាក់ទង ដោយចុចនៅលើទីនេះ។

ករណីនៃការបង្កើនចំនួនអាសនៈនេះ ត្រូវបានលោក គួយ ប៊ុនរឿន អះអាងថា មិនទាន់សម្រេចត្រូវបោះបង់ ឬបញ្ចប់នោះទេ ទោះជាបរាជ័យក្នុងការពិភាក្សាលើកទីពីរក៏ដោយ តែបានទុករយៈពេល ក្នុងការពិចារណា​ទាំងអស់គ្នា ជាបន្តសិន។

ក្នុងកិច្ចប្រជុំបិទទ្វារ (សម្ងាត់) កាលពីរសៀលថ្ងៃទី១៥ ខែធ្នូម្សិលម៉ិញនេះ គណបក្សប្រជាជនកម្ពុជា នៅតែ​មិនឯកភាពគ្នា លើការបង្កើនចំនួនអាសនៈនៅរដ្ឋសភា សម្រាប់ការបោះឆ្នោតអាណត្តិទី៦ នាឆ្នាំ២០១៨​ដដែល។ តាមសម្រង់សម្តីក្នុងអង្គប្រជុំបិទទ្វានេះ លោក គួយ ប៊ុនរឿន លើកឡើងថាថា ខាងគណបក្ស​ប្រជាជនកម្ពុជា មិនឯកភាពឲ្យមានការបង្កើនចំនួនអាសនៈរដ្ឋសភា ព្រោះខ្លាចពិបាកក្នុងការបន្ថែមកៅអី ឬធ្វើកន្លែងថ្មីសម្រាប់តំណាងរាស្ត្រអង្គុយនៅក្នុងរដ្ឋសភា។ ហើយគណបក្សប្រជាជនកម្ពុជា នៅតែយក​គោល​ការណ៍ច្បាប់ចាស់១២៣អាសនៈ និងស្នើឲ្យលុបចោលមាត្រា៧ និងមាត្រា៩ ចោល។

សូមបញ្ជាក់ថា ក្រុមការងារនៃគណបក្សទាំងពីរ ក្នុងការជួបគ្នាពីរលើកមកហើយនោះ បានសម្រេចជជែក​ចប់​សព្វគ្រប់បាន៤ជំពូក ក្នុងចំណោម១២ជំពូក នៃច្បាប់ស្ដីពី«ការបោះឆ្នោតជ្រើសតាំងអ្នកតំណាងរាស្ត្រ»។ ហើយ​ក្រុមការងារនឹងបន្តរការចរចាជាថ្មីម្តងទៀត នារសៀលថ្ងៃសុក្រទី១៩ ខែធ្នូ ឆ្នាំ២០១៤ ដោយត្រូវពិភាក្សា លើការធ្វើវិសោធនកម្មច្បាប់បោះឆ្នោតបន្តទៀត មុននឹងដាក់ចូលសភាធ្វើការអនុម័ត៕