ថ្នាក់​ដឹកនាំ​កម្ពុជា​មើល​មិន​ឃើញ​ប្អូន​​ស្រី ហ៊ុន សែន ចាញ់​​វៀតណាម?

លោកស្រី ហ៊ុន ស៊ីណាត និងលោកស្រី ហ៊ុន សេងនី ដែលសុទ្ធតែជាប្អូនស្រីបង្កើត របស់លោក ហ៊ុន សែន ទើប​នឹង​ទទួល​មេដាយ​«ស្នេហាជាតី» និងប័ណ្ណសរសើរ ពីក្រសួងការពារជាតិវៀតណាម កាលពីថ្ងៃទី ១០ធ្នូនាពេលថ្មីៗកន្លង​មក​នេះ។ នៅជុំវិញហេតុការណ៍នេះ យុវជនខ្មែរមួយចំនួនបានបញ្ចេញប្រតិកម្ម។
Loading...
  • ដោយ: ក. វិច្ចនី អត្ថបទ និងយកការណ៍៖ ក. វិច្ចនី ([email protected]) - ភ្នំពេញ ថ្ងៃទី ១៣ ធ្នូ ២០១៤
  • កែប្រែចុងក្រោយ: December 15, 2014
  • ប្រធានបទ: ឥស្សរជន
  • អត្ថបទ: មានបញ្ហា?
  • មតិ-យោបល់

ស្ត្រីវ័យចំណាស់ទាំងពីររូប ដែល​ជា​ប្អូន​ស្រី​បង្កើត​របស់​បុរស​ខ្លាំង​កម្ពុជា ទំនង​ជា​អង្គុយ​សម្លឹង​មេដាយ និង​បណ្ណ​សរសើរ​ផ្ដល់​ដោយ​រដ្ឋាភិបាល នៃ​សារធារណៈរដ្ឋ​សង្គម​និយម​វៀតណាម មិន​ជា​សុខ​ស្រួល​ក្នុង​ចិត្ត​ប៉ុន្មាន​ទេ។ ព្រោះ​ក្រោយ​ពី​ព្រឹត្តិការណ៍ ដែល​គេ​គួរ​តែ​អបអរ​ នូវ​ងារ​ដែល​ទទួល​បាន​ពី​ប្រទេស​ជា​បង​ប្អូន​ម៉ឺន​ឆ្នាំ​ជិត​ខាង ថា​ជា​វីរនារី​«ស្នេហា​ជាតិ»​នេះ លោក​ស្រី​ទាំង​ពីរ​នាក់​បង​ប្អូន បែរ​ជា​រង​ការ​រិះ​គន់​តិទៀន​យ៉ាង​ចាស់​ដៃ ពី​សំណាក់​អ្នក​ប្រើ​ប្រាស់​បណ្តាញ​សង្គម​ហ្វេសប៊ុក និង​ពី​មតិ​យុវជន​មួយ​ចំនួន​ទៅ​វិញ។

នៅលើបណ្ដាញសង្គម ទស្សនាវដ្ដី​មនោរម្យ.អាំងហ្វូ មិន​ចាំ​បាច់​ដក​ស្រង់ ពី​មតិ​យោបល់​របស់​ប្រិយ​មិត្ត ដែល​បាន​សរសេរ​ប្រតិកម្ម​ទៅ​លើ​ព្រឹត្តិការណ៍​នេះ​ទេ។ តែ​ទុក​ឲ្យ​ប្រិយមិត្ត​អ្នក​អាន​ស្វែង​យល់​ដោយ​ខ្លួន​ឯង ជា​មួយ​នឹង​វីដេអូ​ដែល​ត្រូវ​បាន​បង្ហោះ​តាំង​ពី​ថ្ងៃ​ទី១០ ខែ​ធ្នូ ឆ្នាំ​២០១៤​ ភ្លាមៗ​បន្ទាប់​ពី​ពិធី​ផ្ដល់​មេ​ដាយ​នោះ ដល់​ស្ត្រី​កិត្តិយស​ទាំង​ពីរនាក់ (អ្នក​ទទួល​មេដាយ​មាន​ដល់​ទៅ​បី​នាក់ ម្នាក់​ទៀត ជា​មន្ត្រី​ជាន់​ខ្ពស់​របស់​ក្រសួង​ការពារ​ជាតិ​កម្ពុជា អ្នកស្រី ហង្ស​​ បូរី) រួច។

តែសម្រាប់យុវជនមួយចំនួន ដែលទស្សនាវដ្ដីបានជួបសម្ភាសដោយផ្ទាល់ បានបង្ហាញនូវចំណាប់​អារម្មណ៍​របស់ពួកគេ ថាករណីដែលវៀតណាមផ្ដល់ងារ ឲ្យស្ត្រីទាំងបីររូបថាជា«វីរនារីស្នេហាជាតិ» ដោយសារតែ​បាន​ធ្វើជា«ចារនារីយោធា»នោះ វាដូចជារឿងមួយដែលមិនគួរឲ្យជឿ។

កញ្ញា ទេពសរ ស៊ីណា អតីតនិស្សិតផ្នែកច្បាប់ នៅសាកលវិទ្យាល័យនិតិសាស្រ្ត និងវិទ្យាសាស្រ្តសេដ្ឋកិច្ច បាន​លើកឡើងថា ប្រហែលជាលោកស្រី ហ៊ុន ស៊ីណាត បានធ្វើអ្វីដែលជាផលប្រយោជន៍ដល់ប្រទេស​វៀតណាម ទើបបានប្រទេសនេះផ្តល់មេដាយ ជូនលោកស្រីដូច្នេះ។

មេដឹកនាំកម្ពុជាមើលមិនឃើញប្អូនស្រីបង្កើត របស់លោក ហ៊ុន សែន!

កញ្ញា ស៊ីណា បានបន្តទៀតថា កន្លងមក លោកស្រីស៊ីណាតមិនទាន់បានធ្វើអ្វី ដែលមានផលប្រយោជន៍ដល់​កម្ពុជានៅឡើយ។ ព្រោះប្រសិនជាមាន នោះព្រះមហាក្សត្រនៃព្រះរាជជាណាចក្រកម្ពុជា ព្រះបាទ នរោត្តម សីហមុនី និងក្រសួងការពារជាតិកម្ពុជា នឹងផ្តល់ជាគ្រឿងឥស្សរិយយស សំរាប់លោកស្រីជាមិនខាន។ ពាក់​ព័ន្ធនឹងរឿងនេះ កញ្ញាហ៊ានសន្និដ្ឋានបានតែមួយគត់​ នោះគឺលោកស្រីប្រាកដជាបម្រើផលប្រយោជន៍ ដល់​ប្រទេសវៀតណាមច្រើនជាងប្រទេសកម្ពុជា។

រីឯនិស្សិតផ្នែកវិទ្យសាស្ត្រនយោបាយ នៅសាកលវិទ្យាល័យខេមរៈ កញ្ញា សឿន សុខខេន​ បាននិយាយថា វាគ្មានតម្លៃអ្វីនោះទេ ដែលប្រទេសវៀតណាមជាអ្នកផ្តល់មេដាយជូនលោកស្រីទៅវិញ ហើយប្រសិន​បើ​លោក​ស្រី​ជា​ជន​ដែលសកម្ម ក្នុងការងារសង្គមកម្ពុជាពិតមែននោះ វាគួរណាតែថ្នាក់ដឹកនាំកម្ពុជា ជាអ្នក​ផ្តល់ជូន​លោកស្រី។

គួរបញ្ជាក់ថា​ ក្រសួងការពារជាតិនៃប្រទេសវៀតណាម បានផ្តល់មេដាយនិង ប័ណ្ណសរសើរជូនលោកស្រី ហ៊ុន ស៊ីណាត លោកស្រី ហ៊ុន សេងនី និងលោកស្រី ហង្ស បូរី តាមរយៈពិធីជាឯកជនមួយ ក្នុងស្ថានទូត​វៀតណាម​នារាជធានីភ្នំពេញ។ ប៉ុន្តែនៅក្នុងឱកាសនោះ មានតែលោកស្រី ហ៊ុន ស៊ីណាត និងលោកស្រី ហង្ស បូរី ប៉ុណ្ណោះ ដែលបានមកទទួលដោយទឹកមុខរីកប៉ប្រឹម នូវមេដាយ«ស្នេហាជាតិ»ថ្នាក់លេខ ៣នេះ ដែលមាន​ឋានៈស្មើរ​នឹង​រដ្ឋមន្ត្រីនៅប្រទេសវៀតណាម។ លោកស្រី ហង្ស បូរី ខ្លួនឯងបានប្រកាសថា នេះជាតឹកតាងបង្ហាញថា ប្រជាជន​វៀតណាមទាំងអស់ គោរពលាញ់មន្ត្រីកម្ពុជា ប្រៀបដូចជាម្តាយឪពុករបស់ជនជាតិវៀតណាមអញ្ចឹងដែរ៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...