បវរកញ្ញាតំបន់ Côte d'Azur មិនជាប់បវរកញ្ញាបារាំង ព្រោះសុដន់ធំ?
- ដោយ: ឈូករ័ត្ន អត្ថបទ៖ ឈូករ័ត្ន ( [email protected]) - ប៉ារីស ថ្ងៃទី១៥ ធ្នូ ២០១៤
- កែប្រែចុងក្រោយ: December 15, 2014
- ប្រធានបទ: រាជនីសម្ផស្ស
- អត្ថបទ: មានបញ្ហា?
- មតិ-យោបល់
-
ជាមួយនឹងកំពស់ ១,៧០ម៉ែត្រ កញ្ញា ឆ្សាឡុត ពីរ៉ូនី (Charlotte Pirroni) មកពីតំបន់កូដដាហ្សៀរ (Côte d'Azur ភាគខាងត្បូងបារាំង) បានជាប់លេខបី នៅក្នុងការប្រកួតបវរកញ្ញាបារាំង កាលពីចុងសប្ដាហ៍មុន។ ប៉ុន្តែក៏ដោយសារកំពស់នេះដែរ ទើបនាងត្រូវបានអ្នកប្រើប្រាស់បណ្ដាញសង្គមជាច្រើន រិះគន់ថាមានកំពស់ទាបពេក មិនត្រូវខា្នតនឹងក្លាយជាបវរកញ្ញាឯក។
កញ្ញាដ៏ស្រស់ប្រិមប្រិយ និងមានរូបរាងស៊ិចស៊ី បានថ្លែងនៅក្នុងកិច្ចសម្ភាសមួយ ជាមួយទស្សនាវដ្ដីបារាំង Télé Loisirs ជុំវិញកំពស់របស់នាងថា៖ «គេបាននិយាយជាមួយនឹងខ្ញុំហើយ ពីបញ្ហានេះ ហើយថែមទាំងមានសង្គ្រាមពាក្យសម្ដីបានផ្ទុះឡើងទៀត នៅបន្ទាប់ពីខ្ញុំបានជាប់ជាបវរកញ្ញាតំបន់។ បញ្ហានេះ វាបានធ្វើឲ្យខ្ញុំរស់មិនស្រួលតាំងពីពេលនោះមកម្លេះ។»
នាងបានពន្យល់បន្តថា៖ «ខ្ញុំដឹងខ្លួនមុនហើយថា ខ្ញុំនឹងគ្មានវាសនាជាប់ជាបវរកញ្ញាឯកទេ ព្រោះខ្ញុំមានកំពស់តែ១,៧០ ម៉ែត្រ ខណៈអ្នកផ្សេងទៀត មានកំពស់ចាប់ពី១,៧៤ម៉ែត្រឡើង។ តែកំពស់ខ្ញុំនេះ ក៏មានលក្ខណៈត្រឹមត្រូវ នៅក្នុងល័ក្ខខ័ណ្ឌនៃការជ្រើសរើសដែរ។ បើអញ្ចឹង រឿងអីដែលខ្ញុំមិនអាចជាប់ជាបវរកញ្ញាឯកនោះ?»
ប៉ុន្តែកំពស់របស់នាង មិនមែនជារឿងតែមួយ ដែលប្រិយមិត្តជាច្រើនតាមរិះគន់នោះទេ។ តែមនុស្សជាច្រើន បានរិះគន់ទៅលើសុដន់ទាំងគូរថា មានលក្ខណៈថ្លោសៗពេក ហើយបើប្រៀបទៅនឹងកំពស់ មិនសមាមាត្រគ្នាទេ។ តែកញ្ញាឆ្សាឡុត បានការពារខ្លួនទៀតថា៖ «ចំពោះដើមទ្រូងរបស់ខ្ញុំក៏អញ្ចឹងដែរ បានរងនូវការរិះគន់ច្រើនគួរសម។ តែសម្រាប់បវរកញ្ញាមួយរូប នាងមិនមែនជាតារាបង្ហាញម៉ូដ ដែលត្រូវមានដងខ្លួន ប្រៀបបាននឹងគ្រោងឆ្អឺងនោះឡើយ។ បវរកញ្ញា ត្រូវមានរាងរៅរបស់នាង។»
