ដីកា​ស្វែង​រក​ចាប់​ខ្លួន ថោង សារ៉ាត ទៅ​ដល់​គ្រប់​ទី​កន្លែង សូម្បី​នៅ​វៀតណាម​

ដីកាស្វែងរកតាមចាប់ខ្លួន និងនាំខ្លួនលោកឧកញ៉ា ថោង សារ៉ាត់ មកកាន់តុលាការរាជធានីភ្នំពេញ ត្រូវ​បាន​ចែក​ផ្សាយ​ទៅ​គ្រប់​ទី​កន្លែង រួមទាំងប្រទេសវៀតណាមផង។ នេះបើតាមប្រភពបានការមួយ ពីក្រសួងមហាផ្ទៃ។
Loading...
  • ដោយ: អ៊ុម វ៉ារី អត្ថបទ និងយកការណ៍៖ អ៊ុម វ៉ារី ([email protected]) - ភ្នំពេញ ថ្ងៃទី១២ ធ្នូ ២០១៤
  • កែប្រែចុងក្រោយ: December 13, 2014
  • ប្រធានបទ: ឧក្រិដ្ឋកម្ម
  • អត្ថបទ: មានបញ្ហា?
  • មតិ-យោបល់

នៅថ្ងៃទី១២ ខែធ្នូនេះ ទស្សនាវដ្តីមនោរម្យ.អាំងហ្វូ ទើប​ទទួល​បាន​ដីកា របស់​សាលា​ដំបូង​រាជធានី​ភ្នំពេញ​មួយ​ច្បាប់ ក្នុង​សំនុំ​រឿង​លោក ថោង សារ៉ាត់ ដែល​បាន​ចុះ​ហត្ថលេខា តាំង​ពី​ថ្ងៃ​ទី០៥ ខែ​ធ្នូ ឆ្នាំ​២០១៤ ដោយ​ចៅ​ក្រម​ស៊ើប​សួរ សាលា​ដំបូង​រាជធានី​ភ្នំពេញ​លោក លី សុខលេង ដោយ​បាន​បញ្ជា​កង​កម្លាំង​សាធារណៈ​ឲ្យ​ស្វែង​រក​ចាប់ និង​នាំ​ខ្លួន​ជន​ជាប់​ចោទ​ឈ្មោះ ថោង សារ៉ាត់ មក​ប្រគល់​ឲ្យ​សាលា​ដំបូង​រាជធានី​ភ្នំពេញ ដើម្បី​ចាត់​ការ​តាម​ច្បាប់។

កាលពីព្រឹកថ្ងៃ​ទី១២ ខែ​ធ្នូ​ដដែល​នេះ ជន​សង្ស័យ​ម្នាក់​ឈ្មោះ សៀង វាសនា ក្នុង​ចំណោម ជន​សង្ស័យ​ទាំង​បួន​នាក់​ដែល​កំពុង​ជាប់​ឃុំ ក៏​ត្រូវ​បាន​ចៅ​ក្រម​ស៊ើប​អង្កេត​នៃ​សាលា​ដំបូង​រាជធានី​ភ្នំពេញ បង្គាប់​ឲ្យ​អនុរក្ស​ពន្ឋនាគារ​នំា​ខ្លួន​មក​តុលាការ ដើម្បីបន្តសួរនំាបន្ថែមដែរ។ ការនាំមកតុលាការជាថ្មីនេះ ព្រោះចៅក្រម​សាលា​ដំបូង​ចង់​បាន​ការ​បញ្ជាក់​បន្ថែម ពីជនសង្ស័យ សៀង វាសនា ហៅស្នានេះ ពីករណីចម្លើយសារភាពថា កាល​ពី​ថ្ងៃ​ទី២២ ខែ​វិច្ឆិកា ឆ្នាំ២០១៤ ខ្លួនបានជិះម៉ូតូ ក៏ប្រទះឃើញឡានលោក អ៊ឹង ម៉េងជឺ ក្រោយការ៉ាស់​សំាង​កាល់តិច​បឹង​ត្របែក ហើយផ្តើមតាមដាន។

យ៉ាងណាក៏ដោយ រឿងឃាតកម្មដ៍ចម្រូងចម្រាស់នេះ សមត្ថកិច្ចនៅមិនទាន់បានបង្ហាញ ពន្លឺណាមួយ​ច្បាស់​លាស់នៅឡើយ ចំពោះឃាតករពិតនោះ។ ឯលោក ថោង សារ៉ាត់ ដែលសមត្ថកិច្ចជំនាញសង្ស័យថា​ជាមេ​គំនិត​នោះ ក៏នៅមិនទាន់មានការបញ្ជាក់ ថាកំពុងលាស់ខ្លួននៅទីណាឲ្យច្បាស់នៅឡើយដែរ។

សូមបញ្ជាក់ផងដែរថា ដីកាស្វែងចាប់ខ្លួន និងនាំខ្លួននោះ បានបង្ហាញថា ជនជាប់ចោទមានពាក់ព័ន្ធ នឹងសំណុំ​រឿងឃាតកម្មលើលោកឧកញ៉ា អ៊ឹង ម៉េងជឺ ពីបទផ្តើមគំនិតក្នុងអំពើឃាតកម្មគិតទុកជាមុន តាមបញ្ញត្តិ​មាត្រា​២៨ និងមាត្រា៤០០នៃក្រមព្រហ្មទណ្ឌ ។

មន្ត្រីជាន់ខ្ពស់ម្នាក់នៃក្រសួងមហាផ្ទៃ បានបង្ហើបឲ្យទស្សនាវដ្តីមនោរម្យ.អាំងហ្វូដឹងថា ដីកាស្វែងរកចាប់ខ្លួន​លោក ថោង សារ៉ាត់ នេះ បានបញ្ជូនទៅដល់ដៃអាជ្ញាធរគ្រប់ជាន់ថ្នាក់ និងគ្រប់កន្លែងអស់ហើយ រួមទាំងទៅ​ដល់ប្រទេសវៀតណាមផងដែរ។ ហើយសមត្ថកិច្ចបានត្រៀមរួចជាស្រេច ក្នុងការចាប់ខ្លួននេះ ក្នុងពេលវេលា​ជាក់លាក់មួយ នាពេលខាងមុខ។

ស្របសមត្ថកិច្ចកំពុងស្វែងរកចាប់ខ្លួនលោក ថោង សារ៉ាត់នោះ ក៏ស្រាប់តែមានសម្លេង«អនាមិក»ចំនួនពីរ ត្រូវបានបង្ហោះជាបន្តបន្ទាប់ តាមបណ្តាញព័ត៌មានសង្គម។ តាមសម្លេងអនាមិកនោះ បានអះអាងថា ខ្លួន​ឈ្មោះ ថោង សារ៉ាត់។

ចំពោះសម្លេង«អាថកំបាំង»នេះ កាលពីថ្ងៃទី៩ ខែធ្នូ ក៏ត្រូវបានអះអាង ដោយលោក គៀត ចន្ទថារិទ្ធ អ្នកនាំ​ពាក្យនគរបាលជាតិ ថាមន្រ្តីជំនាញកំពុងធ្វើការផៀងផ្ទាត់សម្លេង ដែលត្រូវបានបង្ហោះតាមបណ្តាញ​សង្គម​នោះ​ហើយ។ ស្រង់សម្តី ដោយសារព័ត៌មានក្នុងស្រុកមួយ កាលពីថ្ងៃទី១១ ខែធ្នូនេះ បានបង្ហាញថា លោក ខៀវ សុភ័គ អ្នកនាំពាក្យក្រសួងមហាផ្ទៃបានបញ្ជាក់ដូច្នេះថា៖ «យើងមិនខ្វល់ ពីសំឡេងនោះឡើយ។ បញ្ហា​សំខាន់ គឺយើងត្រូវចាប់ខ្លួនជនសង្ស័យឲ្យបាន។»។

កាលពីថ្ងៃទី ៨ ខែធ្នូ កន្លងមកនេះអ្នកនាំពាក្យក្រសួងមហាផ្ទៃខាងលើ ក៏បានបង្ហាញថា សមត្ថកិច្ចទំនង​ជា​ដឹង​ថា លោក ថោង សារ៉ាត់ លាក់ខ្លួននៅកន្លែងណាហើយ។ តែលោកបដិសេធសុំមិនធ្វើអត្ថាធិប្បាយទេ។ លោក​និយាយថា៖ «ប្រសិនជាខ្ញុំជានិយាយ សមត្ថកិច្ចមិនអាចធ្វើការងារស៊ើបអង្កេតនេះ បានជោគជ័យ​ឡើយ»៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...