ខ្សែ​អាត់​សម្លេង ថោង សារ៉ាត់ ថា​ករណី​ខ្លួន​ជា​រឿង​«ស្វា​ស៊ី​បាយ​លាប​មាត់​ពពែ»

តាមរយៈសំឡេងខ្សែអាត់ ដែលត្រូវបានគេអះអាងថា ជាសម្លេងរបស់លោក ថោង សារ៉ាត់ ថ្លែងពីកន្លែងលាក់ខ្លួន និង​ត្រូវ​បាន​អ្នក​ប្រើប្រាស់បណ្តាញសង្គម យកមកធ្វើការចែករំលែកតៗគ្នា បានឲ្យដឹងថា លោក ថោង សារ៉ាត់ ដែល​សមត្ថកិច្ច​កំពុង​តាម​ចាប់​ខ្លួន បានអះអាងពីភាពគ្មានជាប់ពាក់ព័ន្ធ ជាមួយនឹងឃាតកម្មបាញ់សម្លាប់លោក អ៊ឹង ម៉េងជឺ នោះទេ។
Loading...
  • ដោយ: ប្រាថ្នា អត្ថបទ៖ ប្រាថ្នា ([email protected]) - ភ្នំពេញ ថ្ងៃទី ០៩ ធ្នូ ២០១៤
  • កែប្រែចុងក្រោយ: December 10, 2014
  • ប្រធានបទ: ឧក្រិដ្ឋកម្ម
  • អត្ថបទ: មានបញ្ហា?
  • មតិ-យោបល់

ជាមួយនឹងសម្លេងយំយែក លោកឧកញ៉ា ថោង សារ៉ាត់ ដែល​កំពុង​រត់​គេច​ខ្លួន បាន​អំពាវនាវ​ឱ្យ​លោក​នាយក​រដ្ឋមន្ត្រី ជួយ​រក​យុត្តិធម៌​ដល់​គ្រួសារ​របស់​លោក ព្រម​ទាំង​បាន​បដិសេធ នូវ​រាល់​ការ​ចោទ​ប្រកាន់​ទាំង​អស់ របស់​សមត្ថកិច្ច​ដែល​ចោទ​ប្រកាន់​ថា លោក​គឺ​ជា​ឃាតករ​សម្លាប់​លោក​ឧកញ៉ា អ៊ឹង ម៉េងជឺ។

ឧកញ៉ា​វ័យ​ក្មេង​រូប​នោះ បាន​និយាយ​ថា មាន​តែ​លោក​នាយក​រដ្ឋមន្រ្តី ហ៊ុន សែន តែ​ប៉ុណ្ណោះ ដែល​អាច​ជួយ​រក​យុត្តិធម៌​ឱ្យ​ខ្លួន និង​ក្រុម​គ្រួសារ​បាន។ លោក​សំណូមពរ​ឱ្យ​នាយក​រដ្ឋមន្រ្តី ជួយ​ធ្វើ​អន្តរាគមន៍​ធ្វើការ​ស៊ើប​អង្កេត​ករណី​នេះ​ឡើង​វិញ ព្រោះ​វា​ជា​រឿង​អយុត្តិធម៌​ខ្លាំង​ណាស់ សម្រាប់​គ្រួសារ​របស់​លោក ដែល​ត្រូវ​គេ​មូល​បង្កាច់។

លោក ថោង សារ៉ាត់ ទទូចដល់បុរសខ្លាំងតែមួយ នៅកម្ពុជាថា៖ «សុំក្តីមេត្តាទៅ សុំត្រួតពិនិត្យឡើងវិញ ស៊ើប​អង្កេតឡើងវិញគ្រប់​ការងារហ្នឹង ការងារនេះអយុត្តិធម៌ខ្លាំងណាស់។ ខ្ញុំមិនដែលឃើញទេ ខ្ញុំមិនដែលឃើញ​អ្នកណា ដែលអាចធ្វើរឿងសទៅជាខ្មៅអញ្ចឹងទេហ៊ឺ។ ឥលូវយើងពិចារណា យើងគិតសាកមើល បើសិនជា​អង្គរក្សខ្ញុំបាញ់មែននោះ កាមេរ៉ាគេចាប់បាន (...) ហេតុអីបានជាពួកគាត់ហ៊ានការពារខ្ញុំ ជិះម៉ូតូមិនខ្លាច​គេ​​មើល​ឃើញទេអី?»

អះអាងទៅនឹងការបដិសេធថា លោកមិនបានបញ្ជាឱ្យសម្លាប់លោកឧកញ៉ា អ៊ឹង ម៉េងជឺ ឧកញ៉ាវ័យ៣៨ឆ្នាំ និង​ជាមន្រ្តីយោធារូបនេះ បញ្ជាក់ថា ប្រសិនបើជាកូនចៅរបស់លោក ជាឃាតករបាញ់សម្លាប់លោកឧកញ៉ា អ៊ឹង ម៉េងជឺ មែននោះ មិនមែនអង្គរក្សរបស់លោក ហ៊ានដើរច្រង៉េងច្រង៉ាងពេញថ្នល់ និងជិះម៉ូតូតាមការពារ​នោះ​ទេ។ លើសពីនេះទៅទៀត គេហ៊ានឱ្យសមត្ថកិច្ចនាំខ្លួន ទៅសួរនាំដោយមិនរត់គេចថែមទៀត។

ឧកញ៉ាដែលជាជាសង្ស័យទីមួយរូបនេះ បានត្អូញត្អែបន្តថា៖ «ហេតុអីគេដឹងថាត្រូវចាប់ហើយ គេមិនរត់? ហេតុ​អី គេហ៊ានទៅដល់កន្លែង ឱ្យសាកសួរទៀត ព្រោះពួកគាត់គិតថាពួកគាត់អត់បានធ្វើអញ្ចឹង? គាត់គិតថា វាមិន​អាចទៅរួចទេ រឿងអីទៅយក ... ឃើញលឺថាយកភស្តុតាងឯណា ភស្តុតាងឯណាមានយកចេញ​ទៅ ហើយ​មាន​ខ្សែអាត់ឯណា ខ្ញុំនិយាយទូរស័ព្ទជាមួយខាងហ្នឹង មានមកពីណា? ហើយខ្ញុំមានជម្លោះដីធ្លី​ឯណា​ទៅ?»

«វាអាក្រក់ខ្លាំងណាស់! មិនដែលឃើញសម័យណាដូចសម័យហ្នឹងទេ»

ជាមួយសម្លេងយំខ្សឹបខ្សួល ដែលរៀបរាប់ថា ករណីរបស់ខ្លួន ជារឿងស្វាស៊ីបាយលាបមាត់ពពែ លោក ថោង សារ៉ាត់ បានចោទប្រកាន់តុលាការថា បានទាលុយគ្រួសាររបស់លោក ដើម្បីជាថ្នូរនិងការ​ដោះលែងឪពុក​ម្តាយ។ ឧកញ៉ាវ័យក្មេងបានរៀបរាប់បន្តថា៖ «ខ្ញុំនិរទេសខ្លួនហើយ ប្រពន្ធជាប់ក្នុងហ្នឹង អត់មានអ្នកណាដក​លុយធនាគារបានទេ រត់ទៅខ្ចីគេ ខ្ចីឯង រត់ទៅលក់គ្រឿងអល្លង្កាមួយចំនួន ដែលនៅសល់នោះ ដើម្បីយក​ទៅ​ឱ្យតុលាការ ចាយវាយខ្ចាត់ខ្ចាយរាប់សិបម៉ឺនដុល្លា ក្នុងរយៈពេលប៉ុន្មានថ្ងៃហើយ ប៉ាម៉ាក់ខ្ញុំអត់បានចេញ ហើយ​គេយកទៅទៀត។ ទារច្រើនណាស់ គាត់ហួងហែងស៊ីគ្រួសារខ្ញុំតែម្តង វាអាក្រក់ខ្លាំងណាស់ មិនដែល​ឃើញសម័យណាដូចសម័យហ្នឹងទេ។»៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...