បវរកញ្ញាបារាំងឆ្នាំ២០១៥ ជានិស្សិតឯកទេសពាណិជ្ជកម្ម មកពីភាគខាងជើង (vdo)
- ដោយ: ឈូករ័ត្ន អត្ថបទ៖ ឈូករ័ត្ន ( [email protected]) - ប៉ារីស ថ្ងៃទី០៦ ធ្នូ ២០១៤
- កែប្រែចុងក្រោយ: December 07, 2014
- ប្រធានបទ: រាជនីសម្ផស្ស
- អត្ថបទ: មានបញ្ហា?
- មតិ-យោបល់
-
ក្នុងអាយុ១៩ឆ្នាំ យុវតី កាមី សេហ្វ៍ (Camille Cerf) បានក្លាយជាបវរកញ្ញាបារាំងដំបូងគេ ដែលចេញពីតំបន់ភាគខាងជើង ន័រប៉ាឌឺកាឡេ (Nord-Pas-de-Calais) របស់ប្រទេសបារាំង ហើយក៏បានក្លាយជាបវរកញ្ញាដែលមានសក់ពណ៌មាសជាថ្មីទៀត បើរាប់ពីបវរកញ្ញាសក់មាស តាំងពីឆ្នាំ២០០៦ នាង អាឡិចសង់ដ្រា រ៉ូសេនហ្វែលដ៍ (Alexandra Rosenfeld) នោះមក។ នាងត្រូវបានគណកម្មការប្រលងជ្រើសរើសបវរកញ្ញា ប្រកាសឈ្មោះនាង ឲ្យក្លាយជានារីដែលល្អស្អាតតំណាងឲ្យនារីបារាំង ពេញមួយឆ្នាំបន្តវេនពីនាង ផ្ល័រ៉ា កូគេរ៉េ (Flora Coquere) បវរកញ្ញាឆ្នាំ២០១៤។
រាជនីសម្ផស្ស កាមី សេហ្វ៍ បានថ្លែងឡើង ក្នុងកិច្ចសម្ភាសជាលើកដំបូង បន្ទាប់ពីនាងបានជាប់ជាបវរកញ្ញា ក្នុងយប់ដដែលថា៖ «ខ្ញុំសប្បាយរីករាយណាស់ ដែលបានធ្វើឲ្យតំបន់របស់ខ្ញុំ មានកិត្តិយសនេះ ហើយខ្ញុំសង្ឃឹមថា ខ្ញុំនឹងផ្ដល់មោទនភាព ឲ្យតំបន់ដើមកំណើតខ្ញុំនេះ កាន់តែខ្លាំងទៀត»។
នាងជាបេក្ខនារីដែលមានគេចូលចិត្តច្រើន តាំងពីដំបូងមក។ រូបថត និងការផ្សព្វផ្សាយទាំងឡាយ ដែលបានធ្វើសម្រាប់នាង កាមី នៅលើទំព័រហ្វេសប៊ុកនៃបវរកញ្ញាបារាំង ទទួលបានការចុចចូលចិត្តសឹងតែច្រើនជាងគេ។ បើទោះជានាង ជានិស្សិតឯកទេសខាងពាណិជ្ជកម្មក៏ពិតមែន ប៉ុន្តែទិសដៅអាជីពរបស់នាង មានបំណងចង់ក្លាយ ជាអ្នកទទួលបន្ទុកខាងទំនាក់ទំនង សម្រាប់ខេត្តណាមួយ។
នៅក្នុងការប្រកួត កាលពីយប់ថ្ងៃសៅរ៍ទី០៦ ខែធ្នូនេះ ពាក្យសម្ដីរបស់កញ្ញា កាមី ក៏បានទាក់ទាញចំណាប់អារម្មណ៍មិនតិចដែរ។ ជាមួយនឹងសម្ដីសម្ដៅ បែបកំប្លែងបន្តិចនោះផង នាង កាមី បានឆ្លើយថា នាងចង់ឧទ្ទិសតំណែងជាបវរកញ្ញារបស់នាង សម្រាប់ការប្រយុទ្ធប្រឆាំងនឹងរោគមហារីក។ សម្ដីនេះ មិនមែននាងបន្លឺឡើង គ្រាន់តែឲ្យល្អស្ដាប់ និងដើម្បីយកពិន្ទុប៉ុណ្ណោះទេ តែជម្ងឺដ៏អប្រិយនេះ បានកញ្ឆក់យកជីវិតរបស់ឪពុករបស់នាង កាលពីឆ្នាំទៅម៉ិញ។
នាងបានបង្ហាញជំនឿចិត្ត ក្នុងទំព័រមុខរបស់នាង នៅគ្រប់ការផ្សព្វផ្សាយរបស់ កម្មវិធីប្រកួតថា៖ «ថានៈជាបវរកញ្ញា មិនមែនអាចជប់ចេញសម្រេច នូវការប្រយុទ្ធប្រឆាំងនឹងជម្ងឺមហារីកឡើយ។ តែខ្ញុំគិតថា បើយើងរួមគ្នា យើងពិតជាអាចធ្វើឲ្យអ្វីៗ មានការប្រែប្រួលទៅមុខបាន។»៕
ខាងក្រោមនេះ ជារូបភាព និងវីដេអូ របស់នាង កាមី៖
