ហ៊ុន សែន៖ ផ្តល់អាសនៈក្រមឲ្យ សម រង្ស៊ី ស្មើនាយករដ្ឋមន្ត្រី ដើម្បីពង្រីកវប្បធម៌សន្ទនា
- ដោយ: អ៊ុម វ៉ារី អត្ថបទ និងយកការណ៍៖ អ៊ុម វ៉ារី ([email protected]) - ភ្នំពេញ ថ្ងៃទី០៤ ធ្នូ ២០១៤
- កែប្រែចុងក្រោយ: December 05, 2014
- ប្រធានបទ: នយោបាយ
- អត្ថបទ: មានបញ្ហា?
- មតិ-យោបល់
-
«អតុល្យភាព១២យ៉ាង» នៅកម្ពុជា ដែលលើកឡើងដោយលោក ហ៊ុន សែន ត្រូវបានលោក សម រង្ស៊ី គាំទ្រ។ បន្ថែមពីលើនេះ លោក សម រង្ស៊ី បានស្នើឲ្យបញ្ចូលអតុល្យភាព ចំនួនពីរទៀត នោះគឺ គម្លាតរវាងអ្នកមាននិងអ្នកក្រ ទៅលើបញ្ហាទ្រព្យសម្បត្តិ និងគម្លាតរវាងធនធានធម្មជាតិ និងការធ្វើអាជីវកម្មលើធនធានធម្មជាតិ។ នេះការលើកឡើង របស់នាយករដ្ឋមន្រ្តីកម្ពុជាលោក ហ៊ុន សែន កាលពីក្នុងពិធីចែកសញ្ញាបត្រ ដល់និស្សិតវិទ្យាស្ថានខ្មែរជំនាន់ថ្មី នាព្រឹកថ្ងៃទី ០៤ ខែធ្នូ ឆ្នាំ២០១៤នេះ ដោយលោកបានចាត់ទុកការឆ្លើយឆ្លងគ្នានេះ ថាជា«វប្បធម៌នៃការសន្ទនា ដើម្បីកសាងប្រទេសជាតិ»។
ផ្ដើមចេញពីគោលការណ៍នេះ ទើបលោក ហ៊ុន សែន បាននិយាយថា ការផ្ដល់អសនៈក្រម ទៅក្រុមតំណាងរាស្ត្រភាគតិច ឲ្យមានប្រធានម្នាក់មានថានៈស្មើ នាយករដ្ឋមន្ត្រីនោះ បានសេចក្ដីថា លោកចង់ពង្រីកឲ្យមាន«វប្បធម៌»សន្ទនាគ្នានេះ កាន់តែខ្លាំងឡើង និងដើម្បីជៀសវាងការដើរស្រែក តាមទីសាធារណៈ។
លោកនាយករដ្ឋមន្ត្រី បានពន្យល់ថា ការបង្កើតឲ្យមានក្រុមតំណាងរាស្ត្រសម្លេងភាគតិចនេះ មិនមែនត្រូវអនុវត្តតែពេលនេះ ក្នុងរដ្ឋសភាដែលមានតែពីរគណបក្សជាប់ឆ្នោតនោះទេ។ តែសម្រាប់ពេលខាងមុខ បើរដ្ឋសភាមានគណបក្សច្រើន គណបក្សដែលមានសមាជិកភាព៥%ឡើងលើ អាចបង្កើតឲ្យមានប្រធានក្រុមតំណាងរាស្រ្ត ទាំងបក្សក្នុងរដ្ឋាភិបាល និងបក្សក្រៅរដ្ឋាភិបាល។
ប៉ុន្តែនៅមានប្រធានក្រុមតំណាងរាស្រ្តមួយ ដែលមានសម្លេង២៥% ចាត់ទុកថាធំជាងគេ គឺជាដៃគូសន្ទនា ជាមួយនឹងប្រមុខរដ្ឋាភិបាល ទៅលើបញ្ហាប្រទេសជាតិ ដែលមានឋានៈស្មើនាយករដ្ឋមន្រ្តី។
លោកបានបន្តពន្យល់ទៀតថា ឋានៈស្មើនាយករដ្ឋមន្រ្តីនោះ មិនមែនមានន័យថា មាន«នាយករដ្ឋមន្រ្តីពីរ»ទេ។ លោកបានលើកជាឧទាហរណ៍មកបញ្ជាក់ ដូចសម្ដេចក្រុមព្រះ នរោត្តម រណឬទ្ធិ ដែលជាប្រធានឧត្តមក្រុមប្រឹក្សាព្រះមហាក្សត្រ ក៏មានឋានៈស្មើនាយករដ្ឋមន្រ្តីដែរ។
លោក ហ៊ុន សែន បានបញ្ជាក់ដូច្នេះថា ឋានៈស្មើនាយករដ្ឋមន្រ្តីនេះ គ្រាន់តែជា«អសនក្រម»សម្រាប់រៀបចំផ្នែកពីធិការប៉ុណ្ណោះ មិនមានសិទ្ធិអ្វី មកធ្វើការបញ្ជាទ័ព ឬដឹកនាំរាជរដ្ឋាភិបាលឡើយ។ ប្រធានក្រុមតំណាងរាស្រ្តនោះ មិនមានព្រះរាជក្រឹត្យតែងតាំង ឬត្រូវបានតែងតាំងដោយសភាឡើយ តែជាការជ្រើសរើសតាមសាម៉ីគណបក្សនយោនាយនីមួយៗ ដើម្បីជជែកពិភាក្សា និងដឹកនាំតំណាងរាស្រ្តមកពីគណបក្សរបស់ខ្លួន។
គួរបញ្ជាក់ដែរថា ការបង្កើតឲ្យមានក្រុមតំណាងរាស្ត្រសម្លេងភាគតិច ត្រូវបានសម្រេច នៅក្នុងជំនួបរវាងលោក ហ៊ុន សែន និងលោក សម រង្ស៊ី កាលពីថ្ងៃទី២៨ ខែវិច្ឆិកា កន្លងមក ក្នុងមន្ទីររដ្ឋសភា។ នៅក្នុងសេចក្ដីសម្រេចមួយ ចេញផ្សាយនៅក្រោយជំនួបនោះ បានសម្រេចឯកភាពគ្នាបីចំណុច ក្នុងនោះចំណុចទីពីរ បានអះអាងពីការឯកភាព ឲ្យកែសម្រួលបទបញ្ជាផ្ទៃក្នុងរដ្ឋសភា បង្កើតឲ្យមានប្រធានក្រុមសម្លេងភាគតិច ដើម្បីមកជជែកជាមួយនាយករដ្ឋមន្ត្រី ក្នុងរឿងប្រទេសជាតិ។ សេចក្ដីសម្រេចរបស់មេដឹកនាំទាំងពីរ បានសរសេរថា៖ «ប្រធានក្រុមភាគតិចនេះ នឹងមានថានះស្មើនាយករដ្ឋមន្ត្រី»៕